غيييييييييييييييياب طويييييييييييييييييييل ،، مقناص الوبران في رمضان،، مع عاشق الغلبا

[محروم.كوم]

السلام عليكم ,، تقبل الله منا ومنكم صالح الأعمال ،،نسأل الله القبول ،، والنصرة

لإخواننا اهل السنة في سوريا ,,وكل ام وانتم بخير ،،،

يالله حي المكشاتية جميعاً من نعرف ومن لا نعرف ،،

هذه المشاركة لي بعد انقطاع دام اربع سنوات تقريباً ،، بسبب مرض ووفاة

والدي رحمه الله وتغمده بواسع رحمة ،، و

كذلك دراستي التي امتدت لثلاث سنوات ،، انهيتها ولله الحمد والمنة ،،،

ما اطول

عليكم نعطيكم تفاصيل مقناصنا ،،،

اتصال من ابومحمد : السلام عليكم يابوفهد كيف حالك

عاشق الغلبا : ارحب يابومحمد طيب الله يطيب فالك

ابومحمد : العلم سلامتك شايف وبران في محل اقريب ،، تكفى يابوفهد نبيها

عاشق الغلبا : اللهم اني صائم ،، ياخوي انت ماربطت شياطينك في رمضان

ابومحمد : قسم بالله انها مربطه لا شيطان الوبران ،، اخلص علي وافلح

عاشق الغلبا : يابومحمد صيام وعبادة خله بعد العيد وابشر بسعدك

ابومحمد : يابوفهد والله ان محلنا من المحل اللي انت خابره عشر دقايق ،، والله

اني ما اقدر انتظر لبعد العيد

عاشق الغلبا : اكيد يابومحمد كلامك تراني خابر عشر دقايق عندك ساعة ،، ترانا

صايمين و الجو الله يحفظك عرف ما

يساعد للصيد ،، والوبر مقناصه ماهوب ،، مقاضي من هايبر بنده او العثيم ،،

فيها مشي ومحوال جبل ،،

ابومحمد : والله ما جاك الا الصدق ،، بس يمكن اكثر من عشر دقايق المشوار ،،

عاشق الغلبا : اني والله عارف مشاويرك ،، لكن على بركة الله موعدنا بكرة بعد

السحور ،،

طبعاً فيه بعض الأخوان وابناء العم من فترة وهم يلحون علي بمقناص وطلعات

صيد ،، قلت فرصة اكلمهم واخلص منهم

نروح سوا ونمتعهم بشوفت الوبران خصوصاً ان المكان قريب ،،

تفاصيل المقناص :

المكان : الرياض ( جنوب )

التاريخ : 15/9/1433

السلاح : ام سقستسن برنو ( 223)

المسافة : 150 متر تقريباً

نوع الرمي : نكس ( صل )

اعضاء الرحلة :

ابومحمد

عاشق الغلبا

ابومبارك ( ابن عمي فهد)

تخصص مقناص (اخوي محمد )

ذيب الرحلة ( اخوي راكان القعدة )

شبل الغلبا ( ولدي فهد ) الله يحفظه مشغلني يبي مقناص ضلع ما عاد يتنزل

للطيور والارنب طموحه كبير ابوالشباب

تجهزنا بعد السحور و صلينا الفجر عند ابومحمد و مشينا على بركة الله ،، وبعد

ما اشرقت الشمس وصلنا المكان المقصود ،، وبعدها نزلنا جهة العجمة اللي

الوبران فيها ،، اخذنا ندربل و نتشوف في الركب والصدوع حوالي ربع ساعة ،،

ما شفنا شيء ،، ابومحمد اختلفت روابعه ،، يطالع فيني ويقول كانت هناك ثم

هناك ،، اقول خل الخراط عنك حنا مانبي كان وكانت ،، نبيها الآن ،، طبعاً اضحك

معه ( الكلام خافت جداً بينا ،، لان الوبر يسمع ويشم الريح بشكل عجيب ما يجهل

اهل الوبران) المهم قربت اشوي من العجمة و ادربل الا هي موبرة على ركبة

اثنين ( انثى وولدها مذب ) قلت ابشروبها ،، بعدها قاموا الشباب يدربلون

ويتمتعون في شوفتها حتى الشيخ فهد مد الدربيل وقام يناظرها ،، جلسنا ندربل

حولها ونتشوف يمكن فيه غيرها لان فيه كلخ (ذكر ) شايفه ابومحمد معها ،،

لكن للاسف ماظهر ،، ولاني خفت اننا نتاخر وتحتر الشمس علينا وحنا صايمين

،، قلت ما هوب لازم هالكلخ موعده بعد العيد ان الله احيانا ،،

لكن ماذا نرمي الام ام ولدها مذب طيب ؟؟

الشباب نبي لام كبيره ومشحمة تكفى يابوفهد ،، ابشروا بسعدكم لكن ابرمي

الصغير ،،، الله لا يوريكم فكلي الله بغوا يدفوني مع العجمة ،، قلت طيب وانا متخذ

القرار اللي يسألني عنه ربي اني ما ارمي الام ،، طبعاً في هالوقت نزلت الوبران

تحت تبي تفلي ،، لكن حست بصوت احد الشباب ووقفت على ركبة متضامده ثم

تحت بعض ،، المهم زان المرمى لي قلت دربلوا الان وسبروها ،، سميت باسم

الله واركيت الصليب على راس الوبر الصغير ،، و ربي يوفقني فيه وتضربه في

عينه وتحذفه فوق ،، (توفيق من رب العالمين و ليس فن مني) طبعاً كلهم كفو

يابوفهد حجت ،، لكن زعلانين ليش ما رميت الأم الكبيرة ،،، بعدها جلسنا ثلث

ساعة نتشوف ما ظهر شيء ،، قلت ابنزل قبل ترتفع الشمس وتحتر ،، قال ا

ابومحمد لا انا اللي بينزل ،، لكن حلفت عليه ما ينزل ،، المهم لوحت من عند

العجمة المقابلة و جبت والوبر ،، ما ظهرت فوق الا وانا ناشف ريقي ،، بعدها

ركبنا راجعين للديرة ،، بعد ان من الله علينا بصيد الوبر ،،

لكن ليش ما رميت الأم ( الانث )؟؟

ما علمكم يااخوان بل انا اتعلم منكم ،، لكن تذكير وتناصح فيما بيننا وخصوصاً ان

مناطق الرياض اصبح الوبر قليل فيها بعد ما كان يضرب المثل بكثرته ،، نحن

نقنص من هواية ومتعه وليس من جوع مثل ابائنا او اجدادنا ،، اسأل الله رب

العرش العظيم أن يرزقنا شكر نعمة التي نحن فيها ،، الهدف من ترك الانثى

( الام ) انه باقي اسابيع معدودة ويبدأ الضراب ( النشير ، التزاوج) يعني باذن الله

بعد ستة او سبعة اشهر بتجيب اربعة او خمسة خوانيس ،، وبكذا يزيد عددها في

العجمة اللي شفناها او حولها وتتكاثر تدريجياً ،، لكن لو كتب الله ورميناها

وصدناها معناها حكمنا على المكان اللي حنا فيه بالإبادة ،، لكن الان نقدر نتردد

على المكان ونصيد حاجتنا بين فترة و اخر (طبعاً هناك تصوير فيديو لمقناصنا

ورمينا للوبر يبين حقيقت ما ذكرت)

اخيراً

كلمة منتشرة بين بعض القناصين في هالوقت الله يهديهم اعتقد كلكم تعرفونها او

قد سمعتوها

إذا ما صدتها انا صادها غيري ،،

والله ان القناص الحقيقي هو من يتمسك باخلاق الصيد وفنه بغض النظر عن

الاخرين

اسف على الاطالة لكني من النوع اللي يحب انه يشرك القارىء الكريم في

تفاصيل الموضوع حتى يكون كأنه مشارك في الرحلة معنا

ملاحظة /

يوجد تسجيل فيديو لرمي الوبر ،، لكن للاسف ما اعرف انزله ياليت احد الشباب

يفزع ويشرح لنا الطريقة ،، اكون له من الشاكرين

اترككم مع الصور

بسم الله بداية الصيد ندربل نتشوف الوبران

هذا ولدي فهد الله يحفظه منبطح ويدربل على الوبران ،، ما قلت لكم ان طموح ابوالشباب كبير

وهذي لقطة مع الشيخ فهد بعد ان تم الرمي وصيد الوبر،،

وهذي لقطة وانا تحت نازل للوادي اجيب الوبر

وهذا الاطخم بعد ان اكرمنا الله به حي هالشوف

هذا الاخ راكان (ذيب الرحلة ) طبعاً كان مصور في هالرحلة جزاء له عاشان ثوبه الابيض اللي هو لابسه

ابن العم فهد كان احد تلاميذي سابقاً

الاخ محمد (تحصص قنص )

هذا( شبل الغلبا) الله يخليه لي ويصلحه ويكفيه كل شر ،، لكن نصيحه للقناصين لا تخلي ولدك البكر(الكبير ) مولع بالصيد لانه بكره يسابقك للبران ،، وما عاد يجلس بالبيت علشان يخدم اهله

اعضاء الرحلة في صورة جماعية







ماقصرت الام سقستين ذبح على الطريقة الاسلامية

صورة تبين مدخال الطلقة مع العين ،، اذا اراد الله لك شيء حصل ،،

بعد مرط الوبر وتجهيزه للطبخ ،،، ماشاء الله مشحم من النعمة



بعد الانتهاء من طبخه وتقديمه للاكل

وهذي صورة المرقة الله لا يخلينا منها

لبى والله قلبك هذا عمي مبارك الله يحفظه شقيق والدي الله يرحمه الوحيد ،، كنت معودهم على اني اجمعهم على الصيد كبير والا صغير ،، طبعاً عمي متخصص في الارنب والحباري والوالد رحمه الله في الصيد الكبير ،، مولعين في الصيد قديماً ،، ويا اخوان اذا صيدك ما اكل منه ابوك او عمك ترا والله ما له طعم ،،

في الختام اسف على الاطالة و الانقطاع الطويل ،،،

طلب صغير

تكفون يا اخوان ادعو لوالدي رحمه الله وجميع موتى المسلمين في ختام هذا

الشهر الفضيل ،،

خاطرة

مانسيتك يا اغلا من الروح والولد والزوج

مانسيتك و خالق الكون ياقمة الاخلاق والزين

مانسيتك طيفك يجري في نبضي ودمي و العين

مانسيتك سنة وخمس اشهور والدمع في محجر العين

مانسيتك حزين الخاطر والقلب مكسور

مانسيتك وانا لك دوم في شوق وحنين

وعلى دروب الخير نلتقي بإذن الله،،،،

__DEFINE_LIKE_SHARE__