سالفة المهايطي ( والمقلب )

[محروم.كوم]

السلام عليكم ورحمة الله وبركاته
وأسعد الله جميع اوقاتكم بكل خير
سالفة المهايطي / كنا في رحله بريه وجلسنا نسولف ومعنا واحد من الإخوان الله يذكره بالخير السوالف كلها له يعني ماتجيب سالفه إلاّ عطاك وحدها مثلها وأحسن منها وطبعاً هو البطل في سالفته ..
المهم عطانا سالفه حصلت عليه يقول ((في أحد الأيام شب حريق في بيت نسبيه وكانت النار منتشره في كامل البيت ويقول مادريت إلاّ نسيبي ينادي بصوت عالي يالربع افزعوااا تكفون افزعولي يقول قلناله خير إن شاء الله قال نسيبي البيت فيه شنطه سحاره (والشنطه السحاره معروفه هي القديمه اللي تكون مصنوعه من الحديد او التنك) والشنطه هذي فيها جميع أوراقي الخاصه وصك البيت وصكوك ثانيه وفيها كل إثباتاتي وصاحبنا يفزع ويقول قلتلهم عطوني بطانيه وجابوله البطانيه ورش عليها ماء اللين غرقها ويقول يوم جيت ابدخل البيت ونسيبي يقولي انتبه الشنطه فيها رصاص سوجل ورصاص بنادق ورصاص مسدس يعني رصاص من جميع الأنواع هههههههه ويقول والله يوم جيت ابدخل البيت اني اسمع صوت الرصاص يتفجر في النار كأنها حرب في البيت المهم صاحبنا دخل وسط النار وخرج الشنطه والرصاص يثور منها كانه واحد جاس يرمي !!!!!

.............................
راحت السوالف وجت السوالف وبعدها ربي هداني لفكره مقلب في صاحبنا وكان معي كيس فيه رصاص رشاش وكنا جالسين حولين النار وقلت ياشباب ودي أحط رصاصه في الجمر ويش يصير ؟؟؟
قال صاحبنا المهايطي لا تفكى والله تثور علينا وتعدمنا ... وفي نفس الوقت كانت معي فارغة رصاصه وكنت ماسكه في يدي وسويت نفسي باخذ رصاصه حيه من الكيس وبسرعه دخلت يدي في الكيس وخرجتها والفارغه في يدي وحطيتها على راسها وسط الجمر وللي بين من الرصاصه مؤخرتها فقط .. وشوي تناقزوووو اللي كانوا جالسين على النار كل واحد في جهه ومن بينهم صاحبنا صاحب قصة السحاره وجلست اضحك عند النار ورحت في الجهه اللي ضرب معها صاحبنا والقاها مندس خلف كفر سيارته ههههههههههههه وقلبه يرتعد من الخوف وقلتله يارجل ليش خفت انت توك تقول خرجت شنطه مليانه رصاص من وسط حريق هههههههههه ..
قال ياخوي العمر مره .. وسبحان الله آخر المهايط ندامه وخجل لأن صاحبنا ذيك الليله ماله وجه يتكلم مع أي أحد من اللي معنا في الرحله ... وسلامتكم ...

__DEFINE_LIKE_SHARE__