مصيبه المصيبات على وزن موضوع الفيتو الذ اللذات ((مذخور ))

[محروم.كوم]

حياكم الله اخواني الكرام واسعد الله ايامكم بالمسرات
وكل عام وانتم بخير
موضوعي اليوم عن فقد الطيور او اصابتها
بأي عرض اثناء المقناص
في عام 1419 اقام اخي الغالي والعزيز فيصل بن محمد العطيشان
صاحب محلات السويبع
معرض للطيور بمدينة الخبر بأسواق الراشد
وقد استضافني مشكورآ في هذا المعرض
وخلال ايام المعرض تعرفت على كثير من الاخوه
وكان برفقتي زميل لي اصر على شراء طير من الطيور المعروضه
وفعلآ تم شراء طير بيتي علومه زينه

بعد مده اتفقنا على رحله سعدنا فيها بخوه الصقار المخضرم ابن رشيد ابومتعب
صقار من اهل الرياض وواحد من الربع
وتم الاتجاه الى (( الرمثيات غرب الأديه ))
لك ذكريات بقلبي لاتنسى عام1418
قنصنا وجاب الله حبارا لرفيقنا طلع وصاد
في هذه الاثناء قابلنا قنوص وذكرو لنا انهم هادين على اربع حباري
وضاع الطير معهن
والجهاز مايدق والغريب ان الطير لشايب كبير في السن
وعلى مااعتقد انه محرول (معاق) ومعه سواق وعجزت تقضبه الارض
الله يذكره بالخير وقال ابروح اشيد عليه برفحا وارجع
لزمو علينا بالقهوه
واستجبنا لهم لما لمسناه منهم من حفاوه وكرم وطيب
وبعد التعرف عليهم صارو من اهل حائل واميرهم الصقار ابن سبهان وجماعته
وفي نفس الوقت رغبنا بمساعدتهم والبحث عن طيرهم
وسبحان الله هم مفجوعين هذا اليوم بفقد طيرين
الاول مع الحباري والثاني هدوه طلع وصار على بومه ولصق بالجال وتعور
وكان مع صاحبي فرخ طيب وعوضناه عنه الا انه ابى ان يأخذه الا بمبلغ
وتم بيعه عليه في حينه وطلب رقم الحساب وارسل المبلغ جزاه الله خير
ودعناهم وذهب خوينا ابن رشيد لمحافظة رفحا
كان معه طيورللبيع يبي يعرضه
ورجعنا انا وصاحبي نقنص وجهه لين وصلنا تربه
وبتنا ثم واصلنا المسير باتجاه شامة زرود و وجنوب من ملحا
قال خويي يابونايف ابشر بالجره كنت حوله
قصيناه شوي شوي طلع طيره هد
يوم طارت سقنا شوي يوم فقعت الثانيه قدام المواتر
طيره يطرد وصاد
وانا اسوق مع الحبارا الثانيه
وهي تماسح وده تطب بس ضايقته شوي وخفت تطلع للنفود اضيعه
وكان معي طيرين طيري جاين هدو من أخي الغالي تركي بن عون ومجهزه بالريشه
هذي صورته

وطير رفيقي اللي شرا من معرض الشرقيه
رقم 4

هديت طيري وطرد وعقب اشوف الحبارا ولا معه طير
ونا اتناول طير خويي واهده بدون جهاز
ويدخلن النفود
وقفت براس العرق ارقب وجا صاحبي
وشغلت الجهاز ودق حروت مهدنا
قلت يمكن الطير رجع لمك وخلا الحبارا
لكن خل ندور طير رفيقي
هذا فيه جهاز نلقاه
دورنا لين دخنا طير وبدون جهاز وشلون تلقاه
قلت ابلوح كانه مفلس يبي يجي

وفعلآ صار مفلس وجا على الملواح الحمدلله على العقلان
الحين نبي نرجع لطيري يوم شغلت الجهاز والاه ضعيف جدآ وحنا مرتفعين
توجهنا والنغمه ضعيفه مره
يوم انقطع الصوت مره
ماخلينا شي ماسويناه لوحنا
فكينا حمام
ولكن اراده الله فوق كل شي
وراح بجهازه
وتراي محلل اللي لقاه هاك الساعه
وعند الوصول للديره
من الحرص شنذرت طير رفيقي وزودت الكيله شوي
تخبرون اول اطحن ولفه بالشاش والله يعين الطير بدون قياس
يوم تغير علي وبدا مايعلف قال واحد من الربع لخويي اباخذه ابتطب به قال خذه
ومن بكرا اتصل قال مات
وراحن كل الطيرين
(( نفس ماصلت على النبي ))
والحمدلله على كل حال

هذي من القصص التي مرت علي مع الطيور
حبيت اشاركم بها اتمنى ان تعجبكم
وشكرآ لكم
اخوكم (( مذخور))

__DEFINE_LIKE_SHARE__