ليلة صعب ننساها

[محروم.كوم]

السلام عليكم ورحمة الله وبركاته

عندي لكم سالفة ان شاء الله تعجبكم

قبل سنتين كنت طالع مع بعض الاخوان للصيد وكنا نصيد من الطيور طول النهار ويوم غابت الشمس قلنا نجلس نتعشى بالبر واذا تعشينا نرجع للديرة نزلنا كل الاغراض وبدينا نجهز عشانا وراحو اثنين من اخويانا يجمعون الحطب وسوينا عشانا وتعشينا وبعد العشى براد شاهي لين قربت الساعة (12) بعدها حملنا اغراضنا ومشينا وحنا ماشين بالسيارة شفنا داب ( ثعبان) طوله يجي مترين حاول خوينا السواق انه يدعسة بالسيارة وبعد ماتعديناه رجعنا نبي نشوفة لكن مالقيناه نلف يمين يسار اختفى الداب وحنا استغربنا وين راح بعضنا قال اكيد جن وبعضنا قال اكيد طلع بالسيارة المهم شوي الا خوينا اللي راكب قدام يصيح يقول قرصني شي برجلي وحنا نوقف نشوف رجلة ونلقى برجله دم بسيط قلنا اكيد الداب بالسيارة وهو اللي قرصه الرجال قام يصيح ويقول ابموت وارتفعت حرارته والمشكلة اقرب مستشفى (40) كيلو وحنا بالبر ولا نعرف المنطقة زين المهم خوينا السواق حط رجلة وحنا على اعصابنا ماندري الداب وينة الواحد اذا حس بيد اللي جنبة تحرك نقز يحسبة الداب وكل واحد رافع رجلية على المرتبة وصلنا للمستشفى ونزلنا قبل السيارة توقف ماهو علشان نشيل خوينا الا خايفين من الداب دخل خوينا قسم الطوارئ واعطوة أبر وحللو الدم وبعد ماطلعت نتيجة التحليل قالو مافية تسمم قلنا يادكتور الرجال قارصة داب وشلون مافية تسمم قال مافية اي سموم بجسمه قلنا طيب والدم اللي برجلة هذة قرصة داب 0 قال الرجال سليم ويقدر يطلع الحين قلنا ماهي مشكلة يطلع بس من وين سيارة 0 سيارتنا مافية امل نركبها لين نشوف الداب طالع منها0
اتصلنا على واحد من الزملاء صحيناه من النوم قلنا تعال خذنا حنا تعطلت سيارتنا وماقصر جاء واخذنا ويوم اصبحنا وحنا نروح للسيارة وناخذها للمغسلة قلنا للعمال غسلو الغمارة بالماء قال كيف صديق بعدين مسكل قلنا المسكل والله اللي بيطلع عليكم اذا جاه الماء المهم ابعدنا عن السيارة والعمال يصبون الماء على المراتب لين اغرقوها شوي الا واحد من العمال يصيح صديق صديق تعال شوف ايش هذا قلنا اكيد طلع الداب قربنا عندة قلنا ايش ثعبان قال لا لا صديق هذا فار وش تقول انت فار ونقرب والا الجربوع طالع من تحت المراتب غرقان 0 قلت من وين طلع الجربوع قال اللي معي هذا صايدينه يوم نحطب وحطيناه بالسيارة ونسيناه 0
وعرفنا ان الجربوع هو اللي سبب كل هالمشاكل حتى خوينا اللي انقرص من الجربوع من الخوف ارتفعت حرارته يحسبه داب

وسلامتكم

__DEFINE_LIKE_SHARE__