|| ومن لايحوش المرجله في شبابه = اليا انتحت عسر وصعب لحوقها||

[محروم.كوم]

السلام عليكم ورحمة الله وبركاته
البارحه عيني جفا النوم موقها = تسبر سنا برق(ن) رفيفه يشوقها
جعله من المنشا ينثر مخايله = من مزنة(ن) غرا تكاشف بروقها
لا مرها العساس من غب سيلها = عين خباريها ووكد حقوقها
مدهال ذود(ن) ماتقرع من الطنف = لا قرعت بعض الرياجيل نوقها

البل تبي رجل(ن) عزومه قوية = واليا انتوت من دربها مايعوقها
لايسمع العاذل ولا يسمع الردي = رعاية الربله لايبست عروقها
ياما رعينا بمشبل(ن) مارعوبه = اهل الغنيم اللي تدقق ربوقها
مافيه كود الشقارى وخلطها = وفوه الخزامى اللي طوال(ن) عنوقها
ترعا به العفرا ويبني شحمها = عقب الدهر خطرا(ن) تزايد فتوقها
يازينها لا جات عقب المعشى = والنار تشعق والمعاميل فوقها



لامن ضوت عقب العتيم وتذاوقت = وغسلت شمايلها وربشة شقوقها
هذي تغرز من غلاها وقدرها = وهذي يقلط للنشاما غبوقها
واليا اصبحت تسرح على الروض الأدنى = اليا اشرقت الشمس باول شروقها
لاهبها النسناس تشفيك خنته = يكفيك عن ريح الخزامى نشوقها
هذي طراة البل وحنا هل البل = لا طاحت رفوع الوسامي نسوقها
راعي الوظيفه يرتخص من وظيفته = يرعا بها الجازر ويتبع طروقها
كله لعين الشايب اللي يحبها = عود(ن) يقلط للنشاما حقوقها
لايجرح العاني ولايزعل الخوي = وعوق الخصوم اللي وساع(ن) حلوقها
اللي يحب الطيب يلقاه عنده = واللي يدور للمراره يذوقها
ومن لايحوش المرجله في شبابه = اليا انتحت عسر وصعب لحوقها
وختمانها مني صلات(ن) على النبي = اعداد ماتنشي وتبرق بروقها
,,
- طلب : تصويت لي " هنــا "
سلمــان

__DEFINE_LIKE_SHARE__