لاطقك العقاب فطق الرخمه

[محروم.كوم]

السلام عليكم ورحمة الله
بادئ ذي بدء
احب ابين ان السالفه حقيقيه ومعاصره ناقلها عن عمي
الجندي اول ركن طيار مضلي طباخ/ ذخر بن ذخير بن مذخور الصديق

في القصه هذي ابارمز كل شخصيه باسم عشان التضييع

الاسماء قد تكون غير حقيقيه لعدم معرفة اسماء الشخصيات

بعد الفلسفه الزايده نطب بالمفيد

هذا طالت عماركم كان فيه واحد بدوي اسمه حمد عايش على الفطره
سجل بالعسكرية وماخذ الامور على طبيعته وعلى بداوته

في يوم من الايام انتهى عمله في صيانة العربات وجاك راجع يم الثكنة ( سكن العسكريين)
يمشي على رجوله الدنيا حر وشمس الى هاك السياره ماره من عنده الا هو بالملازم خالد
من ضباط سريته للحاله بالسياره اشر له حمد ماوقف له الملازم ( زلبه)

كان فيه عقيد اسمه يوسف موذى وموذي الناس بشره يحسم على الناس ويسجنهم ويطالبهم
باكثر من جهدهم وسمعته شاعت بهالشي بين الناس وحمد يسمع بهالسوالف وشايل عليه بدون لايشوفه

نرجع للحلو حمد الرجال انجنت جنونه وشلون خالد ماوقف لي والحاله بالسياره
في اليوم الثاني جاء حمد قدام السريه وقال ابي الحق من الملازم خالد وهذي قصته
(أخونا في الله يحسب نفسه في الديره) قال الملازم مافي العسكريه حقوق وقبيله وتراك مجازا خفاره 4 ساعات حمد أنهبل وهو يقوم ويصكه هاك المخمس اللي على كيف كيفك
فرقوهم وودوا حمد للسجن وراحت المعامله لقائد اللواء محسن
محسن ذا كبير بالسن ومعه سكر وعلومه علوم
قال اللواء اسجنوه مبدئيا عشرة ايام ثم جيبوه هو والملازم خالد
وفعلا بعد عشرة ايام جابوا الاثنين

حنا اللحين في مكتب اللواء محسن وجالس عنده العقيد يوسف
وواقف قدامه حمد والملازم خالد ( هما اقول لكم اني اصلح مخرج)
حمد يناظر هذا العقيد يوسف اللي الناس تتكلم عنه( ياهو حاقد عليه)
بداء اللواء محسن يوبخ حمد ويبين له عظم جريمته ويقوم الغثيث حمد يراد اللواء
ويبرر موقفه اللي زي وجهه
ارتفع السكر عند محسن وهو يقوم ويصك حمد هاك المخمس افتر حمد في مكانه
وش يسوي محسن بغض النظر انه لواء شايب ماقدر يردها له التفت ولا يوسف قاعد يهدي
في محسن وهو يرتكز على رجل ويقول قولته الشهيييييييره
( لا طقك العقاب ...........فطق الرخمه)
وهو يمسح خد يوسف افندي بكف ( بنغير ونقول كف لان المخمسات كثرت خوف ان تملوا)
خذولهم خمس دقايق صمت من هول الموقف
شغلوا حمد مره ثانيه للسجن
اللواء محسن اعجبته كلمة حمد وسرعة بديهته
وهو يجمع خالد ويوسف بعدها بوقت وقال لهم انتم ضباط وقدامكم مسؤليات ومناصب بتوصلونها
وهذا جندي مبهذل عشان واحد ماوقفله سوا لنا حفله اجل بكره لا فصلناه وش بيسوي
خلوني احلها من عندي قالوا تم
أبشركم انتهت السالفه

المخمس: مدري وش تعريفه هل سمي بذلك لمشاركة الأصابع الخمس في خد الضحيه
او لانك تنخمس في مكانك ماتدري وين تروح
المهم الله يكفينا شره

تقبلوا تحياتي ودمتم بود× __DEFINE_LIKE_SHARE__