سؤال عن الهامستر

[محروم.كوم]

بسم الله الرحمن الرحيم
السلام عليكم ورحمة الله

اخواني المكشاتيين ازعجني اخوي الصغير يبيني اشتري له هامستر ورحت اشوف هالهامستر وش يصير طلع فأر ماله ذيل ورفضت لكن مثلكم خابرين البزارين لاحط شي براسه وراني نجوم الظهر والا قلت له فار وش تبي به قال مهوب فار كل ربعي شارينه وماله ذيل واخيرا حجر لي يوم قالي مهوب احسن شكل من وبرانك اللي شاريهن وحاطهن بالمزرعة عاد انا قمت اتلفت كأني ماسويت شي وقلت يكون خير الاربعاء اشتريه لك ان شاء الله لكن بصراحة نفسي ماقبلته قلتله وش رايك اشتري لك ديتس دجاجة عصفور كناري ارنب تمساح اسد اي شي غير هالمستر هذا قال لااااااااااااااااا
رحت لاحد الربع وسألته عن الهامستر هل هو فأر هل هو وبر هل هو ارنب هل هو جربوع قالي ياخي مادري لكن اللي لاحظته انه لاحفر جحره يسكر على نفسه بالتراب مثل الجربوع يعني يحط له قصعة وايضا له جيب في فمه يجمع فيه الاكل ويخزنه في جحره !!!

سبحان الله العظيم لكن رد الرجال ما اشفى غليلي واتصل لي على شيخ واقول ياشيخ تربية الهامستر حرام ؟ قالي والله مادري وشو هامستر هذا قلت سلام عليكم
وادخل الشايب قوقل وابحث مالقيت اجابة موثوقة ابرز اجابة فيه ان يختلف عن الفأر والجرذي من ناحية المناعة فمناعته ضعيفة جدا جدا مقارنة بالجرذ والفأر لذلك لاينقل الامراض خصوصا الطاعون لأنه يموت من اقل اصابة بمرض !!
لكن القلب ما ارتاح قلت خلني اسألكم اذا احد عنده رد وافي ترى الاربعاء بكره ياجماعة
هذي صوره ياجماعة


__DEFINE_LIKE_SHARE__