قالوا تنمنى قلت ددسن وخلفه **................

[محروم.كوم]

بسم الله الرحمن الرحيم

أحبتي الكرام ...السلام عليكم ورحمة الله وبركاته
وأسعد الله أيامكم بكل خير.........
هذه بيتين قلتها في مجلس كثر فيه التمني وتخيل الدنيا
وطلب مني مشاركة واعاني الله على بيتين في وقتها :
وقلت فيها واعماركم أطول :
قالوا تمنى قلت ددسن وخلفه (1 )**...........
طبعا سكت شوي وسألتهم وش رايكم صعبة الامنية والا سهلة
قالوا لا والله الا سهلة قلت الحمد الله ...التواضع زين ...هههه
ثم عدت البيت وقلت :
قالوا تمنى قلت ددسن وخلفه ** وشيك مصدق فيه تسعين مليون
فضحك الجميع وقالوا وين رحت يا ابوناصر .....فضحكت
وقلت أصبروا وأسمعوا الباقي ::
قالوا تمنى قلت ددسن وخلفه ** وشيك مصدق فيه تسعين مليون
لكن ترى يمكن أهزه واحذفه ** وأرجع على حالي ولو كنت مديون
إن كان مع ذالشيك رجه وخفه ** فديني مقدم لو غدى الشيك تليون

فتمت الابيات ولله الحمد وبان مقصدها ومعناها وحصل المقصود منها

وهو إن الدنيا بلا دين مضره وفتنه أكثر منها نعمه
وسلامتكم
محبكم ابوناصر
ــــــــــــــــــــــــــــــــــــــــــــــــــ ـــــــــــــــــــــــــــــــــ
(1 ) الخلفة الناقة حديثة الولادة والتي يحلبها أهلها
( يتمنحونها )

__DEFINE_LIKE_SHARE__