عندي مشكلتين وابي الحل بارك الله لكم

[محروم.كوم]

السلام عليكم ورحمه الله وبركاته

اللاخوة الكرام بارك الله فيكم
عندي مشكلتين في فورد اكسبلورر 2010

المشكلة الأولى
في صوت الهواء وهو مو صوت الهواء اللي إحنا خابرينه
في كل سياراتنا التاليه اللي ماله حل
لكن هذا صوت يروع حسبي الله ونعم الوكيل
يبان الصوت عندي بعد سرعه 100 كم
واذا فيه هواء قوي يبان من سرعه 60 كم واذا فتحت الشباك
اختفى الصوت رجعت للوكاله مرتين ويقولون لي من الجلد وصلحناها
والمشكله إلى الآن
انا اتذكر في عام 2003 كان عندي كامري وفيها نفس الصوت
وركبت شطرطون في الغرابي واختفى الصوت
لكن الكامري كانت حديد ومافيه شي بين الباب والبدي
والفورد موجوده الربل
هل لو رحت لحقين الغرابي وسويت الشطرطون
بيفيدني وبينهي المشكله
والا ما تعب نفسي واطارد الوكاله لين يشوفون لي حل ؟

المشكلة الثانية
الهواية وقت ما يكون المكيف شغال بهذلتني
والمشكلة الوكاله تقول طبيعي الفورد اذا شغلت المكيف الهواية تفتح

يا اخوان اقسم بالله تبهذلت كأني في سيارة كشف كل روائح السيارات والديزل عندي في الغمارة صدري راح فيها من شريت هالسيارة
المشكلة انا دوامي على طريق الخرج ومثل ماتعرفون التريلات ومغامراتها على طريق الخرج والله اني ارجع من الدوام كأني راجع على رجولي تكرمون
ما كأني راكب سيارة 2010
عيوني وصدري رايحين فيها وراسي منتفخ من شكامين السيارات
يعلم الله اني ما بالغت واني فعلاً قررت على المعارض وشراء راحتي
الحاصل الآن انو عند وقوفي عند الاشارات المرورية اطفي المكيف
اذا قدامي سيارة الصرف الصحي اطفي المكيف
اذا في زحمة وقدامي سيارة قديمة او ديزل اطفي المكيف
ماتسوى علي والله يا اخوان سيارة جديدة وادوام على سيارات اخواني
فـ قلت أستشيركم وكلي أمل في الله ثم فيكم اني بلقى الحل على ايديكم
واترك خيار بيع السيارة آخر الحلول
والله يوفقكم ويسعدكم ويجزاكم بكل خير

__DEFINE_LIKE_SHARE__