الناس،،وما أدراك ماالناس،، للشاعر فهد الشهراني

[فتنـۂ الـڪِوטּ]

[أنت يلي من حكي الناس وش فيـك أمغبـون
البشـر لاضقـت منهـا تـزيـد طعونـهـا

ولاتحاول ترضي الناس وتقـول اش تبـون؟
غايتـن لـو تجهـد النفـس تقصـر دونهـا

وإن جلست فمجلس الـزور واللـي يكذبـون
لايغـرك كثـرت الـزاد فـوق اصحونهـا

إن جلست فمجلـس الـزور تقفـاك الطعـون
وإن حكيـت بكلمـة الـحـق مايرضونـهـا

وأنتبـه عثـرت خويـك يليـه الأقـربـون
إنـك تبيـن للأجـنـاب وش مضمونـهـا

صاحبك ..وعيال عمك ..وربعك ..يكرمـون
قدرهم لـو بعـت الأشنـاب لجـل عيونهـا


لوجفاهم زادهـم بعـد فـي الفزعـه يجـون
وقفتـن يبـقـى صـداهـا ولا ينسونـهـا

خـذ كلامـي يامحمـد وهونـهـا تـهـون
كـم تجرعـت المـراره وذقـت اغبونـهـا

التجـارب اشعرتنـي بـمـا لا يشـعـرون
والمصايـب درستـنـي وانــا ممنونـهـا

لبن صـرت اعلـم النـاس كيـف يرتبـون
الجـروح .....وكيـف الآلام مايسلونهـا؟؟؟

عيش جرحك ..... وأنت راضي تلذذ بالشجون
النفـوس احيـان تحتـاج عمـق شجونـهـا

الصبـاح يعلـم النـاس كـيـف يـقـدرون
مافضـح ستـر الليالـي ومـن يسرونـهـا

والليالي لـو فضـح سترهـا نـور العيـون
كـان شفنـا عاقـل النـاس مـن مجنونهـا

آآآآه يامقسى نجاحـي علـى اللـي يكرهـون
وآآآآه يامحلـى بيوتـي عـلـى مفتونـهـا

اييييييه ياكثـر المشاريـه واللـي يشرهـون
ونـاس لاقلنـا قصيـده تقـوم اقرونـاهـا

ماعلينـا دام فـي النـاس ناسـن يعشـقـون
والقصـيـده قـبـل لاقولـهـا يقرونـهـا

مازعلنـا والنهـايـات لـلـي ياصـلـون
خـل ناسـن مـن ورانـا تسـن سنونـهـا

إن حكيـت اعلـم النـاس مـالا يعلـمـون
وإن كتبت الخـص القـول فـي مضمونهـا

وإن بغيـت أنـزه النفـس عمـا يصـفـون
الثقـه تطغـى علـى شكـهـا واظنونـهـا

الشيـوخ اليـا تحاكـوا بكلمـه ينثنـون؟؟؟
كلمـه وعـجـزوا ملايـيـن مايثنونـاهـا

وانا شيخن من شيـوخ الشعـر لا يجحـدون
والفعايـل تبـطـي الـنـاس مايمحونـهـا

كـل ماعديـت رجـم المعالـي يزعـلـون
الله يكفانـي غثـى النـاس وشـر عيونهـا

ولاتحاول ترضي الناس وتقـول اش تبـون؟
غايتـن لـو تجهـد النفـس تقصـر دونهـا]
__DEFINE_LIKE_SHARE__