تحاشرت سود المزون المزابير 0000000 جنوب دخنه لين قفرا عفيفي

[محروم.كوم]

تحاشرت سود المزون المزابير=جنوب دخنه لين قفرا عفيفي
يوم ادلهمت بالفضا كنها النير=وابروقها دلا سناها يخيفي
تقادحت مثل السيوف الشواطير=وارعودها ترجف علينا رجيفي
هملولها يوحي بزين التباشير=ساعه ورشق الما غزير وخفيفي
يتلونها بين الحزوم المخابير=كل واحدن منهم عليها لهيفي
مولمين الزوم لاجل التصاوير=موثقين السيل من دون زيفي
دلا الجذيب يشيل عوج المشاجير=وادعوبها شقت ليان الشعيفي

وانفرشت الشعبان صارت مجارير=بياض ماها منحني تقل سيفي
زاد الزبد من فوق صخر المحاجير=وامسى غثاها بالسهل تقل جيفي
وشعيب دخنه شال كل العثامير=لين الدجى والما لجاله جريفي
واجذوع الاثل من الزبد كنها الجير=الابيض اللي ما تلقاه صيفي
والناس حوله والدلال المباهير=والنار تلعج في لهبها لفيفي
وابريق شاهي وازنينه بتخدير=مع الشويه من ضلوع الهريفي
هذي حلاة البر وقت المماطير=خصوصا القاع الفسيح النظيفي
يالله تلحقها مزونن مباحير=تنثر مثانيها على كل ريفي
يزود حبس الزرع ينزل على البير=ما قيل حسو الما يجيه الجفيفي
عامين والثالث وهو يسقي الحير=تروا بها الحنطه طحين الرغيفي

يوسف الخليفة ( أبو عبد الله )

__DEFINE_LIKE_SHARE__