عن أحد الإخوه السنه (طويل العمر ... الله لايطول عمرك)

[محروم.كوم]

اين فرعون وهامان اين النمرود وإين إبرهه ياحمد يومك قريب مهما بعد
طويل العمراحنا عايشين؟؟؟!!!

جلالة الملك المعظم كيف حالك وكيف حال عيالك ، مبروك زواج ولدك ناصر وعسى الله يبلغك في الباقي آمين يا رب العالمين، بس ما قلت لي، صج الاشاعة اللي سمعناها، يقولون إن الاسكان ما رضوا يعطون النصري 60 الف حق يشتري القصر ويقولون انه توهق مسكين بين المراكض بي وزارة الاسكان وبنك الاسكان، يا رايح الدبلوماسية يا راجع من السيف الحمد لله اللي الله ستر ومشو له اربعين وقالوا له العشرين جوف احد يسلفك على ما يطلع قرار من الوزير المختص بمواصلة توزيع القروض بو 60 الف.

ايييييه يا طويل العمر من قدك فرحت بولدك الشاعر، بس ما قلت لي بعد،، كم كلفت الحفلة، ويا ترى عيال شعبك قادرين يعرسون؟؟، طويل العمر لا لا لاتفهمني غلط ما اقصد ان يحتفلون نفس احتفالك بولدك وهو في احد كفو يسويها جيف لاقيها في الطريج لو بايقها،... انا اقصد عيال ديرتك يقدرون يعرسون، يقدرون يدفعون مهر زوجة المستقبل لو يقدرون يسكنون في بيت بروحهم بعد 40 سنة على الاقل

تصدق يا طويل العمر ترة الدنية دوارة وعجيبة ، اذكر زمن يدك الشيخ سلمان كان كل بيت فيه عشر عوايل وكل عيلة في غرفة والناس مستانسة، وتقول شودينا بعيد،، خلنا مع اهلنا، يعني عايشين مع بعض برضاهم،، وانت يا طويل العمر اصيل وتحب العادات والتقاليد عشان جذي رجعتنا لزمن يدك وصارت كل عشر عوايل في بيت واحد – بس غصباً عليهم- مشكور يا طويل العمر على الايام الحلوة اللي عيشتنا اياها

اليوم انا تريقت مع يدي وعمومي واخواني ، تصدق يا طويل العمر وانا اتريق قلت ما قصر بو سلمان لم شملنا، والا لو مسوي مثل غيرة من حكام الخليج جان كل واحد في بيت وما صارت هاللمة الحلوة، مشكور يا صاحب القلب الكبير!!!!،،،

بس بعد الريوق وانا رايح الدوام تذكرت شي، لول هاليمعة كانت تصير وبعدها الناس تروح البحر تترزق الله، لكن الحين ما في بحر والرزق صار بمكان ثاني، طويل العمر تدري الصافي جم وصل وصل؟؟ وصل 4 دينار والهامور وصل 10 دينارولين قلنا ليش قالوا

ولدك سلمان دفن البحر واحنا نصيد السمج من قطر

لايروح بالك بعيد طويل العمر هذي سلمان واحد من المحرق اسمة سلمان بحر ولد عم علي بحر ،،،، يعني مو نجلكم المصون لان ولدكم هذا شمس المستقبل هذا اللي راح يلم شمل العيلة اكثر واكثر وراح يحافظ علينة حتى من موج البحر ومن الرطوبة اليي تصير في الاماكن الجريبة من البحر.

طويل العمر شخبار الغدة اللي طلعت لك عسى الله شافاك منها،،، تدري ليييييييييش الله شفاك منها، لانك يوم ملكت عطيت من ملككشوي للارامل واليتامى وذيلين دعوتهم ما يحجبها شي عن رب العالمين.

ابونا حمد ما تلاحظ شي غريب في ديرتك،، حتى انت ما سلمت من المرض معقولة هالجزيرة الجميلة نسبة المصابين بالامراض المزمنة من ضغط وسكر وسكلر وقلب وسرطانات اشكال وارناق وصلة هالنسبة 90% من شعبك.

خل نحللها ونشوف الاسباب احنا عندنا مصانع في وسط المدن السكنية؟؟؟،،، ابد حاشا وكلا اللهم سترة والمعامير وجم ديرة تعبانة مو مهمين بروحة نصهم ميانين موتهم مو خسارة.

انزين خل نشوف سبب ثاني،، عندنا احد مديون في الديرة،،، حاشا وكلا،،، ابد عاد هذي اللي يسمونها إشاعة مغرضة،، بحريني عليه دين يا كافي الشر هذا اللي بيسوي عجايب الدنيا ثمان.

شلون البحريني يدين وما في احد يقدر يدينة،،، هااااااااا شفت شلون صدناها،،، طويل العمر احنا الغني عندنا بينة وبين الطرار شعرة لا وفيها قشرة بعد.

طويل العمر تصدق ان يوم صارت الازمة نزلت نسبة الزواج في البحرين،، وسوق السيارات طاح والمجمعات التجارية خالية اللهم الا من الخليجيين،،،، تدري ليش لان كل هالاشياء تحتاج حق سيولة وسيولة الشعب من القروض !!!اللي توقفت بعد الازمة ووقف حالنا معاها.

بس تدري احسن عشان نحدد النسل بانخفاض نسبة التزاوج،، واذا شفنا روحنا نقصنا يبنا بحرينيين يدد،، لنق في قراطيسهم على المواصفات اللي نبيها ويحبونك حببببب ما له حدود، لي درجة ان لو تقوم الحرب كله ركضوا ركضة وحدة ....... ها وين عبالك بقول ليكون عبالك بقول ديرتهم،،، لا لا قصدي ركضو بسلاحهم يدافعون عن ديرتهم وديرة اجدادهم.

طويل العمر كلمة اخيرة،، احنا عايشين لو ميتين واحنا ما ندري؟؟؟ جاوبني بصراحة، انزل للشارع وسأل الناس من فيكم عايش،، الناس صاروا مسبهين،، يمشون ما يدرون بروحهم اللي يفكر في دين واللي يفكر في هم واللي يفكر في غم واللي يفكر في بيت اسكان واللي يفكر في علاوة الغلاء واللي يفكر في بلوة يديدة من بلاوي والنواب واللي يفكر في بلوة من بلاوي.....، في ذمتك اللي يمشي وهو حامل كل هالهموم يسمونة عايش؟؟!!!

منقول عن أحد الأخوه السنه

__DEFINE_LIKE_SHARE__