((((( بيع وطلب السيارات بهذه الخيمة هل هو بيع وطلب او استهبال ؟؟؟؟ )))))

[محروم.كوم]

بسم الرحمن الرحيم

السلام عليكم ورحمة الله وبركاته

يا اخواني الاعزاء

اشوف الان في الاونة الاخيرة اعلانات بيع او طلب عقيمة

** كيف عقيمة ؟؟؟

يجيك واحد يقولك عندي لاندكروزر موديل 2007 للبيع للاستفسار 055555555

طيب الان بالله عليكم هذا اعلان والا وش نسميه؟؟؟

ولا ، ومن القهر يجيك يقولك ولا تبخسوا الناس اشيائهم

يا اخي وضح اللي انت تبي تبيعة فيه مكينة والا لا فيه بس ميت داخله والا مشبوب فيه والا علمنا وش السالفة

يا أخي الكريم اذا انت معتمد على جوالك فحط في بالك انه ماراح يطفي من كثر الاستفسارات المتشابهة على جوالك

يعني كلهم بيدقون ويقولون وش لون الموتر وكم ماشي وكم سيم وكم حدك ووين موقع السيارة وهل جايه صدوم والا لا ويسألونك عن المميزات اللي كل سيارة تتميز فيها

ويعدين انت مالك ومال وجع الراس حط كل معلومات السيارة ولا نتب ميت حرك اصيبعاتك شوي

يعني بالله وش استفيد اذا جيتك مقلع واضيع وقتي وادخل واقعد اكتب لك اسئلة واحتريك الى بكرة عشان حضرتك ترد ويمكن ما عاد ترد واذا رديت ترد رد بايخ

والا اللي يجيك نفسه في خشمة ما يمديك تسوم الا وهو طاير في وجهك كنك ساب امه والا ابوه وكأنه ما يعرف الحراج وشيء اسمه فتح باب

يا اخواني انا والله اني بديت اكره ذا المنتدى الغالي على قلوبنا بسبب بعض الاعضاء الله يهديهم ويصلحهم

واللي يجيك معه ددسن موديل 90 ومنقلب ومرشوش كامل وماشي 700 الف كم ويقولك مسيوم برا المنتدى بـ 40 الف
ولا احد يسوم بأقل من كذا يأخي هذا استهبال ما هوب اعلان او عرض

والا يجيك واحد كأنه داخل منتدى مجانين ويقولك ابي باترول بـ 25 الف ريال موديل 2009 لون لؤلؤي وفتحة ونظيف
يا اخي منقلب ما تلقاه بذا السعر

من الاشياء اللي تقهر بيجيك اعلان يقول باثفندر 2005 مخزن

وبعدين تجي طاير وتصدم بالموضوع وتدخله بالقوة وتلقاه كاتب في الاعلان باثفندر 2005 اسود مخزن ماشي 350 الف كم
بالله عليكم وش بقى للي ماشي واجد ؟؟؟؟

بس خلاص خلونا ساكتين

أتمنى منكم النقاش بالهدوء وبدون تعصب والادلاء بأرائكم لإدارتنا الموقرة لعلهم يستفيدون

__DEFINE_LIKE_SHARE__