-=][ هــــور العــنــز ][=-

[ĝŘềξБ ễĺ đǻŗ]

السلام عليكم ورحمة الله ,

يقول المطروشي


عبرة العشاق بي يرّيوصليني دار لفلاسـي

لابيه مسكت ولا صريلا ولا بمبي او مدراسي



دبي تحولت خلال فتره زمنيه قصيره من بيوت شعبيه و اسواق قديمه و ميناء قديم الى جسور و ناطحات سحاب و مراكز تجاريه.وأسوت مغناطيس جذب كل سكان العالم .. واستوا الواحد منا يمشي و يشوف عمره غريب (( وين شدوا العربان )) بين هالاجانب و المقيمين .. وأصحبنا كهنود الحمر في امريكا .. ولكن بقي على الاقل بعض الاشياء التي تدل على تاريخ و تراث هذه المنطقه و منها التسميات القديمه للمناطق.

في هذا الموضوع أو أيضا في المواضيع لاحقه بحاول اركز على تسميه واحده فقط للمناطق لنستخرج الخلاصه و ان شاءالله سبب التسميه الحقيقي.

هور العنز

أين تقع :
تقع في ديره بين الحمريه و الخبيصي .

كيف كانت و كيف أصبحت:

يقولون كانت عباره عن عراقيب و مرتفعات رمليه و فيها الكثير من مزراع النخيل والعزب والحينه اللي يمر عليها يشوفها اصبحت مناطق سكنيه و بنايات و شوارع .

سبب التسميه هور العنز:

أولا الهور في لغة اهل الخليج هي المنطقه المنخفضه التي تقع بين عرقوبين.

الحينه الهور وعرفناه .. لكن سبب تسميه هذا الهور بهور العنز .. هنيه العقده ... وحاولت ابحث عند الشواب ..لنه اساسا ما فيه كتب ولا شيء موثق رسميا عن سبب تسميه هالمناطق ((ليش؟؟مادري)) و كل ما سألت حد من الشواب يعطيني اجابه مختلفه ..حاولت احصر هالاجابات جميعها في ثلاث خيرات .. وأعتقد انه بين أحد هالروايات الجواب الصحيح .. هذا والله أعلم

الروايه الاولى:

يقول الوالد .م.س.ب انه حرمه اسمها رفيعه بنت حريز (( حرمه مشهوره على ايامها)) تقيض في منطقه هور العنز اللي كانت مزارع نخيل كما ذكرت سابقا. وماتت عندها عنزه وحده و سارت و فرتها في الهور .. وقاموا الناس و خذوها كعلامه و كل ما بغوا يسيرون مكان او يدلون عليه قالوا المكان الفلاني شرق هور العنز ..(( وانا فخاطري اقول عنزه ولا موميا ... عنبو ما تحللت ))

الروايه الثانيه :

وحده من عياييز وهي من سكان هور العنز -الله يطول في عمرها- تقول انه هور العنز كان يملكها شخص .. وهور العنز تراها بقعه عوده .. المهم انه بغى يبيعها و يايه واحد و باعها عليه بمجموعه من العنز .. ومجموعه العنز كانت تساوي تقريبا 6 ريالات (( 6 ريالات اول تيب لك ستين الف كندا دراي )).و لصق فيها الاسم.

الروايه الثالثه :

يقولون انه العنز هي خيل .. مربطها كان في هالهور..حد يقول انها مطيعه و حد يقول انه شريه .. وانا اظني انها شريه ولا جان ما سموها العنز

'
'
__DEFINE_LIKE_SHARE__