// .. يبـ ’ ــه .. //

[شموخ طبعي]

// .. يبـ ’ ــه .. //



يبه و انا بعد اثنعـش عام حسيت
اني قدرت اقـول شيٍ كتــمته


ابطى قصيدي ما انكتب فيك و ابطيت
اجر صوتـي و ارجـع اجر صمته


ماودي اكتب بيت و انـدم على بيت
ما هوب شعر الشعر كاني زهمته


الشعر كانه ما انحنى لّي ماجيـت
ان ماعـــزم مرثيتـك ما عزمته


ان ما كتبته بازرق الدمع وابكيـت
كل الجروح المبـطيه ما رحمـته


يبه وانا من بعــدك ابـو التناهيت
ما مر طعمٍ للحـزن مانهــمته


يبــه يبــه كلمه و انا كل ما اوحيت
كلمـة يبـه صديـت و الوقت لمته


يبه يبـه كلمه و انا كم تمـنيت
اهـدم بها و ابـني بها اللي هدمته



يبه و انا لاضقت رحت و تــهجيت
ركون بيـــتٍ ضـم حـلمٍ حلمـته


يومـك تعـلمني الامـن تحاكيت
درس الحـياه اللي كبرت و فهمته


هناك كانت دلـتك لا تقهــويت
و هــناك كان يساق طيبٍ حشمته


و هناك ايه اذكـرني هناك خليت
طفـلٍ ملا بالـدمع دربٍ رسـمته .. !!


هناك جاني علمك انك توفيت
و هناك خاويت الشقا و احتزمتـه


و اليـوم قلت اليوم يومي و مديت
كف القصيد و طاح شعر و نظــمته


لكن بعد صمت اثنعش عام حسيـت
اني عجـزت اقـول شيٍ كتـمـته

قصيده لشاعر (( فهد المساعد)) __DEFINE_LIKE_SHARE__