عًذَرٍآً آنْآ يَآ آلرٍيَآضٍ مًطُوٍّل آلسٌّهٍرٍهٍـٍ ..

[البطة البيضاء]

كل ما سهرت الرياض تقول لأجفاني . .
نام وكن صوتها . . خانقته العبره . . .


الليل ضيفٍ وكاد إنه تقهواني . .
والهم لا دق بابي . . وش هي الدبره . . .

وش حيلتي لاذكرت إنه تناساني . .
وش حيلتي . . لابغيت انساه وانتظره . . .

أقفا وجرحي هنا فاتح له أحضاني . .
وأغفا ودمعي نفد . . من ضيقتي صبره . . .

ما شفته شلون خان وبلل أوجاني . .
و أغرقني إليا اقتنعت . . البُعد له سكره . . .

حبيت و أدري بينساني بينساني . .
وآزريت لا انسى . . بقايا صوته وعطره . . .

عامين واحس بأني فاقد أوطاني . .
وأبحث عن أوطان . . للمنفى وللهجره . . .

من في إلى دفتري والسبه أحزاني . .
من في إلى هامش . . العشاق أو لبكره . . .

الحلم وحده بقى وافي على شاني .
مثلي رماد . . واماني جيته جمره . . .

لو قلت عوّد اخاف يعود يلقاني . .
بيني وبين الوفاة . . أرق من شعره . . .

والموت ما هو غياب إنسان عن ثاني . .
الموت يعني وفاة . . شعور ياطهره . . .

ياليتني لا كتبت حروف يقراني . .
قبل الأمل مايغيب . . ويختفي حبره . . .

كني طفل تايهٍ في وسط وجداني . .
وكن الحزن قش وامال اللقاء إبره . . .

مني وعد يا الرياض إن الله أحياني . .
لأعيش لكن . . بدون احب أو اكره . . .

ما عاد بي حيل هذا الليل أعماني . .
عذراً أنـــا يا الرياض . . مطوّل السهره . . .

أرجوك خلي الحنين يعانق أجفاني . .
والصوت هذا أبد . . لا تخنقه عبره . . . __DEFINE_LIKE_SHARE__