سحاب- وياليتهم في العيد ماعايدونا

[محروم.كوم]

بسم الله صلى الله على محمد
الابذكر الله تطمئن القلوب لااله الا الله وحده لا شريك له

يالله تحييهم جميع كبيركم وصغيركم وذكركم ونثاكم وليا حيا كثر وتنثر وتزبر بعد

وقول للغالين الي جايهم شي في العيد ومضيق صدورهم من قول او عمل اصبرو على غثا بعض الناس وحتسبو الاجر من الرحمن الرحيم
ولا صرتو طيبين والعافيه في اجسامكم ترا هذا اهم شي بالدنيا ونشكرالله عليه


الله يدحر ابليس وعوانه الي صار العيد فيذا الوقت للتشره والمغاير وهذا من عمل الشيطان فجتنبوه
وقول لكل من ضيق صدره في يوم فرحته او اي يوم كان ونكد عليه ابشربالعوض من الحي القيوم سبحانه مايخلي حق احد ابد ابد ومن يعمل مثقال ذره شرن يره ومن يعمل مثقال ذره خيرن يره

الا صار الواحد مصلي فرضه ومرضي ربه
وكاف عن القيل والقال وكاف عن اعراض المسلمين
يبشر بالجنه وهي مبتغانا كلنا وربنا ماخلقنا يضيعنا سبحانه وتعالى

منول يالغالين ايام بيوت الطين من عشرات السنين الاجا يوم العيد وصلينا في مصلا العيد نعايد بعضنا يالي مصلين ثمن نروح نعايد ونبارك للباقين في بيوتهم نجلس يجي ربع ساعه ونعايد ثمن نروح لغيرهم ونعايدهم ولا تسمع الا الدعاوي بالجنه ودعاوي تشرح الصدر
ورغم ان الحيات منول مهنا دنيا نجاهدها مجاهد يعني فقر الا ان الناس يحبون بعضهم ولو يمرض احد يزورونه ويتطمنون عليه وذكر فيه عجوز تعبت جاها مرض وطاحت بفراشها وعندها عيال صغيرين يبي من يراعيهم تدرون وش الي صار
صارو يجونها جيرانهم ويجلسون عندهم من الصبح الين الليل
يطبخون غداهم وعشاهم ويغسلون ملابسهم ترانا منول ماعندنا غسالات للملابس ماعندنا الا الطشت وهو يجي من المعدن وبرتفاع شبر عن الارض وشكله دائري نحط فيه الملابس ونفركهن على يدينا ثمن ننشرهن على الحبل المهم والله يعينا على المهم ويجلسون عند امهم المريضه يوسعون صدرها وكل يوم يقولون لها ماشاء الله عليك يم فلان اليوم وجهك منور وحسن من امس يالله لك الحمد ولوه ماتغيرشي فيها بس ترا بعض الكلام يعالج ومفعوله مثل السحر سبحان الله العظيم
وبن ادم يبي من يشجعه مايبي من يهد حيله بالكلام ويخوفه مثل واحد في شقراء راح يزور مريض في المستشفى ومهديه كفن وشذا الزياره الله لا يعيدها

اما فيذا الوقت تغيرت الحال الا على من رحم ربي سبحانه منيب عام المسلمين كلهم لا والله بس بعظهم
صار العيد مغايرونبي نحط عيد ولا نناديهم ونبيهم يدرون عن عيديتنا ونبي نقهرهم ونبي نعلمهم بمستواهم وقدرهم وهذا شغل بعض الحريم الله يهديهن ولا ياخذهن ويريح المسلمين منهن:f مايدرون ان اكرمكم عند الله اتقاكم بس يغويهم ابليس

وصار العيد بعد بدال مهوب تهاني وفرح صار عند بعض الناس مناسبه للتشره والشرهات وكلام يضيق الصدر وهم عند انفسهم الكاملين والبعير مايشوف عويجا رقبته قصدي مايشوفون التقصير والعيوب الي فيهم
وصدقوني يالغالين ان الامراض النفسيه منتشره بزود فيذا الوقت والسبب قل العباده والتقصير في طاعه رب العالمين


انا والله ضيقوصدري بعض الناس ونا يشهد علي ربي اني كاف وعاف وفي حالي بس مايتركونك بعض الناس في حالك الا ينكدون عليك في يوم عيدك بكلام ولا بفعال ونتم خابرين الشياطين تصير مربطه طول شهر رمضان وتجيب عاد جهدها علشانها توها مفكوكه في يوم العيد

خل اعلمكم بسالفتي ونتم علموني انا مخطي ولا مخطا علي والصدق ماينزعل منه تكفون علموني لا تخلوني

اول يوم في العيد يوم جت الساعه 9 بالمساء جاني اتصال من واحد قريب لي وقرب من ظلالي لي
وقالي تونا بادين نتعشا عيديتنا وعندي ضيوف واجد من حريم ورجال وتوك تجي في بالي :good2:
وبو فلان شب علي يقول اتصل على سحاب خلنا نشوفه ولهين عليه :good2:

ثمن قالي وين عيالك قلت عيالي يتعيدون عند اهلهم
وقالي وراك ماتجيبهم تلحقون على باقي العشاء :good2::f

ورب الكعبه مافيه شي بينا الا اني مرضيه مع اخوانه في قطاعيه 18 سنه تدخلت بينهم وجمعتهم وصارو يواصلون بعضهم يالله لك الحمد


وقلت له مامتنا جوع انا وعيالي الله يهديك وينور قلبك ولوك منتاب غالي عندي ويوم عيد كان عطيتك الرد المناسب بس الي نتركه لله مايضيع وسكرت التلفون


بالله عليكم وش تفهمون منذا الكلام

والله العظيم ان العيد تنكد علي الا اليوم ومخفيكم بعد تراي بكيت الين طاب خاطري وش اسوي غصب علي

هماي اقول في قصيده لي
حاولت اخفي زايد الظيم والباس
بين الضلوع وخايف الناس يدرون

بس الحمل اثقل من طويق بقياس
والهم حمله مثقل الي يحملون


ونشد عن هموم الدهر صاحين داس
ينبيك بسهوم الدهر كيف يسطون

والجرح ون صابك من الناس لاباس
سيف البعيد لوهو صطا غيرمسنون

بس البلا ثم الجلا وزهق الانفاس
لاجت جروحك من حسبنا يحبون

سحاب نجد

ودي والله انها سولافه احسن منذي بس قلت منها نتعلم وخلوها تطلع مني ورتاح ترا الواحد الا فضفض يحس براحه وثقل انشال عنه
وخل اعلمكم يالغالين الا صار في داخلكم شي يقول هذاحلال وهذا حرام - احمدوالله وشكروه ترا هذي نعمه وبشرو بالجنه
ولا سمعتو في داخلكم صوت يقول غيرو السالفه او قومو من المجلس عندما تسمعون النميمه والقيل والقال وعراض المسلمين ترا هذي نعمه ومكرمه من رب العباد عليكم فحمدوه وشكروه سبحانه

فالله الله في صلاتكم هي اهم شي
وفي بر والديكم الي رضا الله من رضاهم
وهتمو في تربيه عيالكم لا تغفلون عنهم وحتسبوالاجر من الله
والباقي خلوه ورا ظهوركم والناس لا يهمونكم ومن طاب لك من الناس طبله ومن يبي الشر اعرض عنه والله الهادي وبس

وفي النهايه مانقول الا
سبحان الله والحمد لله ولا اله الا الله والله اكبر
عدد خلقه وزنه عرشه ومداد كلماته ورضا نفسه

__DEFINE_LIKE_SHARE__