تجربة الصيد في الريف الأمريكي

[محروم.كوم]

بسم الله الرحمن الرحيم
حياكم الله جميعا يا زقرت .. زمان والله يامكشات
مرت 12 سنة على اول مشاركة لي في هذا المنتدى العظيم بأعضائه،
اليوم جايب لكم تقرير عن تجربة خفيفة لي في صيد الطيور في أمريكا
طبعا الصيد في أمريكا مثله مثل غيره من الدول لازم رخصه ومواسم معينه وانواع محدده من الطيور أو الحيوانات
وراح ابينها لكم في هالتقرير ان شاء الله
التقرير راح يكون عن ولاية كالفورنيا ومثل ما تعرفون كل ولاية
في أمريكا تعتبر دولة لحالها من ناحية الانظمة والقوانين

اولا الرخصة:
علشان يسمح لك بالصيد لازم رخصة صيد وعلشان تاخذ هالرخصة
لازم تاخذ دورة عن الصيد وسلامة الصياد (Hunting Education ) مدتها خمس ساعات ثم تجاوب على مئة سؤال
عن هالدورة ورسوم الدورة تقريبا 20 دولار .. والاسئلة عبارة عن خيارات اذا تجاوزت الاختبار تاخذ الرخصة مباشرة

وهذا رابط من ادارة الصيد في الولاية محدد فيه اوقات واماكن انعقاد دورات الصيد

اضغط هنا


ثانياً:
اجتزنا دورة الصيد وحصلنا على الرخصة والتي بموجبها يمكنك صيد كل شي من طيور او حيوانات
، وعلى حسب كلام مشرفي الدورة فإنهذه الرخصة
يمكن استخدامها في جميع الولايات وهي غير محددة الصلاحية يعني طول العمر،
اللحين وش خاطرك فيه ؟ بط حمام حجل غزلان دببه؟ كل شي مسموح
دولارك يخدمك،
طبعا كل شي له موسم معين . نقول مثلا خاطرك بحجل وقميري ؟ ما عليك الا تعرف متى موسمها يبدا وتروح تشتري
رخصتها.
كيف تشري رخصة الحيوان اللي تبي تصيده؟ امرها سهل مر اقرب
فرع لادارة الصيد حولك، وغالباً في كل مدينة يوجد فرع
وعلشان تعرف اقرب فرع ادخل على هالرابط
اضغط هنا

واسعار الرخص مقبولة.. وطبعا تقدر تستخدمها اكثر من مرة ولها فترة معينه تقريبا 9 شهور

ثالثا: مكان الصيد
هنا انت بالخيار تبي تروح لحالك تدور وتصيد او انك تدور لك ناس يريحونك؟
انا مع الخيار الثاني لانه يبي يفكك من اشياء كثيرة من أهمها السلاح يعني بدل
ما تشري سلاح وتبلش فيه اذا رجعت للسعودية..
فيه ناس متخصصين وشركات عملها قائم على الصيد
يعني ما عليك الا تتصل عليهم وتحجز موعد وهم يعطونك السلاح
وكلاب الصيد اذا تحتاج ويدخلونك لمزارع خاصة تمرها الطيور المهاجرة وينظفون صيدك
يعني شغل مرتب صراحة .. وحط باعتبارك ان كثير من الشركات
ما ترد عليك اذا ما معك رخصة صيد ورخصة حيوان.

خلصنا من المقدمة الطويييييلة واللحين جينا للتقرير المصور لرحلتي الاسبوع الماضي لصيد
الحجل ونوع من انواع السمان بالاضافة إلى طائر اسمه (Pheasant)
المكان كان جنوب لوس انجلس يبعد عنها ساعة تقريبا عبارة عن مزرعة خاصة
وكان الجو على كيفك وضباب خلنا ننتظر لين خف شوي
ما قصروا الزقرت سلموني بندق بنلي وطلع معي معاون معه كلبه
وحقيقه هالكلب غير فكرتي تماما عن كلاب الصيد ، وكان مدرب باحتراف وعجيب والله
اذا شم الطير يوقف عند الشجرة ويأشر برجله لين يطير ثم ترميه، واذا طاح الطير بعيد يجيبه لك.

هذا الضباب وكانت الحرارة اقل من 20 درجة




بعد ما انقشع الضباب وزانت الامور



المكتب اللي تجمعوا فيه الصيادين



اول خير احد انواع السمان




وهذا اسمه (Pheasant) ما ادري وش يسمى بالعربي







الامور طيبه ودرجة الحرارة ممتازة

وهذي حصيلتنا من الطيور بركة لا افراط ولا تفريط ثلاث سمانات وحجلتين بالاضافة إلى حبتين Pheasant



وزي ما قلت لكم دولارك يخدمك وهنا نظفوا الطيور وغلفوها شغل مرتب ونظيف
الطير ب 3 دولار






وهنا جا الطبخ والنفخ








ولمشاهدة مقاطع فديو من رحلتي ادخل على رابط
اليوتيوب


عذرا على الاطالة وعدم جودة الصور كلها بالجوال
لكن حبيت انقل لكم التجربة
وان شاء الله يستفيد منها اخواني المبتعثين
ملاحظة: موسم القميري هنا يبدا في 8 نوفمبر يعني بعد اقل من شهر
يمديكم ان شاء الله

دمتم بود

__DEFINE_LIKE_SHARE__