سالفة:شهامة الاصدقاء..قوافي

[محروم.كوم]

أسعد الله صباحكم/ مسائكم بكل خير

كان فيه رجال عليه دين 600 ريال يوم الريال عن 100 وصاحب المال مهدده بأنه يسد الدين او يشكيه للأماره..

الرجال ما يدري وين يروح او يطلب من من يدينه القروش لين يفرجه الله ويسده..

وتذكر واحد من اصدقاه عنده حلال ويمكن يقدر يساعده لو بنص المبلغ ولكن هذا بديره ثانيه ويبيله سفر وهذي لحاله كلافه ..

فحاول يجمع من الاهل والاصدقاء القريبين ويالله يالله قدر يجمع 200 ريال ،،وقرر يروح لرفيقه ..

وصل عنده وطق الباب ويافلان،، ابو فلان،،فتح الباب راعي البيت وهلا ورحب وطلب منه يتفضل ودخل الرجال المجلس لكنه لا حظ لا ريحة قهوه ولا شاهي والمجلس كأن له مده ماطبه احد..

نشد رفيقه وش الاخبار والعلوم وهو مايدري يطلب او لا لأنه شك ان فيه شي من هيئة المجلس وهو معروف قهوته دايم والمه ومجلسه ما يفضى!!

رد راعي البيت بان الحال مب هاك الزود وانه خسر حلاله كله ومعظم تجارته وراكبه الدين ،،وحتى بيته باعه اللي هو فيه وبتنتهي المده اللي سامحن له المالك الجديد وهو مامعه شي يستاجر وقروش البيت راحت للديانه والين الحين مديون..

الرجال انصفق وجهه ان صديقه محتاج وهو محتاج وال200 اللي جمع ماتنفعه بشي لكن تنفع صديقه بآجار بيت..

عطاه القروش ولا قال انه جاي يتداين منه ومشى لديرته ودبر نفسه وتسلف منا ومنا شي ربا وشي دين لين جمع ال600 وعطاه لراعي المال..

راحت سنين وجت سنين وتوفى الرجال وولده ماتعلم وشغله على قده وماهنا زود..

الرجال اللي اخذ ال200 مشت الدنيا معه من جديد ورجع حاله كما كان وألين عنده واحد من عياله يشتغل بالأماره اللي بنفس ديرة الرجال اللي عطى ابوه ال200 واللي توفى وما خلف إلا هالولد اللي على قد حاله..

بيوم جا الولد يقول لأبوه ان من كم يوم جا واحد للأماره شاكيه واحد يبي منه قروش وانه شاب والنعم فيه لكن داقه الفقر ورحمته واسمه فلان ابن فلان ،،يوم نقز الابو ونفض ايده من الرز وقال:

قم قم هذا فلان ولد فلان !! وينه؟؟

قال الولد:اكيد ابيته وين بيروح ؟؟

رد الابو مشينا الحين ..

راحو واول شي سواه راح للرجال اللي شاكيه وسد الدين همن راح للولد وعرّفه عن نفسه وقاله ان ابوه عطاه وهو محتاج وانه عرف بالصدفه انه كان مديون وانه فضله عن نفسه وماجزى المعروف إلا المعروف وطلب من الولد انه يجي ويشتغل عنده ومن يومه وهو معه بتجارته ولا احتاج احد بفضل رب العالمين ثم بفضل الرجال اللي رد المعروف ولو انه كان بسيط لكن بوقته كان شي كبير ..

تحياتي وتقديري واحترامي

__DEFINE_LIKE_SHARE__