قصتي .. قصة اخوكم عاشق المطراش من الولادة...

[محروم.كوم]

بسم الله الرحمن الرحيم
الحمدلله والصلاة والسلام على اشرف الانبياء والمرسلين ..
اكتب قصتي ودمعي ينهال على خدي بعد فراق والدتي ، والدتي متزوجه من والدي واخذت عندة سنوات طوال ولم يرزقوا بابن وبعدما سئم والدي طول الانتظار قرر الزواج من زوجه ثانيه بحثا عن الابناء وقررت والدتي ان تزف له الزوجة الثانيه بنفسها .. وفعلا فعلت ماارادت ادخلته عليها بنفسها ورقصة بليلة الزواج وهي تكتوي بالالم .. وبعد بفتره قرر الاطباء احالة والدتي الى مستشفى الملك فيصل التخصصي بالرياض وكان المستشفى قد افتتح قريبا وكان في عام 1405 للهجره .. حيث ان والدتي كانت كلما يكون الجنين ذكرا يموت قبل الولاده ولم يستطيعوا معرفة السبب وبعد 4 بطون اي 4 مرات اللي يموت في بطنها الجنين حتى انه في احد المرات ظل شهرا وهو ميت ولم تعلم عنه .. المهم احالوها للتخصصي بعد زواج والدي من المرأة الجديده واخذت العلاج اللازم وحملت (بي) "وكان قبل 6 بنات و4 اجنه ذكور قد ماتوا وبنت واحد ماتت بسبب مرض "وتابعت بالمواعيد والمراجعات والاشعه حتى الولادة ،وعندما حانت الولادة عادوا الى الرياض بتاريخ حدده لها المستشفى ووصلوا الى الرياض في ساعه متأخرة من الليل وباتوا ليلتهم عند اقرباء لنا في الرياض قبل الفجر نامت والدتي من شدت التعب وهي جالسة ومتكئة على مركتها لان الولاده قد بدأت تشتد الامها ورأت رؤيا ووصفتها لي رحمها الله .. واصفها لكم على لسانه : تقول : "حلمت انني جالسة على سرير والا الامير سعود الفيصل واقف قدامي وابوك ( اي والدي) واقف وراه والامير يحاول يرمي لي قلم وابوك ماسكه ومعقب ايدينه ورا ( يعني مقيده ) والامير يحاول المهم الامير قدر يرمي لي القلم واخذته وقمت اكتب به وانا مااعرف اكتب - انتهت الرؤيا" وصحت والدتي من النوم وقامت بحدود الساعه 6:30 صباح يوم الاربعاءوولدتني في حدود الساعه11قبل الظهر تقريبا .. فرحت والدتي كانت لاتوصف ومن حولها فروحوا فرحا منهم من يبكي من شدة الفرح ومنهم من نذر نذرا لوجه الله ،، :: مع العلم ان زوجة والدي قد انجبت ولدا يكبرني بيومين فقط:: ...
ذهبت الايام والسنين وانا اكبر في حضن والدتي وبين اخواتي ووالدي بعيد عني لم احس به وانا طفل الا وكأنه شخص يدخل علينا بكل قوه وجفاءيصرخ وينهر لا يعجبه صنيع والدتي ولا ااخواتي السته يأتي ياكل وينام ويستيقظ ويمشي يحكمنا بالخوف وترك في نفوسنا شئ يصعب نسيانه .. وعندما كنت صغيرا لا اعرفه انظر اليه بنظرات استغراب واصيح اذا اقترب من امي ( هو لايضرب وانما يخيف) واصوت له باسم زوجته لانني مااعرفه جيدا ...
سألت والدتي عن والدي كيف كان في قبل زواجه قالت: والله انه رجال يستحي ويقدر الناس وماكان كذا لكن من جته قلبت صرعه ( اي تغير بكل شئ) ..
عشنا سنوات طويله ونحن يتخلل في نفوسنا الخوف .... كبرنا ودخلت المدرسة ووالله انني اذكر اول يوم ادخل فيه المدرسة ووالدتي معي لتوصلني لباب المدرسة وتعود للبيت ووقت الخروج تقف عند الباب تنتظرني .. ايام وسنوات ستبقى في ذاكرتي منقوشةً .. حرص والدتي علي كان شئ لايمكن وصفه وخوفها علي كبير جدا .. (( لكن بغض زوجة والدي لي ولاخواتي كان كبيرا جدا )) .. انجبت من والدي في ذالك الوقت ثلاثة ابناء .. وانا واحد لوالدتي .. بدأنا في مرحلة المراهقة وكثرت مشاكل اخواني تتوالي على والدي واحده تتلو الاخرى سرقات ومضاربات ومشاكل ليست بالكثيرة جدا .. وانا عند والدتي جالس في حصنها تعلمني هذا حرام وهذا مايصير وهذا غلط .. انتهيت من الثانويه وجبت نسبة لابأس بها تدخلني كلية المعلمين .. سجلت وقبلت وبدأت الدراسة ووكانت والدتي تلازمني تعطيني مااحتاج واختي اشترت لي سيارة رغم الرفض القاطع من والدي - سامحه الله - ولكن كان شئ لابد منه ،، غضب علي غضبا شديدا كان يريد المكافأة وكان لايصرف علي الا فسحة المدرسة كان يعطيني 10 ريالات في الاسبوع لكل يوم ريالان وعندما وصلت للمرحلة الثانوية قطعها عني .. المهم حاول زعل هاوش عمك اصمخ مااعدي اسمع شي .. رسبت في المستوى الثالث بمادة الكيمياء وعندما علم والدي ضحك بفرح وكانت مناخرة تتسع .. احسست بشئ لايمكن وصفه تحطمت وحقدت عليه وعلى اخواني ، سبحان الله في السنه اللي تليها دخل واحد من اخواني بالكلية ومن اول مستوى رسب بثلاث مواد وكان والدي متضايق ، حينها فرحت فرحا شديدا ( الله يسامحني ) تخرجت من الكلية بمعدل 3:25 بنقدير جيد... والدتي من شدت الفرح قررت تسوي لي حفلة وتعزم عليها الاقارب .. بعد التخرج حصلت لي وظيفة مؤقته على ملاك شركة براتب (1500) جلست فيها سنة كاملة .. قرر والدي ان يزوج اخوي اصغر مني بسنتين لانه قد تخرج عسكري وكان ناوي يزوجه لحاله .. ضغطت والدتي على والدي ان يزوجني مع اخوي وحاولت معه مرات ومرات حتى اقتنع ، كانت نظرته لي انني ممكن ماراح اكون رجل .. كنت رافض الفكرة جملةً وتفصيلاً .. بعدما اقتنع الوالد قالت اختي انا ابني لك شقه فوق بيتها اللي حنا بالاصل ساكنين عندها انا ووالدتي واخواتي .. وزوجة والدي واخواني في بيت الوالد... قال: ابوي انا ادفع لكم المهر ، لحظتها انصدمت صدمه قويه مستحيل ابوي يدفع .. خطبوا لي بنت خالتي ووافقت على طول وكانت بنت ذات دين وخلق وجمال حسب ماوصلني عنها .. واللي خلاني اواقف عليها كلمة امي قالت لي :" ياولدي ابي بنت اختي ابيها ترحمني".
تزوجتها وانا ماشفتها الا بليلة الدخلة اعجبتني فرضيت بها واحببتها من كل قلبي واخلصت في حبي لها .. وكان اخلاصي الزائد سببا في طلاقنا .. سبحان الله من ملكت عليها جاني ترسيم في وظيفتي وصار راتبي 3355 ريال .. وقبل الزواج بأسبوع جاني تعيين بالتعليم ويصير راتبي 4650 ريال .. الله اكبر فرحت وفرحت والدتي فرحا شديدا .. جاء التعيين قررت ان اكون بعيدا عن مدينتي اي ابتعد عن والديواعيش مرتاحا وانسى مامضى .. وفعلا ابتعدت وذهبت الى مدينة زوجته ووالدتي معي سكنا فيها .. وبدأت اولى المشاكل مع والدي يريد نصف الراتب يتصل علي وهو يصرخ بأعلى صوووت يا يا يا .. الله يعين وهذا انا بعد مبتعد عنه لحقنا وحاسنا اعطيته مايريد وذهب .. واذا بسوء التفاهم مع زوجتى قد بدأ واخذت تكره وجود والدتي معنا .. ويوم بعد يوم واذا بوالدي يتصل على اخوان زوجتي ويقلبهم علي سأءت الامور الى اني طردتها الى اهلها وكانت حامل بالشهر الاول جلست لمدة اسبوع تقريبا .. واتصلت عليها واشتد النقاش بيننا واقفلت السماعه غصبت وبكت سمعها اخوانها وغضبوا وجائوني مسرعين الى شقتي وهم يضرب الباب حتى كادوا ان يكسرونه .. وانا ووالدتي جالسين فتحت الباب واذا بالشرار يتطاير باعينهم .. ليش تزعلها ليش تبكيها .. في بداية الامر كنت شديدا في ردودي حتى تماسكنا وبغينا نتصارب واذا بوالدتي تقف بيننا وهي تصرخ وتصيح خفت عليها .. فجلست وكان يهدد واخوه الثاني يؤيده وسلاحة بجيبه ليخيفني اخذت اضحك في وضع لا يجد فيه الضحك .. تركته حتى خرج واذا به يهدد ياويلك اذا مالحقتني وتعذرت منه قلت له وانا استهزء به ا:: ابشر انا وراك اللحين .. ومن طلع واتصل على 999 شخص تهجم علي وهو مسلح .. قدمت البلاغ وكان شديد اللهجه وقوي في الكلمات .. المهم الرجال اختبأ انخرع وهج ووراه ياما جبته ( مع العلم كان باستطاعته يجحد كل شي لكن الذله بنت حلال) جابوه الشرطه وهو مكلبش ومنزل راسه .. جلسنا عند الضابط المحقق وكنت ناوي اذبحه وهو بالمخفر وكان بجيبي خنجر وكنت فاتحه ومتجهز .. مبيت النيه .. المهم سأله الضابط قال ليش كل هالسوالف وليش تسوي كذا قال : مجرد تخويف انا ضحكت . وقلت للضابط ابيها تاصل للمحكمه وانا ماني متنازل .. وطلعت ورحت للمحكمه وطلقت زوجتي لان طابت النفس منها خلاص : باب يجيك منه ريح سده واستريح : .. طلقتها وبعدين تنازلت عنهم وخليتهم وابتعدت .. هاللحين تزوجت من وحده ثانيه ومشت اموري .. المهم زوجتي كانت حامل يوم طلاقها وماكان عندي علم هل الحمل موجود والا لا وماكان في اي سبيل لي علشان اعرف .. ((واخو زوجتي بعد ماطلقت اخته طلق اختي ))..

جاء وقت الولاده واذا بالمستشفى يتصل علي انت فلان قلت ايه : قال تعال استلم ولدك امه ًرفضت تستلمه .. الخبر نزل علي كالصاعقه ولدته وخرجت من المستشفى وتركته ولا شافته خير شر ..(( لاحول ولا قوة الا بالله)) مع انها امرأة حافظة لكتاب الله ومحافظة جدا جدا .. لكني لقيت اخوها اللي تهاوشت معاه هو اللي ماشي بالسالفه .. اخذت ولدي لامي وانا حزين ياربي في بشر تسوي كذا في اوادم كذا لا مستحيل .. قامت امي بالتربية وعاش بحضنها وصار هو كل شي عندها هو حياتها والتهت معاه وصارت له احسن من امه .. وربته وكبر ولدي عندها وجلست معاه 4سنوات وكان اسمه ( عبدالله ) وسبحان الله ولدي احن مني لامي يحبها حب عجيب وماشاالله عقله سابق عمره .. ورزقني ربي من زوجتي الثانية ولدان واحد اسمه ( عبدالعزيز ) والثاني ( سعود) واكتملت المعادلة اللي كنت احلم بها وهو اسم الملك عبدالله بن عبدالعزيز ال سعود ..:( شي كنت اتمناه وفعلا صار )) ::.. الحمدلله مارزقني ربي .. عاش عبدالله بحضن جدته ومع اخوانه ياكل ويشرب ولم يرى امه نهائيا ولايعرف عنها شي الا اسمها فقط ... ولم تفكر ان تراه نهائيا ولم يأتني احد يقول انه تبيه .. مرضت والدتي قبل 6 اشهر اي بشهر 5 لعام 1435 ه. وبعد كشوفات ومحاولات كثيره طلع عندها سرطان بالمبيض والمرض في مراحل متقدمه .. سبحان اللله كلما كان يكشف عليها الاطباء ومايلقون شي كانت تقول لي : ياولدي العليل ابخص من الطبيب) وانا اقول لها يايمه والله انشالله مابك الا العافيه .. نزل الخبر علي كالصاعقه .. اركض في المستشفى ولاني عارف وش اسوي مثل اللي مضيع له ولد .. طرنا للرياض واحاول بالمستشفيات ابي ادخلها باسرع وقت..... المهم بعد اكتشاف المرص ياسبوعين دخلتها مستشفى الملك فيصل التخصصي وجلست في شهرين وعليها كم يوم حاول الاطباء وماااستطاعوا قالوا لي خذها للبيت وخلها ياما الله ياخذ امانته منها .. حزنت وبكيت كالاطفال والهم في صدري شي والله لايوصف .. فكرت اوديها للخارج بس التكلفه ماني حولها .. رجعت للديره جلست بالبيت حول الاسبوع ودخلناها المستشفى في منتصف شهر شعبان .. وظلت في المستشفى حتى توفيت بشهر شوال .. قبل وفاتها بثلاث ايام تعبت حالتها وصارت الرئتين ماتغذي الجسم بالاكسجين .. قرر الاطباء ادخالها العناية المركزه رحت معاهم للعنايه وكانت الله يرحمها .. تردد ياربي ياربي من شدة ضيقة النفس .. وتاخذ قناع الاكسجين وترميه وانا احاول اقنعها ..ماترميها يايمه تكفين ياميتي ماهي قادره انفجرت لحظة الموقف ، وخرجت ابكي وابكي ومشيت من المستشفى وتتصل علي اختي وتقول امي تصوت لك تبيك .. رجعت بسرعه ووقفت قدامها واقول ( هاه يمه وش عندك يمه تسمعيني يمه تبين تقولين شي ، ماترد..يمه تشوفيني يمه اذا تشوفيني غمضي عيونك غمضت وعرفت انها ماهي قادرة تتكلم .. وتشجعت ومسكت نفسي وقلت : يايمه قولي لااله الا الله . ومن قلتها وتقوم ترد لااله الا الله 3 مرات وانا اسمعها وقفت عندها شوي واستأذنتها وقبلت يدها وقلت لها بكره انشالله اجي بالزيارة )) وطلعت منها الساعه9 مساءا .. والساعه 10 انتكست حالتها وحطوا لها جهاز التنفس الصناعي .. وبعد ثلاث ايام توفيت ،!!!!! والحمدلله على كل حال .. اكتبها لكم والدمع يسيل من عيناي والحزن قد فطر قلبي وهم لا يعلم به الا من مر به ..




الشئ الذي لم اكتبه هو ان والدي طلق والدتي وسبحان الله طلقها في يوم دخولها للمستشفى ويوم اكتشاف مرضها ...... ( سامحه الله )

تسامح والدي من والدتي وسامحته وقالت لاختي ( انا مسامحه كل الناس اولهم شايبي بس ام عبدالله ( اي ام ولدي التي طلقتها ) قالت الله يحرمها رائحة الجنة)
__DEFINE_LIKE_SHARE__