قصة وقصيدة من اسدهم

[محروم.كوم]

بسم الله صلى الله على محمد
------
الابذكرالله تطمئن القلوب لا اله الا الله وحده لا شريك له
------
اللهم اتنا في الدنيا حسنه وفي الاخره حسنه وقنا عذاب النار
اللهم اشفي مرضانا ورحم موتانا وقظي الدين عن المدينين
اللهم اني اسئلك ان تجعل قبورمن في القبورمن والدينا وااخواننا وحبايبنا روضه من رياض الجنه
اللهم لا تكلنا على انفسنا طرفه عين
اللهم اعنا على انفسنا فهي اماره بالسؤ
ربي ياخالقي ومدبر امري احببني فيمن احببت ولا تخرجني من الدنيا الا وانت راضي عني
--------
فيه هكا الواحد والواحد الله في سماه العالي وكل ابليس مخزيه الله
-------
اذكر سنه من السنين الموبطيات حكم على واحد في شقراء انهم ينطلونه من على مناره مسجد شيحان الي في شارع فيصل بس هلحين مهيب فيه هدمها البصيلي وربعه وذا الكلام قبل لا يجي شارع فيصل كان للمسجد مناره رفييييعه والرجال الي يبي ينطل مهوب من اهل شقراء يعني من القرى القريبه الي حول شقراء مدري وشو مخالف به - انا والله ادري وشو مسوي بس جعله للجنه -
المهم يوم اجتمعو الناس وعيونهم تناظر في علو المناره يحترون جدعه الرجال من عليها وهم يسمعون الي يقراعلى الناس السوات الي هو مسويها واانه فعل كذ وكذا وكذا وحكم عليه بالقتل ورجمه من علو مناره مسجد شيحان علشانها متوسط الديره ومنارته رفيعه
وقبل لا يجدعونه بشوي قال رجال من اهل شقراء انا شريته وحولوه وخذو دراهمكم الي تبون يوم الناس سمعو كلام الرجال يوم سكتو وجلسو يوصوصون بينهم هذا فلان شرا رقبه الي محكوم عليه بالقتل والله ويحولون الرجال الي يبي يجدعونه ثمن قالو نبي ننشد الشيخ والظاهر انه البواردي جعله للجنه وراحو رجال البواردي وسئلوه قالو فلان شرا رقبه الي يبي يقتل وقالهم الشيخ عن القيمه وراحو وسلمو الي يبي يقتل للي شاريه والي شاريه سلم دراهمه كلها طبعن يصير عبد للي شاريه ولاكن قاله يفلان اعتقتك لوجه الله انت حر الناس منول يدورون الاجر من الله سبحانه ومنول يصلون تالي الليل ويصلون الضحى ويكثرون من الاستغفار وربي معطيهم سبحانه ولا قد فقد المطر الا دخل الوسم الا قالو بكرا دخول الوسم امطرت الليله لا اله الا انت ماارحمك ياحي ياقيوم يانور السموات والارض

وذكر فيه تينه للطبيب شده على اليا ماعرفت اسويها ذا الشده
المهم اذكر للطبيب تينه في الحميديه وهي عند المقصوره الثانيه هما عند نقبه القراين مقصوره الي في الزاويه هذي الي عنها غرب مقابله للمستشفى وعندها اذكر باب صغير بعد يطلع على شعيب الغدير مقابل المخر الي هلحين موجود وش زينه تقول الي مسويه اكبر المهندسين روحو وشوفوه ماتغير فيه ولا حصات وعمره اكبر من 100 سنه وللعلم تراه فقط حجاره مرصوصه وليس بينها شي يمسكها في بعضها مثل اسمنت ولا غيره والي كان موجود منول شي كنه سميت بس مهوب سميت يسمونه نوره ولازم يشبون عليه ضو وتجهيزه غثا بعد و في هذا التعجب حصا مركب فوق بعضه بطرق هندسيه معقده ليس بينها ماده للتماسك بين الحجاره وهذا شي يجب التفكير فيه فمنه العجب ولم يتغير رغم الامطار الجارفه العظيمه التي مرت عليه ولم يتغير حجر واحد عن مكانه سبحانك عدد السنين والوحساب

وفيه شي ابا اعلمكم به ونتم ابخص مني انتم دارين ان فيه شعيب يجري تحت شعيب وادي الغدير شوفوبس العبقريه -
فيه شعيب طال عمركم يجي من الصفراء الغربيه الجنوبيه ويسمونه اهل شقراء شعيبه الحمير وتراها قبلها تجي جيده وتسيل مسايلها
تجي طال عمركم شعيبه الحمير من الصفراء وتدخل من تحت الحديقه العامه الي كانت قبل لا تجي حديقه كلها معاشيش لحوج وبعض البدو وبعض الخيام التي يقطنها الملاح بنوصليب الملاح خلدا وعشبه كاانهن البدرو يوم لاح -واابعدهموابن معمري ابو خالدن لحفرالباطني ثم استراح وحرم المحبين من المزاح
ههههههههههههه المهم ماعلينا بس شعيبه الحمير هذي يالغالين قبلها تجي وتسيل ولا جت تجي قويه المهم الا دخلت الحديقه العامه هلحين تجي من جنوب غرب ومسوين لها الاولين مجرا تحت مجرا وادي الغدير تقص الغدير قص من تحت وتصب في الحميديه شوفو جعلهم للفردوس كلهم وشلون حلوها ولوه غيرهم خلاها تصب في الغدير وستراحو
المهم والله يعينا على المهم قبلهم يستدلون العويد بدخول الوسم على تينه الطبيب هي الحكم يجون طال عمركم الا صارو مختلفين الي يقول الوسم داخل من يومين والي يقول مابعد دخل الوسم يجون للتينه ويكسرون غصن منها ان صب عليهم سايل مثل الحليب قالو داخل الوسم ون اكسروه ولا صب شي فهو مابعد دخل الوسم
مهمب هوينين الاولين كلش له علامه تثبته وسبحانك ربي تصدقون ان الوسم يدخل بالدقايق قولو ليش اعلمكم فيه شياب اختلفو في دخول الوسم وهم شياب ومن اهل ثرمداء وترا الي معلمني واحد منهم جعله للجنه والله العظيم اني صادق المهم قبل صلاه العصر قالو رجاجيل داخل الوسم البارح قال الشايب مابعد دخل الوسم وروحو وكسرو غصن من تينه فلان هلحين وجيبوه معكم والله وراحو وكسرو غصن من التينه وذا الكلام في ثرمداء المهم يوم جابو الغصن خذه الشايب الي يبخص وكسره ولاه ناشف مافيه شي سايل ابد المهم اذن العصر ويوم طلعو من المسجد قال الشايب يافلان انت وفلان روحو جيبوغصن من تينه فلان هلحين والله يوم جابوها ولاها تسيل بسايل مثل الحليب قال الشايب هلحين دخل الوسم سبحان الله الشياب منول يبخصون وفيهم ذكاء ومعرفه بدخول الوسم ومتا يزرعون الخظار ومتا يغرسون النخل ومتا يقلعونه كلش له وقت ولو تسوي شي في غير وقته ماينبت زين ولا مانبت مره وحده ولا ينبت الا ثيل ولزاق ذاك الي قبله ينغز رجلينا وينشب في الثياب وصراويلنا بعد ويعرفون متا يكثرون الماء على الغرس ومتا يقللونه كلش بميزان سبحانك ربي

خل اعلمكم بشي والله العظيم اني صادق
انتم تخبرون منول مهنا مكاين تطلع الما من القلبان مابعد صنعن ولا كان فيه الا الصدر يعني السواني يعني يطلعون الماء بالبعارين ولا بالحمير ولا بالبقر والمحال او الدراج انتم خابرين انه معلق بين الزرانيق يحصل بعض الاحيان وينفصخ الرشاء يعني الحبل من المحاله او الدراج تدرون من الي يركب الرشا في المحاله الا انفصخ وكلامي هذا في ثرمداء يركب الرشاء في المحاله او الدراج رجالن اعما ونشدو شياب ثرمدا الي من ثمانين سنه وفوق ويعلمونكم سبحانك ربي لا اله الا انت رجال وعما يرقا فوق الزرانيق ثمن يزحف على جذع النخله الي شايله المحال الين ياصل المحال ويتلمس الين يمسك الرشا ويركبه في المحال ثمن يزحف على حيله الين ياصل الزرنوق ويحول سبحان من ياخذ شي ويعطي اشياء لا اله الا هو وحده لا شريك له

اقول قولو امين كلكم يالي تقرون الله يجعلكم من اهل الفردوس ووالديكم وحبايبكم ووالدي والمسلمين اجمعين

وكملت ودملت وركبت حميرها وشنقلت
---------

وهذي قصيده لي للي يحب القصيد منكم
----------

بسم الله الرحمن الرحيم

هذي قصيده لي شايلها الغالي وميض الصاعقه

هـمٍّ بقلــبي لو قسمتــه عــلـى الـناس
تسمــع جمـيــع الناس مـنـّه يصيحون
لابـاس ما صـابــك مــن الهـــم لا باس
و اصبر كما يصبر على الحبس مسجون
الخلــق ضايـق و الحشا صايــرٍ كاس
يجمع مرار الوقت ويسقيني بالهــون
يا الله يا منــزل من الحــق نــبـــراس
تضوي بها دروبٍ بها الناس يمشون
يا خالقٍ هالـكـــون كـلــه على ساس
يا منفــذٍ امــرك من الــكاف لـلنــون
ترحم سحاب اللي من الضيق محـتاس
ودمــوع عيـنــه من سببها يهلــون
حاولــت أخـفّـي زايد الضيـم والباس
بين الضلــوع و خايف الناس يدرون
بس الحمل أثقل من طـويـق بقـياس
والهــم حملــه مثـقــل الـلي يحملون
و انشد عن هموم الدهـر صاحيـن داس
ينبيك بسهــوم الدهـر كيـف يسطـون
والجرح و ان صابك من الناس لا باس
سيف البعيد لو هو سطا غير مسنون
بس البــلا ثـم الجــلا وزهق الانفاس
لا خانــك الــي تحبــه حــب بجـنـون

منقول __DEFINE_LIKE_SHARE__