جمس 78 وجمس 83 مسافر عليها

[محروم.كوم]

السلام عليكم ورحمه الله وبركاته

كيف الحال يانشامى وش حالكم بعد هالغيبه


طالت عماركم عندي سالفه خفيفه وان شاءلله انها طريفه وتعجبكم

انا رجال مولع بالجمس الكلاسيك ومن صغري وانا اعشقها والوالد الله يطول بعمره كان عنده 78 رفرف بيج 350 زرقاء دنقل بدون دبل وخلاه يوقف كم من سنه تحت الظلال ويوم جمعت لي كم قرش مبروك عزمت على الموتر واسحبه لاقرب ميكانيكي عندنا معروف ويشتغل بالامريكي وانسوي له تصفيه وانركب فيه كريبتر جديد اصلي وقطع استهلاكيه وغسيل رديتر ويوم رجع للحياه من جديد ماشاءلله تبارك الله واركب فيه كفرات بالون جدد واجهزه ناوي عليه نيه ولي اخ اصغر مني توه شاري له مصفح 83 احمردبل مكينه 350 ونوينا نكشت عليها يم هالديار الشماليه من الحساء الى ماورا النعيريه وانرتب مواترنا من زيت وبنزين ونقل بعض العفش وانتوكل على الله مع برد الشتاء يوم خميس صبح صبح :good2: وانشغلها ونمسك طريق سوق البل الحساء ونسرح معه لين ماجينا لفه الصناعيه على اليمنى وانخليها وانتعداها ونتعدى الكبري اللي وراها مع سريع الدمام وارتفع بنا الخط اشوي ثم حولنا على كبري قز التراب والله ونعطيها مافيها وموتري اسرع من المصفح لانه دنقل وكارونته حقت 454 حجم 14 /45 وهي معروفه بالمشى وراحه المكينه وثم وقفنا عند المحطه اول وحده على يمين الخط ناخذ بعض لوازم الرحلات وانعبي بعض الكفرات ونمشي والساعه على 8:30 ونمشي ممشى خطير حتى المصفح تحول 454 هههههه المهم وصلنا شدقم وجو ام عنيق وهاك الديار اللي على طريق النمر يعني نمره 1 ونمره 2 وانت ماشي فوق المهم المصفح دخن شكمانه اسود ووقف راعيه على الطريق وخففت من سرعه الجمس الرفرف وارجع لرفيقي وقال الموتر تعطل ويوم فتحنا الكبوت حصلنا البنزين كله طافح على ظهر المكينه يعني يدل على عوامه الكربيتر انها خربانه وهي اكثر العذاريب فالجمس الكلاسيك المهم وش الحل يمين يسار قلنا انخليه ونرجع له بعدين وقلنا الموتر محمل عفش يعني دور لنا حل ثاني المهم قال اخي نسحبه قلت وين نسحبه قال لي اقرب ديره لنا امتالع وهي تبعد حول 70 او 80 كيلو يعني مشوار ماهو بهين وانت ساحب موتر المهم طلعنا السير القوي حق السيارات ونقلص المصفح في موتري ذيبان ال 78 ونسحبه بعفشه واغراضه يوم سحبناه كانت الساعه 10:30 وانتوكل على الله لين ماجات الساعه 01:30 وحن ندخل في ديره امتالع وانروح صوب ورشه كلها امريكيات ووالله وانعين اللي نبي قال الرجال خلوه وتعالو العصر وتلقونه جاهز بأذن الله وانخليه ونركب على بليهان البيج وانروح صوب وحده من الاستراحات وانريح فيها وانتغدى وانعين من الله خير وانهجد عقب مشوار طوويل ويوم جاء العصر انصلي الظهر والعصر معا لان حن مسافرين والنشاط فل بعد الهجده اتقول ارانب ماشاءلله ههههههههههههه واندق سلف بليهان وانروح للورشه ونلقى المصفح جاهز شعلومك ياولد قال موتركم جاهز صلحت العوامه ونضفت الصفايه حقت الكربيتر والموتر الحين ممتاز ونعطيه قروشه 150 ونمشي والله ان صوتها يطرب ماشاءلله واندوس لها متوجهين للنعيريه وفي الطريق صادفنا راعي جمس مسافر ويبي يجاكر واعلق معه اشوي على اساس نقطع المسافه اشوي ويروح موتره علي لانه 454 صافي لكن الصدام فالصدام وبعد خففت وانتضرت رفيقي يقرب ونمشي ممشى معقول ومن ثم وصلنا الى معاناه كل راعي جمس يوم جينا نقطه التفتيش صفطونا على جمب قالو افتحو البانه وفتحناها ثم سأل هل هي 454 قلنا لا كلها 350 بس قال ان موتري 454 لانه يشوف مكينته زرقاء ثم ابلشنا على هالنقطه المهم تسهلنا في دربنا ووصلنا النعيريه الساعه 12 من الليل وجينا رفيق لنا من الجماعه عنده بيت هناك وقلطنا عليه وماقصر الله يبض وجهه اكرمنا وقام بالواجب ونقعج فالنعيريه 3 ايام ومن بعدها نوينا السفر للرياض لنا فيها بعض الحاجات ومواترنا تعجبكم كذا :good2: تحركنا صبح من النعيريه والظهر انتمشى في شوارع الرياض العزيزه وانروح الصناعيه ونشتري بعض الحديد وانعدل بعض كراسي المكينه والقير عند رجال معروف ومشهور بالشغلات هاذي في موتري طبعا وانتوجه للمعارض ناخذ فيها جوله على سياراتها وابلشونا هالشريطيه يسومون سيارتنا ويبخسونها بعد المهم الشيطان بدا يلعب في راس اخي وقال هالموتر بايعه بايعه حاولت فيه ي ولد تركد لاتخسر موترك النضيف قال خله يروح والحال ابقى هو الموتر شاريه من الحساء ب 18 الف وساموه بـ 17 هههههه عيا يبيع وقلت له خلاص انتضر الجمعه بيجيك الحراج وبتلقى لك ونيت وبتبيع موترك قال تم وانريح بالرياض من يوم الاثنين الى الجمعه ويوم جاء الخميس العصر رحنا بموتر الحراج ويزادون عليه ويروح ب 23 الف سعر طيب وربح فوق راس المال وباعه الرجال ودورنا مالقينا له موتر على اللي هو يبغي ونستريح الى بكره من صباح الجمعه ويلقى له جمس رفرف ابيض 454 بس الكلتش محترق ووقف على 18 الف موديله 84 واشتراه اخووي من راعيه وانشله سطحه صوب ورشه وانركب له كلتش اصلي كامل ي زين الرياض كل شي عندك متوفر ومن يوم ركبناه والمتر ماشاءلله ممتاز وجربته انا وطلع الموتر بطل وصوت طرب وشكل حلوو وسعره طيب بس لايخلى من خراب فالداخليه وهذا ماجعل قيمته زينه لكن ماهي مشكله وعزمنا نرجع الديره الحساء ثم قطر حركنا عصر الجمعه والساعه 1 ليل بالحساء وجمس اخووي راح علي بالخط ورجعنا قطر من بكره صباح السبت


واتمنى من الله سبحانه وتعالى بان تعجبكم القصه الحقيقيه وليس بالمزيفه ولا بالكذب والعياذ بالله


سبحانك اللهم وبحمدك اشهد ان لا اله الا الله استغفرك واتوب اليك

__DEFINE_LIKE_SHARE__