شقاوة ايام زمان مع البيبسي والفران وعنب الديره

[محروم.كوم]

السلام عليكم ورحمة الله وبركاته
اخواني واخواتي ابسرد القصه وري القصه
تذكورن اول ماجاء البيبسي او انه موجود بس حنا ماشفناه
المراد اني انا وربعي ندور الغثاء بكل مكان وما نخلي شي وكل شي لنا به دولش (يعني نجرب كل شي وبغشامه )
كان عندنا بالحاره واحد يجيب البيبسي مادري من الرياض او من جده والله اني مادري
المهم القصه مهوب على هاذي
كنا بالصيف وحر موت وكان هالرجال يحط صناديق البيبسي بالسوق ويغطيهن بشراع والشمس عليهن طول الوقت ( والله من زين التخزين)
وحنا نترصد بالقوايل واذا طمعنا انه نام جينا ورفعنا الشراع واخذنا التي تشيله حجورنا ثم تعال شف الهجيج والله يالعاير انك تاخذه على رجل من السرعه وان الواحد اذا اقبل عليك من صوت الجرار تحسبه مرياع غنم
ثم انتغبى بمزرعتن حولنا ثم نحط هالبيبسي بالارض وحنا ثلاثه والبيبسي يجيلهن عشر
وادري واحد منكم يبي يسأ يبي يقول وشلون تفتحونهن
الجواب لأن الله يسلمكم واحد من ربعي اعطاه الله سنون تقل خرامه ورق وحنا مخلينه فتاحة بيبسي
والله ياجماعه ان البيبسي يطبخ من حرارة الشمس وحنا ايه هين حار او ماهوب حار
ام اول ماتشربه تغرة عزكم الله تجيله 50 متر تحس ان الجيوب الانفيه وشوي من مخك داخل فيه شوك وشعور مادري وشلون يوصف واعوذ بالله هالكبود اللي تحمل هالبيبسي وهو حار
الثانيه اذا رحنا للفران الصبح او مسيان طبعا قبل اوعقب راع البيبسي نحاول نشغل الفران اللي يقول عطن بنص واللي بريال واللي يصير قدام العود اللي يحط عليه الخبزه ويدخله بالفرن وينشغلفيه الفران وخر لايطخ عينك العود وكل هالضجه وتحصلنا شرينا خبز بثلاثة اريل ولا عطيناه الا ريال ( اوالله نصابين )
اما الضحى كان حولنا مزرعه بس بعيدة شوي لاكن تسوى العنوه تدرون ليش كان فيها عنب عربي اللي حمر فوقييوه وتحتيوه يميل للسواد وكل صبح وحنا مشغلين راعي المزرعه
لاكن المشكله قبل مانلمس العنقود
انا مادري وش هالحاسه اللي عنده راعي المزرعه ماتدري الا قايمن يصوت ردوهم احجروهم لايطلع منهم احد
وعينك ماتشوف الا النور همن كل واحد يهج مع درب واستمرينا بالمحاولات الين جاء يوم وعرفنا السبب عن طريق واحد معنا مانبيه ولى نواطنه لانه دب ولايقدر يركض بسرعه وياكل واجد
حنا على العويده شوي شوي لين وصلنا العنبه وحنا نتلفت نخاف من راعي المزرعه يوم درينا يوم قام هالدب يغني طول بطنه وحتى صوته اللهم لك الحمد ودك تطرش من شينه
قلناله مهبول انت الله يخزيك اسكت لايسمعنا راعي المزرعه ما امدانا نكمل الا كالعاده ردوهم احجورهم لاتخلونهم يطلعون حنا هجينا وهالدب ولا على باله ومستمر يغني حنا بعد مسافه بعيده من موقع الحدث وقفنا والدب نسمعه من شين صوته يغني الى هالحين قلنا والله يا يبي يدبغونه لين ينتفخ والدب يغني وياكل وراعي المزرعه يصوت ردوهم قولوبهم والدب ولا على باله ويشر لنا من بعيد يعني تعالو حنا مابين خايفين ولى ندري وش السالفه يوم قربنا حوله قال ترى راع المزرعه عمى
قلناه صادق انت قال والله العظيم بالصدفه سمعت ابوي قبل اسبوع يقول لرفيقه وش اخبار عميان ابو فلان ونا داري بس قلت ابا اضحك عليكم وكل يوم تهجون اجي بعدكم واكل عنب لين بطني تقصع عليه القمله من الشبعه

هو قال كذا
والله يادقيته دق لين الله يكرمكم طلع صوت احححححححححححح
والرجال عميان يصوت ومن الحمقه قطعت عنقود ورحت للشايب اللي يصوت واقف عنده عند دريشة تطل من البيت على طول على المزرعه
قلتله ترى ندري انك عميان وقال وتراي ادري من صوتك انك ولد فلان يوم اتقهوى عند ابوك سامعن صوتك
اوالله البلشه
قلتله ياعم الله يهديك ماسمعت الدبغ والدبيغ قبل شوي
قال الا
قلتله على طول هذا انا ياعم ادق العيال اللي يسرقون العنب وانهم هجو وقطعو هالعنقود وني جبته اعطيك اياه قال وينهو قلت سم اشوف ايدك
مده
واجي وعطيه اياه
قال كفو ياولد فلان تدري رح ياوليدي وكل لحد ماتشبع لو تاكله كله تراك بحل
عاد تعرفون عفت نفسي هاه وماكلت شي والعالقل يفهم
( ايه هين ماكلت شي عندي انه مادخل للسوق بشي )
تحياتي للجميع

__DEFINE_LIKE_SHARE__