قصة قصيدة

[انسان محروم]

القصة

//
\\
//

اليوم بخبركم قصة هالقصيدة المشكلة او خلوني اسميها متعددة الانساب حيث تم نسبها لشاعرين وهي في الاصل كذلك ؟!!

نعم القصيدة لشاعرين وهذه حقيقه لكن بسرد لكم حيثياتها بالتفصيل

وهذه المرة الاولى اللي اتكلم فيها عن قصيدة من قصايدي وحصريا في محروم موقعي المفضل والدائم

!!

اتصل بي صديج عزيز وكنت يومها يالس ويا واحد من الربع بمبني المجلة وطلب مني صديجي المتصل اني اكتب له قصيدة وطبعا شرح لي قصته


يقول صديجي
يافلان بخبرك بشي انا فارجت حبيبتي غصب عني كنت ابى اختبر حبها لي وقلت الها انا بودرج والحين صار لنا ثلاث ايام وانا اللي مب رايم على فراقها الحين ومب عارف شسوي واباك تكتب لي قصيدة في هالمشكلة

قلت له فالك طيب بس انا يمكن ما اقدر اوصف حالتك بالضبط بس اللي يقدرني عليه ربي وبيليق بك بعطيك اياه قال تم

فسليت قلمي من محبرته وقمت اكتب ع السريع وطلعت معاي هالقصيدة

طبعا خويي اللي معاي شاعر عود ومدير مجلة وما عرف شالسالفه بالضبط وفهم الموضوع غلط

عباله اللي متصل فيني واحد من المحررين ويبى قصيدة خاصه لهم

وعقب ما خلصت انا من القصيدة قمت واتصلت برفيجي اللي طلبها وعديتها عليه وهو يسجل صوتي وقالي القصيدة طيبه وهاللي اباه بالضبط

قلت له توكل على الله

عقب تمت الورقة اللي كتبت عليها القصيدة ع الطاولة وسولفت ويا خويي لين قريب ما ينتهي دوامه وظهرت عنه وتمت القصيدة في مكتب المجلة

بعد اسبوعين اتصل بي خويي يقولي فلان القصيدة اللي نسيتها عندي ع المكتب وصلتني اليوم باسم واحد ثاني ويباني انشرها وانا مستحيل انشرها له لانك كاتبنها جدامي وانا نت ابى انشرها ومتردد لاني ما استئذنت منك

بعدين انت تعرف هالاسم

قلت له ما عليه يا فلان انشرها للريال باسمه لان القصيدة قصيدته ولا تنشرها باسمي طول

قالي اشقايل انشرها باسمه وانت كاتنها جدامي وانا ماخذ القصيدة الاصل

قلت له يخوي سو اللي اقولك عليه وعقب بتعرف السالفه

قام خويي ونشر القصيدة اللي وصلته من رفيجي وباسمه
ومر الموضوع ع خير محد عرف سالفة القصيدة


طبعا رفيجي هذا كان مدير منتدى ويحب وحده من نفس المنتدى وانا موجود في هالمنتدى معاه

الكل عرف وتفاجأ لأنهم ما يدرون انه شاعر وينشر في المطبوعات الادبية


المهم تمت السالفه على هالنحو لين ما صارت الكارثه وبدت المشكلة

يوم قام خويي وينشرها مره ثانيه باسمي طبعا بشكل متعمد لاثراارة الساحه لا اكثر ولا اقل

اهنيه قاموا الشعار يتصلون علي وعلى المجلة

اشقايل الشاعر يسرق قصايد غيره هههههههه وينشرها باسمه وهالقصيدة منشرة من فترة طويلة باسم شاعر ثاني

طبعا انا قبلها خبرته عن سالفة القصيدة وفهمته السالفة كاملة عقب ما استئذنت من رفيجي

وقام يقول لكل من يتصل ان الاثنين يملكون القصيدة ويزيدهم بعد من الشعر بيت ان نحن مب مشتركين في كتابة القصيدة بس مشتركين في ملكية القصيدة

يعني كان يحيرهم اكثر ويترك علامات الاستفاهم في اذهانهم

وهو يقصد ان القصيدة لي وقصتها للثاني وهذا بالفعل شي واقعي وقانوني

وهذا يرسخ مقولة اقتباس شاعر لفكرة قصيدة شاعر اخر


لكن نحن كنا اول اثنين نسجل حفظ للحقوق بهذا الشكل في دولة الامارات من خلال هذه المطبوعة

وهذه سالفة القصيدة يالغالين

القصيدة لي ومنشورة باسم رفيجي اللي طلبها

والسموحه ع الاطاله



لقصيدة

//
\\
//

تـفـاحـه


مــن يـفــارج روحــه ابـروحــه
مـن يـطـفـي نـور مـصـبـاحــه
اويـجـافــي روح مـمـلــوحــه
غـيـر قـلـبٍ يـعـشـق جـراحــه
يــوم قـلـبــي زادت اجـروحــه
واخـتـلــف فـالــراي ذبـاحــه
صــرت كـنــي روح مـذبـوحــه
مـاعـرفــت الـنــوم والـراحــه
ويــل حـالــي زاد بــه نـوحــه
مـيـت وغـرجــان فـصـيـاحــه
مـاحـسـبـت حـسـاب مـربـوحـه
والـمـشـاعــر دوم لـحــاحــه
شـخـص قـلـبـي حـبـه ابـروحـه
صـدق صـوب قـلـبــي اوتـاحــه
واصـبـحـت لـبـواب مـفـتـوحـه
يـوم قـلـبـي سـلــم اسـلاحــه
عـيـنـي ابـفـرقـاه مـفـضـوحـه
مـوحـشـه فـغـيـابــه الـواحــه
ادمـعـي يـاعـيـنـي مـسـمـوحـه
لـيـن دمـعـج يـوصـل الـبـاحــه
مـن يـفــارج عـمــره اوروحــه
غـيــري ولا نـــال تـفــاحــه
ضـحـكـتـي لاشـك مـجـروحـه
ابـكـي والـدمـعـات فـضـاحــه
قـام جـرحـي يـبـنـي اصـروحــه
يــوم قـلـبــي ودع افــراحــه
يـابـعـد مـغـلـيــج يـاروحــه
يـعـلـج بـفـرقــاي مـرتـاحــه
حـسـنـج امـحـلـيـج يـا دوحــه
ومـاعـلـيــج اخــلاف ذبـاحــه
وروحـي بـلـقـيـاج مـنـصـوحـه
لـكــن الاقـــدار شـحــاحــه

\\
//
\\

__DEFINE_LIKE_SHARE__