سوالفي بالثوب الوسخ وأنواع الإحتقار

[محروم.كوم]

السلام عليكم ورحمة الله وبركاآآآآآآآآآآآآآآته

هي مجموعة سوالف صارت لي

أول سالفه (( بالبنك الأمريكي ))

طبعا كنت أشتغل مدير مركز صيانة تريلات (شاحنات)

ولما أجي للورشه ألبس ثوب ماأهتم لو جاه لطخة زيت وإلا إنشق

الزبدة الثوب أسود وأبيض والأصل البياض

الحاصل كنت بنفس الوقت مندوب إيداع للبنوك

وكنت مضبط مع المحاسب إذا أجتمع مبلغ فوق الـ 100000 مية ألف ريال

أروح أودع بحسابات الشركة البلاد او الراجحي او الأمريكي

الحاصل جاء يوم وملزومين بالأيداع بنفس اليوم

وأنا كنت أحوس مع العمال بمكينة تريله بالثوب

ويجي المحاسب هذي ميتين ألف أودعهن بالبنك الأمريكي

وأخذهن منه وأشغل موتري وأناظر مايمدي أروح للبيت أغير ثوبي قبل الظهر

قلت ياولد اللي خلق الخلق واحد رح بالثوب الوسخ حتى يمدي أخلص قبل الظهر

وأرجع أتغدى وأقيّل الظهريه بالبيت

وأدخل البنك الأمريكي بحي الريان وناسي شكلي كني متقلب بطشت زيت

وأسحب رقم وأقعد بالأنتظار ما إنتبهت للعالم كلهم يخوزقوني بعيونهم

وزود على كذا ماسك الفلوس بيدي وأناظر يساري مكتب السكيورتي

وهو يناظرني نظرة إشمئزاز

وينادون رقمي وأقوم وأخلص الأيداع وأطلع من البنك وأنا العيون تتابعني

أحس بعد ماطلعت كلهم راحو للصراف يسألون كم أودع

مر اليوم الأول

من بوكرا نفس الحكاية جاني المحاسب بيودع مبلغ مقارب وبالبنك الأمريكي

وأخذهن ودز للبنك وأدخل

لعلي اول ماأخذت الرقم وعيني بعين السكيورتي

وهو يناظرني بعين ويلتفت ويجدع كلمه لقطته

وهو يقول هالحشرات وش يجيبهم بهالبنك ههههههههههههههههههه

وأقعد لي شوي وأفكر بكلمته وأقوم لم السكيورتي قلت له ماعندك ظروف أحط فيها الدراهم

وأطلع رصات الخمسميات على مكتبه

إلا يوم تبارقت عيونه وش هالمنتف اللي معه كل هالفلوس

وقلت له ترى أشتغل بورشه ومايمدي أروح أغير وأجي قبل الصلاة عشان كذا أجيكم دايركت

وهو اللي يقوم ويروح لخدمات العملاء ويجيب خمطة ظروف ويعطيني إياها :good2:

وأنا أحس إنه لازال مذهول من الصدمه

===============================

السالفه الثانيه ( المطعم البخاري )

أروح لورشه وأقعد أحبرش بموتر لي عندهم

وبصراحه عندي قاعده بالنسبه للثوب بما إن الوسخ ينغسل مايهم لوتوسخ الثوب

لذلك كل يوم تلقاني أودي ثيابي للمغسله

لدرجة إني أضمن أن جميع المغاسل اللي أغسل عندهم مستحيل يخلطون ثيابي مع غيري

وياكثر مايسألوني أنت وش تشتغل ويقولونها بنفس زعله


المهم ذاك اليوم طالع ماتغديت وأشتغل بالموتر وقارصني الجوع وكل شوي أقول بعد شوي لين

حول تقفيلة الورشه تسع وحولها وأنا اركب موتري

وأناظر وإلا الثوب منحاس والأيدين سود

أروح أطلب سفري من هارديز لكن والله إني مشتهي رزيزه

وحول بيتنا بخاري مضبوط وغالب اللي يجونه عمال والسعوديين يطلبون سفري

وأدخل البخاري وأطلب وأروح أغسل

وأقعد يوم جاء الطلب وأسمي

ماش أحس فيه نظرات تحرقني وأناظر إلا إثنين شباب بعمر الزهور يتساسرون

ويناظروني

عاد أنا مالي خلق أحد يتابعني وأنا آكل

حط عينك وأطفح عشاك ولا تبحلق بالعالم

وأوقف وأقعد أناظرهم لين صادت عيوني عيونهم

قلت أهرج عليهم وكل اللي بالمطعم إلتفتو تراني توني مشتغل بسيارتي وجاي جوعان

ماجيت أقابل أمراء

ويتلهون عني وأكمل عشاي وأقوم وأنحرهم

وأطلع أجهزتي عندهم قلت ابروح أغسل ولانيب ضامن هالعمال خلوهن عندكم

والمغسله بيني وبينه شبر بس أبغاهم ينحرجون وهم على الصامت وعايشين حالة ذهول

وأروح أغسل وأرجع وأخذ أجهزتي من عندهم وأقولهم جزاكم الله خير ماقصرتو ياشباب

لكن ذبحوني هالعمال ماغير يناظرون ورى مايلتهون بأنفسهم ولا يناظرون هالعالم

وهم يقابلوني بصمت المحرج

==========================

قد تصادفنا ظروف لأسباب عديده قد لا نأتي بالشكل الذي يتناسب مع الذوق العام

وسالفة قد ذكرت موظف جديد بالبنك الأهلي دخل عليه شايب بلياردير لكنه

من شيبان أول الثوب ابوبطه ولونه بني من مكافحة السنين والشماغ ماله مرزام

ومتعفط ومتندف مع كل محل والطاقيه صفراء

إلا ويمسكه الموظف الجديد على البنك وقاله أقعد عند الباب يحسبه شحاد

وزعل الشايب قال أنا تقعدني عند الباب إلا إنت اللي بتطلع مع الباب

ويتلاج هو والشايب ويجي مدير البنك ويسلم على الشايب ويتعذر عن الموظف

جديد واللي مايعرفك مايثمنك وهو اللي يهدي ويسامحه

قال مدير البنك للموظف بعدين لو أمرني أرفع فيك حالتين ياتطرد ياتنقل
=========
=======
=====
===
==
=
جا طاري هالسوالف اليوم في تجاذب الحديث

فخطر ببالي مشاركتكم بها

__DEFINE_LIKE_SHARE__