الحمد الله انحلت مشكلة التفتفة و التوقف لسيارتي الاكسبلورر

[محروم.كوم]

السلام عليكم و رحمة الله و بركاته

يا هلا والله و مسهلا بالاعضاء و الزوار :heart:

طبعا زي ما انتو شايفين هاذي اول مشاركة لي في هذا المنتدى الاكثر من رائع :good2:

انا راح اطرح مشكلتي و حلها عشان افيد و استفيد


نبدأ بسم الله

اولا انا سيارتي فورد اكسبلورر 2006 امريكي

قبل كم شهر طلعت عندي مشكلة الي هي يا طويلين العمر ان السيارة اشغلها وهي ماخذه فترة طافية تشتغل زي اللوز ولكن امشي فيها ابو نص ساعه ساعه بالكثير تبدا تفتف و تكتم دعسة البنزين و تطفى و انتظر شوي و ارجع اشغلها و تمشيني شوي و ترجع نفس المشكلة الزبده قلق

طبعا قعدت فترة على هالحال الين صرت اختصر مشاويري و اخوكم في الله انسان يكره الصناعية و الورش و نفس الوقت عجازي

طفشت من السيارة و خليتها مرمية عند باب البيت فترة الين ذاك اليوم الي مسكت معي اعرف وش علتها

قلت يا ولد خش النت و ابحث يمكن تلاقي حل للمشكلة :type:

بحثت كثير و اكثر الردود كانت حول تغير طرمبة البنزين و البواجي و اسلاك البواجي و هاذي انا كلها مغيرها من فترة قريبة قبل المشكلة
في الاخير لقيت شخص عنده نفس مشكلتي نوع سيارته مكسيما المشكلة كانت عنده من الثروتل ( منظم الهواء)

المهم دخلت اليوتيوب و شفت كيف يفكون الثروتل و ينظفونه رحت و طلعت عدتي و بسم الله فكيته و نظفته و رجعته الا والله و السيارة زي العسل و عزمها اصبح قوي و خليتها تشتغل فترة و بسم الله ما شاء الله ما صار فيها شي

طبعا وقتها يا اخوان كنت في قمة السعادة و الفخر لاني اعتقدت اني حليت مشكلة سيارتي بنفسي بدون ورش

شغلتها اليوم الثاني و انا متجه للدوامي الصبح الا و ترجع المشكلة

هنا خلاص قلت يا ولد ودها ورشة محترمة يشوفونها

رحت ورشة يا اخوان عندهم فحص كمبيوتر جميل جدا طبعا هالورشة موجودة في صناعية الخليج في الرياض في الشارع الموجود خلف محطة البنزين المتواجدة في الزاوية اسم الورشة ميزان كو
فحص لي الموتر طلع علي بلاوي متلتلة الي هي :
1- حساس الهواء
2- حساس منظم الهواء (الثروتل)
3- اي بي اس الكفر الامامي الايمن
4- ضعف البطارية
5-حساسات الشكمان ( طبعا مغير دبات الوكالة )

طبعا فحص ضغط البلوف كانت ممتازة بعدها فحص الطبلون و لقاه سليم ثم فحص ذبذبة المكينة

قالي في الاخير شوف يا عمو حنا بنظف الحساسات و نصفي المكينة اذا ضبطت كان بها اذا ما ضبطت لازم تغير الحساسات و ناخذ عليك 500 ريال شغل يد :looney:

قلت على بركة الله لو تبي الف بس صلحها

طلب مني بواجي و بخاخ اسيدلكو كلها اخذت 70 ريال

الكلام هذا الصبح قال العشاء بأذن الله تكون جاهزة ..

جيتهم العشاء والا وهم مزينين كل شي و لقو يا اخوان اسلاك حساس الهواء الموجود جنب فلتر الهواء انسلخت من الحرارة لكن الله ستر و ما سوت التماس غطوها بشطرطون و اخذت السيارة و جربتها طبعا الكلام هذا من يومين والا موعد كتابة هذا الموضوع و الحمد لله السيارة رجعت كما كانت المكينة انسيابية و العزم زاد و التفتفه شبه معدومه ..:good:

حبيت اطرح حل لمشكلتي لان يمكن بعض الاعضاء او الزوار عنده نفس المشكلة ..:good2:

اخيرا اسال الله ان يبارك فينا جميعا و ان يرزقنا طاعته و بر الوالدين ويجمعنا في جنة الفردوس

__DEFINE_LIKE_SHARE__