الجديد ياهل الجديد من ابوحسين والحلقه الرابعه من النصايح الذهبيه

[محروم.كوم]

السلام عليكم ورحمه الله
احبائي واعزائي

نواصل لكم حلقات ابوحسين بعد نجاح منقطع النظير وزياده عدد المشاهدين للحلقات بشكل فاق التوقع فان ذلك مشجع لتقديم المزيد من الحلقات والنصائح الذهبيه لكم احبتي وهي خلاصه لخبره امتدت 17 عاما

كما ازف لكم بشرى موافقه اخويا وصاحبي جميل جلب على المشاركه واثراء المنتدى بسيل من المعلومات والنصائح وتكريس جهوده وخلاصه خبرته لكم يا اعضاء احلى منتدى

وان شاء الله بعد رمضان حنتقل لخيمه الصيد الصقور بعد نقاش ونصيحه من الاخ هزاع مشرف خيمه الصقور والاخ ناصح نائب مدير مكشات فحكون مع احد الاخوه الصقارين وان شاء الله حنجيب الطير الحر باذن الله وبرضو حاكون على تواصل معاكم ان شاء الله في تويتر والكيك هدا لو ساعدني ولد اخويا في التسجيل لانو والله ماعرف الطريقه

وحندخل في المعلومات المنعشه اللي تنعنش على الصبحيه متل الشاي اللي عليه حبق المدينه

النقطه الاولى
القصبه ياخوان ونقلك حاجات مهمه انتبهوا للحلقات هيا سبب ضعف الخيط في كتير استشاروني يقولو لي انو الخيوط ضعيفه وتتقطع بسرعه المهم واحد قلتلو جيب القصبه وريني وشفت وحده من الحلقات فيها زي الشطب وحاد يعني لما تبدأ تلم الخيط
والخيط يمر على المكان هدا اكيد انو حينقطع فيا ريت انكم تنتبهوا من هدي المسئله وتغيروا الحلقات

وحاجه مهمه يا اخوان القصبه لما تركزها بعد الرمي وتجي تبغا تركب الجرس انتبه تمسك راس القصبه وتنزلها عشان تركب الجرس لانو الكربون ما حيتحمل الا ادا كان من الانواع الغاليه مره وحتتكسر القصبه من الاسفل
فانصحكم انك تلفو عليها شطرطون على شكل وصلات وياليت يكون لون احمرر وابيض لاني وحداوي صميم هههه امزح معاكم يا حبايبي
والهدف منو انو يخفف الثقل على القصبه


وانت ماسك القصبه ومستعد للرمي تاكد انو الخيط في اخر حلقه طالع من الخيط ومو ملفوف على نهايه القصبه لانو لو اتلف على الجزء الاخير من القصبه ورميت حتودي نفسك في داهية ويمكن اللي جمبك كمان
وكمان لازم تنتبه لما ترفع القصبه من اللي جمبك واقف واهم شي ما يكون احد وراك او قدامك

كمان ياخوان تقدر تحط شطرطون فسفور مضىء على القصبه عشان لمن يجي بدل الجرس والفسفور تقدر تشوف القصبه لما تهز

وبعدين ياخوان انصحكم تشترو القصبه القطع اللي تجي قطعتين او تلاته احسن من التلسكوب في التحمل وتعيش اطول حتى لو صيني او تقليد

النقطه الثانيه
انصحكم ياخوان بالسباحه واستكشاف البحر اللي حتروحو تصيدو فيه
انا متعود كل اوصل البحر اول حاجه اسويها البس الشورت والنظاره وادخل اسبح 300 متر فراشه رايح و 300 متر سباحه الظهر جاي وطبعا جوات البحر بشكل عرضي واشوف المكان وراح تتعجبو من كميه السمك الموجوده في البحر والاهم من دا كلو انك تحافظ على لياقتك وادا فيه احد مو عارف طريقه سباحه الفراشه يبحث عنها في اليوتيوب



النقطه الثالثه
لما يرزقك ربي بصيد طيب كتير الاحظهم يرفعوا السمكه اول ما يطلعوها عشان اللي جالس جمبهم يشوفو الصيد ويستعرضو قدامهم ومو عارف انو العين حق فممكن واحد جالس جمبك تجيك منو عين بعيد الشر عنكم ( الله يحميكم منها ) حتى ابو مقص ما يقدر يصيدو ولا حتى ابو جلمبو
واهم شي انك تتحصن ادا انك بتستعرض بالصيد

النقطه الرابعه
الاخوه اللي يستخدمو العلب وطريقه التوشيح في الصيد او الطاره لازم قبل مايرمو ويتاكدو انو يدهم جافه مافيها مويه لانو المويه ممكن تخلي الخيط يزرق من يدك واطول الدائره وياساتر من االي واقف جمبك

النقطه الخامسه
وهي تتكلم عن اصحاب الابوات انا ياما طلعت ابوات و 90 % من اصحاب الابوات ما يحط كيس زباله في البوت تترمي فيه القمامه فياما نشوف علب في البحر كل محل وحتى علب الزيوت فيا ريت تحرصو يا اخوان شويا


النقطه السادسه
كتير يا اخوان يستخدمو البخاخ حق الناموس في وقت الصيد بشكل عجيب كانهم يستخدمو بخاخ دهن عود من القرشي والله يا حبايبي مرررره مضر وابحثوا في قوقل وحتتاكدو بنفسكم
وفي بدائل ممكن تجيب اوراق الطماطم او النعناع واللي ما ينفع معاه اشوف انو يستخدم الكريم احسن من البخاخ

النقطه السابعه
وهيا عباره عن طبخه سمك من صاحبي عبدو تعشيقه وهوا ماشاء الله طبيخ ويدو خفيفه يا ساااتر هيا باختصار انك بعد ما تنظف السمك تشخطو على جمب اربع شخطات وتدهنو بزيت زيتون و زبده وشويه ملح وفلفل اسود وخليه تلت ساعه وبعدها اشويه وصدقني لو تسويها على ابونقطه راح تفكره ناجل من لذه الطعم


وهنا اكتفى من النصائح الذهبيه
اي ملاحظه او اقتراح عيوني لكم

تحياتي
محبكم في الله ابو حسين __DEFINE_LIKE_SHARE__