الغصن والقرناس النادر ... قصه من عبق الماضي ...... ذراع الذيب

[محروم.كوم]

بسم الله الرحمن الرحيم
السلام عليكم ورحمة الله وبركاته

اسعد الله اوقاتكم جميع كلن بأسمه زوار واعضاء ومشرفين وأداره منتديات مكشات

وشحالكم عساكم طيبين

::::::::::::::::::::::::::::::

تعرفون محاكيكم يعشق شي اسمه شبك الصقور

ونقدر نقول ان الله بلاني بهالشي وكل ماقلت اني بفارقه القى نفسي في كل سنه يزيد عشقها فيه

ومن قو حبي لها ما أمل من قصصها ومن سوالفها ولو أنعاد علي ذكرها اكثر من مره تحصلني شاد انتباهي لها وكني اول مره سامعها

وهالسنه حصلت باب وراد الله اني اصادفه

اخذني للسنين اللي مضت والحين عايش في وهم مابين الماضي والحاظر والله اعلم بحالي

والله يجزاه خير اللي دلني ع هالباب وبنفس الوقت استاثم فيني هههه عزالله ان محاكيكم اصبح يهيم في عبق الماضي وكم تمنيت اني من هاك الجيل

صحيح كانت حياتهم صعبه

لاكن فيها حلآوه وبساطه عيش
،
،
موضوعي هذا فيه صوره نادره خلفها قصه ألهمتني عن حياة جميله عن ايام شبك الصقور ، ارسلها لي رجال شرواكم صاحب الباب المذكور

وكل صورة من دون قصه تبقى عندي مثل اللغز !!!

وهذا مابيه ولا أقدر اتحمله خص لا صارت الصوره مثل اللي راح تشوفونها

وكما تعرفون بعد ما أكتشف محيسن العاكور رحمة الله عليه مجيرمه والديار اللي حولها صار هناك أمل عند فئه بسيطه من الناس

بعد ماتعلموا كيفية شبك الصقور يأملون انهم يطرحون طير يحسن معيشة حياتهم ويزين امورهم

وراده الله ان يهاجر ذاك النادر عبر المملكه

ويكون عابر على اراضي مجيرمه وان يجعل الله هاك العصريه بمنطقة الغصن بمجيرمه

هي آخر عصريه يصيد فيها ذاك النادرعلى كفه

بدايةً

خرج بذاك اليوم من عزبة المقناص المرحوم سعد بن منصور بن هاشم ال زيد الشريف (ابوهياء) ومعه ولده محسن وكان ناوي يارد من بير الشنابره

وساقه الله ووجهه يم حروة الغصن من مجيرمه الى شرقها

وهذيك المنطقة معروفه بكثرة شجر السمر وكان النادر بهاك المنطقه على سرحة يعلف في طير صايدة على كيسه

وتباشربه ابوهياء

وراح يحذف له والطير استغني عن العلف وماهد او انه عاصي

المهم اضلم الليل وغابت شمس ذاك اليوم لاكنها اشرقت شمس الامل :s وطرح الطير بالليل مضمون بحول الله

والنادر ماغير محله عن هذيك السرحه ومسّوه من شان يخدجونه

وفي هاك الوقت مايخدجون الا بالهباده ويريد الله وينخدج الطير على يد ابوهياء رحمة الله عليه

وفرحة ضفته ذاك اليوم ماتنوصف لاكن كانت هناك مفاجأه ماتطري على بال احد في هاك الحزه

اتضح ان الحر فيه سبوق قديم

ومن اصحاب ابوهياء اللي بالعزبه رجال اسمه سعد ابوصلعه الجحدلي رحمة الله عليه كان من صقاقير الامير مشعل بن سعود بن عبدالعزيز ال سعود

تعّرف على الطير وقال بلسانه يابوهياء ترى هذا الطير طير معزبي !!!

وعرفه بسبوقه وفي ذاك الزمان مايحطون السبوق الطيب غير الامراء والشيوخ كانت تجيهم مسابيق معروفه حقت الشيوخ

وقال هالطير غادي من سنتين من معزبي المهم قال ابوهياء يالله مشينا نبشر فيه الامير وراحو له في جده

وفعلا الامير مشعل فرح بهالطير واعطاهم فيه مبلغ خيالي

اعطاهم 7000 الآف ريال

وقيمته بذاك الزمان يعتبر مبلغ كبير وهذي القصه يذكرها لنا محسن ولد ابوهياء ويوم انطرح الطير كان عمره 14 سنه الحين عمره 62سنه الله يطول بعمره

يقول اطيب طير بذاك الوقت كان سعره من الف وخمسميه الى ثلاث الآف ريال ولو ما كان طير الامير مشعل ماكان وصل لهاك السعر

وسبعه الآف ريال تشتري فيها جميع اراضي مكه وذاك الوقت الدنيا ضعيفه والناس ماعندها دراهم

يقول محسن الله يطول عمره ع الرضا والطاعه كنا نطبخ الشاهي في البراد اربع مرات باليوم ننشف الورق ونشربه من جديد كانت ايام قهر وجوع

::::::::::::::::::::::::

والطير ياجماعة الخير انطرح بعد توحيد المملكه بثلاثه وثلاثين سنه وكان الطير فاتحه خير عليهم واللي ثبت تاريخ طرح الطير انهم اشتروا جيب تويوتا موديل 65 ذيك السنه

تم طرح الطير في عام 1965 ميلادي وتوفي ابوهياء قبل سنتين بعد ماناهز الـ93 من عمره رحمة الله عليه

وكانت الكميرات ذاك الوقت غير متوفره وكان فيه استديو وحيد في منطقة الحجاز بجده راح له ابوهياء وصور الطير عنده

صورة الطير

هذا هو ابوهياء والنادر وعمر الصورة حدود خمسين سنه تقريباً

وصورة ابوهياء في آخر حياته عسى الله يبيحه

واسأل الله العظيم رب العرش العظيم ان يغفر له ذنوبه ويوسع له قبره ويجعله روضه من رياض الجنه ويرحم اموات المسلمين اجمعين

والشكر موصول لأبنه محسن الله يطول بعمره على الرضا والطاعه لسماحه لنا بكتابة هذا الموضوع

ولاتنسون ابوهياء من دعواتكم الصادقه وكل مسلم

__DEFINE_LIKE_SHARE__