قبل الوسم هاضت بفكري تعابير

[محروم.كوم]

اخواني الاعزاء في مكشات
السلام عليكم ورحمة الله وبركاته
كانت لي محاولة شعرية لاقت اسحسان بعض اخواني في مكشات وكانت كلماتهم محفزة اسعدتنا . ولذلك اعيد المحاولة من جديد لعلها تلقى استحسانكم

صورة من عدسة جوالي

وإليكم الابيات :

ياعين وشبك تزهمين المناظير
عقب الطرايد لك تسلي وشاره

ويارجل ليه تقصرين المشاوير
من بعد كــــنتي بالتهاتيه غاره

ويايد وشبك خانتك تلة القير
ياكم صخرتي بالطرد فر طارة

العمر توه في زهور ونواوير
مير البلا هم(ن) كواني بناره

هم(ن) غشاني كسر العزم تكسير
اظلـــــم علي اللّــــــــيل ويا نهاره

ادهى على القناص من قطعة السير
في مـــــــوترن واحد ولا فيه غاره

كل الثلاث اللي مضن شبن الكير
وسط الحشا زاد اللهيب استعاره

الاوله وردت لهــــــــــا جمة البير
تروي عطشها من غزير انهماره

على فراق اللي قبـــاله تباشير
رحل وفرقا اللي مثيله خساره

ياكم لحـــــــقنا للطرايد مغايير
في روسنا للصـــيد جد ونعاره

نجهم لطردة قبل لا يسرح الطير

يوم المــــــقيّد راقدن بالعماره

نطوي فيافي مانحسب لمخاسير
نجلى هموم العمر قبل اندثاره

واليوم في قبره عساه بذرى خير
وحنا على الدنيــــــا نعيد افتكاره

والرِّجل عيت لا تعيد المسايير
والربع كلن مستــــــكنن بداره

وان جات سجة صادمتها معاذير
كلن على نفـــــسه يصدر قراره

والثانية تعبـــــــــت وقوف الطوابير
لين اصبحت مثل الجمل في هجاره

ان قاومت بالشرق برد ومعاصير
جاها من الغربي لفوح الحراره

والثالثة ماجات والله بتقصير
مير الزمن زوّد عليها عياره

يمنى تمد الخير للذات والغير
اكيد مرت في دروب الخطاره

حقايقن ماهي هجوس وتصاوير
اعيشها حاضر حلاة ومراره

ماعدها للي سمعها تحاسير
لكني اعلنها صريح العبارة

قبل الوسم هاضت بفكري تعابير
واستيقضت بالقلب قدحة شراره

واستنهض الخاطر كما الطير لاذير
شاف الطرد واهوى عليها بغاره

ولا كما فزّة قــــــــــروم مناعير
سمعوا رفيق مفزع لحفظ عاره

مشراف من عسفان دقوا لهم زير
والفو كما حــــــــــــر تنصا حباره

يالله ترزق مملكتنا باجارير
سيل رحيم ويستقر بقراره

وتذرى صحارينا بعشب وازاهير
يسعد بها ضعف الوحوش وحراره

وبشاية الله غير اعيد المداوير
وانفض عن الخاطر ركايم غباره

واطوع العاصي بليا محاذير
وارد للخاطر جلالة وقارة

واسرج على الكايد بغارات تحرير
لين الوهن يعلن قرار انتحاره

وصلاة ربي عد فوح المعاطير
واعداد مايرمي الحجيج الجماره

علي نبي بدل الشر بالخير
واستامن المسلم على حق جاره

ودمتم في حفظ الله

__DEFINE_LIKE_SHARE__