Stop يا عيال زايد .. ما هكذا تورد الإبل !!

~~ولـد الـمـرفـأ~~ · #1 04-28-2010, 12:40 AM

السلام عليكم و رحمة الله و بركاته

في البداية احب ابارك لفريق الوصل فوزه بجدارة بالبطولة الخليجية

يعطيهم العافية رفعوا راية بلادنا فوق و بإذن الله البطولات دائماً لعيال زايد

و هاردلك في نفس الوقت للأشقاء القطريين ..

بعد المباراة مباشرة بدأت المواضيع و الردود تنهال على خلفية الاحداث اللي صارت
في لحظات التتويج

شخصياً ماعرف شو اللي صار بالضبط

لكن الأكيد دام هذا منظر التتويج !!! لازم بتصير مشاكل و حساسيات بين الموجودين

نعم ليش ما نعترف ان التنظيم ما كان بالمستوى المطلوب ؟!

و ان منظر التتويج المفروض يكون افضل و ارقى من اللي شفناه

كيف يسمحون بإختلاط الحابل بالنابل بهذه الطريقة ؟! امر غريب جداً

و صدقوني لو هالشي صار في قطر او في اي دولة خليجية ثانية كنا اول ناس بنشتكي
و بنطيح فاللجنة التنظيمية و الشرطة و غيره و غيره ...

للأسف اللي صار بعد المباراة فتح لنا باب جديد ( كإماراتيين ) لندخل في مشكلة جديدة مع شعب خليجي آخر ..

كأن اللي صار مع السعوديين و تحديداً جمهور النصر السعودي لا يكفينا ..

كأن اللي صار مع العمانيين في كأس الخليج ما يكفينا ،،

عمرنا ما بنتعلم من اخطائنا و عمرنا ما بنعترف اصلاً ان نحن غلطانين ،،

للأسف قمنا نحب نمثل دور الضحية !! دور الشعب المسكين المغلوب على امره !!

دور الشعب الطيب الودود المحب للخير .. و لكن اللي حوله يكنون له كل حقد و كراهية

دور الشعب اللي يتعرض لمؤامرات من الشعوب الخليجية الاخرى ،،

للأسف يوم عن يوم يالسين نضيع سمعتنا الطيبة و سمعة ابونا زايد الله يرحمه

تعتقدون لو كان عايش بيرضى باللي قاعد يصير منا ؟!

وين وصاياه لكم و اقواله .. و لا بس فالحين نسوي لها كوبي بيست و ننشرها فالمنتديات ؟!

وين اخلاقنا و احترامنا لشعوب و حكام الخليج !!!

ليش نعتقد ان نحن فوق الكل ؟!! و حكامنا فوق الكل ؟!!

ترا مثل ما نحن نفتخر بأنفسنا و حكامنا و ما نرضى بالغلط عليهم

تأكدوا مليون بالمية ان الشعب القطري او غيره ما يرضى بالغلط بعد ..

ليش نفتح على نفسنا باب يديد من المشاكل و نبدأ بالسب و التكبر و غيره و غيره

ليش نكبر الموضوع و هو صغير ؟! و انا متأكد في لحظات كتابة هالسطور ان المشكلة انحلت
او في طريقها للحل سواء بين الشيخ مايد و الشيخ جاسم او الاعبين ..

ليش مصريين على فتح مواضيع و اضافة ردود فيها ما فيها من التحقير و السب لغيرنا ؟!

في ذمتكم كيف ما تبونا نتعرض للسب و نحن نعاملهم بالمثل و نبدأ بالغلط ؟!

ليش تسمعون كلام الاعلام سواء قناة الكأس او غيره .. و تطلعون حرتكم
في المنتديات و تنشرون الفتنة و المشاكل ..

يكفينا اللي صار في موضوع النصر السعودي من سب و تحقير لحكامنا و اهلنا ..

و الله ان كلامهم القاسي اتذكره لين اليوم و عمري ما بنساه ..

نحن مب مستعدين نتعرض لحملة يديدة من السب و الشتائم ..

دخيلكم طلبتكم و طلبت الإدارة و المشرفين و كل شخص عاقل في المنتدى

دخيلكم احذفوا مثل هالمواضيع و الردود و انهوا الموضوع قبل لا يتطور اكثر

ما في فرق بينا و بين الشعب السعودي و القطري و العماني و البحريني و الكويتي

كلنا اهل و نسايب و كلنا عيال الخليج .. و عمرها الكرة ما بتفرق بينا

دخيلكم .. ما نبى الفيلم السابق ينعاد __DEFINE_LIKE_SHARE__