منتدى استراحات زايد - من الشرقية للصمان نصيحتكم ومشورتكم يالربع .

بسم الله الرحمن الرحيم

السلام عليكم ورحمة الله وبركاته

أخواني الكرام .

أسعد الله أوقاتكم بالخير والرضاء والسعادة .

بصراحة أنا ودي الخميس والجمعة الجاية أغير الجو وأبي أكشت للصمان أنا ومجموعة من الربع .

لكن قبل كل شي ودي أعرف بعض الأمور بصراحة أول مرة أطلع للصمان :

1- الطريق من الشرقية من وين ؟ يعني أمشي للرياض ومن هناك للصمان أو فيه طريق من الدمام للصمان سواءً بر أو إن كان هناك إحداثيات .
2- الربيع ؟ كيف الربيع في الصمان الأيام ذي ؟
3- وش الفياض والرياض اللي تنصحون بها هاليومين ؟
4- الأجواء كيف ؟ الخميس والجمعة ذي كيف الجو بيكون حسب التوقعات ؟
5- يا أخوان مابي مكان يكون فيه خطر مثلاً أنام بالليل وأصحى بوسط السيل .
6- تشوفون يومين تكفي ؟ وإلا ما أتعب نفسي وأقلبها للنعيرية ؟
7- بالنسبة للحلال فيه أهل حلال هناك يعني نشتري الذبيحة من عندهم ؟ وعلى كم ؟

يالربع ترون ماقد طلعت قبل كذا .
معلوماتي بسيطة جداً عن طلعات البر وهي فقط أثناء المهمات الرسمية . وخبركم المهمات كل شي جاهز .
نصايحكم الله لا يهينكم .

والمعذرة بتعبكم شوي .
الله لا يهينكم .

أخوكم أسير الشرقية .