|
من سواليف راعي العجراء ( قصة الخروف والشماغ ) لسلام علاكم ورحمة الله وبركاته اليكم سالفه شماغ العيد والضحيه في سنة من السنين قرر راعي العجراء ان يضحي لجده رحمه الله ووالديه فقبل العيد اخذت اجمع ريال ريال قرش قرش حتى وصل مجموع ماعندي 40 او اكثر او اقل منها قروش حديد هلل فئه اربع قروش لو يطيح على اصبعك مابغيت غيرها يواسيه مع الارض من ثقله وقرش وقرشين وكانت الغنم رخيصه ذلك الوقت 150 ريال اطلق ضحيه من النوع النجدي هذا بعد ارتفاع اسعارها وبالسايق اقل من مئه ريال المهم قال الوالد رحمه الله ابروح اشتري ضحايا قالت بعد انا ابي وحده اضحي بها لجدي قال كم معك قلت هالكثر قال مايخلف اكمل الباقي فرحت اشد الفرح حسيت نفسي اني رجال وانا توي صغير ماغار اروح للمرأيه اشوف اشنبي هو طلع والا لا وبالصحيح لو اسحبه بزراديه ثلاثة ايام ماطلع شعره وحده طويله شرينا الضحايا وجبناهن بالبيت قالت الوالده رحمها الله مادامك تبا تضحي اجل ابشتري لك شماغ صرت رجال ويوم حسيت اني كبرت زياده في عيني وكان من اول تجي الشمغ لفه كامله ومحدد محل القص مثل السماط ولكن يابسات لازم تغسل قبل راحت امي للسوق واشترت شماغ وطاقيه عليها رسمات ورد لاشفت شكلها تقول مطرحه فراش المهم زادت فرحتي افراح وقبل يوم العيد غسلت امي شماغي الجديد وحطته على الحبل حتى ينشف في بطن البيت او مثل مايقولون اهل الرياض في بطن الحوي والبيوت هاك الزمن من الطين المهم جاء الليل ونمت بدري حتى استعد للعيد ابكشخ بالضحيه والشماغ والطاقيه والثوب الخام مثل كيس الطحين من اول ولكن ماهي مفاجئه يوم العيد الخروف طلع من الحوش واكل شماغي اللي على الحبل وغص فيه ولاقدر يطلعه وربعه الدبش ماواحد منهم فزع ماغار مباع مباع المهم الخروف مات والشماغ ماكول مابقى الاطرفه تقول فتيلة اسراج بحلق الخروف ويوم صحيت الصبح وولا الخروف رافع كراعينه وشماغي راح الله يخلف مابقى الا الطاقيه زين امي ماغسلتها وتلاشت احلام راعي العجراء ورجعت كما كنت صغيرا والله يعوضنا خير وخذ ياصياح الناس تعيد وانا عيوني اتقول اسطبات جمحيات اللي تجي على الجموس فقال الوالد اسكت وباكر اشتري لك ضحيه قلت لا ماابي الا خروفي كن مايضحي الا ذاك الخروف ولكن الفرحه راحت مع يوم العيد الاول انتهت السالفه وارجوا منكم ان تتقبلوا سواليف راعي العجراء برحابه صدر وفي الختام سبحانك اللهم بحمدك لااله الانت استغفرك واتوب اليك |
| الساعة الآن 07:39 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir