|
اذا بغيت تمزح 000 لاتزعل بسم الله الرحمن الرحيم السلام عليكم ورحمة الله وبركاته اخواني واخواتي المكشاتيه مشرفين واعضاء وزوار اسعد الله اوقاتكم بكل خير الظاهري حبيب الكل يقول وين السوالف مايدري اني هاوي ماني محترف مثل اخيي الغالي راعي العجراء اللي انا مستحي ومتفشل منه من كثر ما اطلبه من سوالف عمته منيفه بس هذا كله على شانكم واليكم هذه السالفه اللي ماهي بمستوى سوالف راعي العجراء لكن الجود من الماجود هالسالفه حدثت في ديرتن من ديار نجد وهي قديمه ولا هو بلحيل والوقت طبعا بالقيض هذولا ثلاثه واحد فلاح واثنين من هالشباب المتعلمين الفلاح بغى يمزح مع هالاثنين الشباب وفعلا عزمهم على العشا عنده بالبيت وبيته طبعا بالمزرعه المهم جا عقب الاخير وجوا الشباب على الموعد قابلهم الرجال ورحب بهم وفرش لهم برا قدام البيت وجلسهم ويا هلا ويا مرحبا وقال عن اذنكم اجيب القهوه دخل البيت الرجال وطلع من الجهه الثانيه وراح يسير على جاره واقعد عنده وهات سواليف وتعلل وخلا الشباب على فرشتهم الشباب هزو واحترو معزبهم لكن ماحولك احد ايه عرفوا إن الدعوه فيها شيء وان الرجال سواها فيهم قالوا هين دواك عندنا وقاموا وتوكلوا على الله مرة فتره بسيطه والشباب يخططون على معزبهم اللي ما قدم لهم الا فراش وبليله من الليالي وقفوا الشباب على بيت معزبهم ضربوا بوري وطلع لهم سلام عليكم السلام طبعا ما عرفهم واحد لابس افرنجي بنطلون وقميص00 خواجه خالص يرطن انجليزي والثاني مصلع وكاد الشعر ومسوى نفسه مترجم للخواجه وزابط دوره00 قال لهم حياكم الله اقلطوا قالوا لا بعدين حنا لجنه من وزارة الزراعه وجينا لفرع الزراعه اليوم ودلونا عليك لاننا قلنا لهم نبي مزرعه تكون احسن مزرعه بالديره على شان نسوي عليها تجارب وبعدين نمنحها جائزة وزارة الزراعه مع مكافئه ماليه تشجيعيه وهذا الخواجه خبير زراعي ويبي يبداء على طول تعرف الخواجات وخل هل البيت يسون لنا عشا ولاقاضينا من المزرعه نتعشى دخل البيت وقال لهم اذبحولنا تويس وسووا لنا عشا وجاء للخواجه وقال سم انا تحت امركم وش تبون بس آمروا قالوا اول شيء نبي مصدر الماء من وين قالهم من القليب قالوا ودنا لها راحوا للقليب يوم وصلوا للقليب رطن الخواجه اللي من اليوم مسكت قال وش يقول قال المترجم 00الخواجه يبي يذوق الماء قام الفلاح واخذ طاسه بجنب الحابوط واغرف وعطه 00رطن الخواجه قال المترجم الخواجه يبي ماء من تحت من الجمّه نزل رفيقنا مع الدرجه للقليب ومعه سطل وازعب من الجمه بالسطل واطلع به لهم شرب الخواجه ورطن انجليزي وترجم خويه وقال الخواجه يقول الماء ممتاز ماعمره ذاق مثله تشطر الخواجه والله يكرمكم قام يتبول وهو واقف قال المترجم هذولا هم النصارى وهذا طبعهم لاتشره قالوا الحين تجيب لنا من منتوجات المزرعه من كل نوع عيّنه على شان نذوقهن وكان عنده عنب وجح وجراوه فسّخ ورمان وترنج وتمر ويشرطون عليه انه يرقا النخله الطويله ويخرف من القنا المهم بهذلوه بهالليل ولم العشا وجابه لهم وقعد الفلاح والمترجم يتعشون اما الخواجه عيا لا ياكل الا خنزير والفلاح يقول ما عندي خنازير الا خنازير لساتك وعقب ماتعشوا مشوا ويوم جاء الصبح وهو ينطلق الفلاح لفرع الزراعه وينشدهم عن اللجنه اللي بها الخواجه قال مدير الفرع لا شفنا لجنه ولا خواجه ولايحزنون قال اكيد قال اكيدين دخله الماء وشك الرجال ورجّع الشريط وبعد هذا عرف ان اللجنه هم ضيوفه الاولين وعلى طول يروح يشكي عند الامير لان هكالوقت مابه شرطه بديرتهم المهم الامير حضر الجميع وسأل الشباب انتم اللي سويتوا هالسواة قالوا نعم بس يالامير اسالنا ليش سويناه قال الامير ليش وعلموه بالسالفه وانه هو اللي بدا وسأل الامير الفلاح صحيح اللي قالوا 00قال صحيح بس يالامير سواتهم ما تنتسوى قال الامير للفلاح قم00 قم 00مالك شيء وانتهت على كذا اتمنى انها تجمّل وسلامتكم محبكم النبهاني |
| الساعة الآن 12:33 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir