|
الـــخـــلــوه ومـن طـرائـف الـقصـص الـمـؤروث الـشعـبيه ::مـــحــمــد الـــظـــاهـري السلام عليكم ورحمه الله وبركاته اخواني مشرفين واعضاء وزوار مكشات اهلاً ومرحباً بكم وحياكم الله في الخيمه الشعبيه واشكر من سرد لنا من القصص الجميله والتي لا تعارض شروط هاذي الخيمه لا اطيل عليكم واترككم مع السالفه واتمنى انها تحوز لكم والسالفه ذكرني فيها الاخ الغالي /النبهاني ...صاحب الابدعات الجميله وذكرني في قصته التي في المسجد في موضوع السمع الثقيل سالفتي التي ان اسردها لكم هي من المواقف الطريفه والتي حصلت في المسجد اخواني تعرفون قبل 50سنه ايام بيوت الطين قبل المساجد الي من الطين يصير فيها خلوه والخلوه مثل القبو وسبحان الله الخلوه في الشتاء تصير دافيه والصيف تصير بارده وسجلسون فيها بعد الظهر في سنه من السنين وفي ايام القيض كان فيه مسجد في احد الديار ووبعد صلاة الظهر كانو بعض جماعت المسجد يقيلون في الخلوه او يجلس له كم ساعه وكل واحد يروح لبيته المهم الجماعه قيلو في الخلوه وكل واحد في مكان الي منسدح والي يقراء والي يسلفون وكان الإمام جالس في زاويه والمئذن في زاويه وكان فيه خلاف بسيط بينهم والله يبعده عن المسلمين عن الاذان او غيره ويوم انهم جالسين وينزل عليهم هاك الواحد المتين الطويل وهو نص لفه يعني مجنون شوي ماهو كل هاذا ويوم نزل ومعه هاك السيف حااد ويفكر بالي جالسين وإلا يصيح عليهم ويقول مافيكم الي يخاف الله ما فيكم الي يخاف الله والرياجيل تقامزو وكل واحد يسئل الثاني هاذا علامه هاذا وش الي سلطه علينا ويتشجع هاك الواحد ويقول انا اخاف الله قالهالمجنون / انت تخاف الله قال ايه نعم اخاف الله قال المجنون اجل تعال معي ويروحون ويطلعون من المسجد والي في الخلوه خايفين على خويهم ويقولون لا يكون يبي يسوي فيه شي والمهم المجنون والي معه طلعو للشارع ولا هاك العنز المدعوسه واتنافظ من الموت قال المجنون / ان كنت تخاف الله ريح العنز وذكها قال ابشر وهوياخذ السيف و يذكيها ويحط السيف على جنب عشان يسحب العنز عن الشارع وإلا المجنون ياخذ السيف وينزل ويدخل المسجد وينزل للخلوه على الرياجيل ويدخل عليهم ويصيح السيف معه تنقط دم من دم العنز ويقول مافيكم الي يخاف الله وما فيكم الي يخاف الله وإلا الجماعه خافو قالو المجنون ذبح فلان قال الإمام/ايه المذن يخاف الله قال المذنـ /تكذب انت الي تخاف الله قال الإمام/ لا والله انت الي تخاف الله إل قال المذن / لا لا يكذب عليك هو الي يخاف الله ولا خويهم الثاني الي ذكا العنز داخل عليهم ويسئلونه وش العلم يابو فلان قال ابد عنز مدعوسه وذكيتها وهو الي يطيون من الضحك وويضحكون من ردت فعل الايام والمذن اخواني ارجو ان القصه حازت لكم وهاذا ذكرت على من يوم قريت قصه الاخ الغالي علينا / النبهاني ارجو ما اقدمه يكون فيه شي من الاستفتده والمتعه واعذروني ان وجد اي تقصير هاذا حد جهدي وانتظروني في سالفه اجمل بأذن لله و تقبلو تـــــحـــــــــيات مـــــــــــــحـــــــــبــــــــكـــم مـــــحـــــــمــــــد الــــــظـــــاهــــــري |
| الساعة الآن 06:20 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir