منتدى استراحات زايد

بياع الدهن

في السنين الماضية يوم كان الناس يشتغلون بالحجر والطين والفلاحة وشغل الحرفة لأهل الديرة نفسها مهوب للناس اللي برا، فمثلاً استاذ البنيان يأخذ العمال القويين والنشاط واذا شاف له واحد ضعيف قال له باكر لا تصبح ولا تجي العمل تراك ما تصلح وفيه ناس مثلاً يشتغلون مع العمال بالجازة اللي هي انه يشتغل بملي بطنه يعيشونه او يغدونه بدون راتب، الحاصل، انه مرة من المرات هاك الولد جا قرية من قرايا نجد ولد شاب عمره في حدود 19 سنة او عشرين الى واحد وعشرين سنة لكنه ما شاء الله الرزاق شاب طويل ونحيف وجاي يترزق الله من قريته الى هالقرية ولا لاهله الا هو والا اهل ها القرية مشهورين ببيعهم وتجارتهم، اهل بيع وشراء دايماً مع البدو في السمن والاقط والصوف فالولد هذا يدور شغل وطبعاً ما فيه شدة لشغل الطين وشيل اللبن والشيء الثقيل وصار يدور شغل وكل من شافه نحيف قال ما يصلح للشغل لو يشتغل مع واحد يبني ماله شدة يشيل لبن ولا شدة يخلط الطين فجلس الولد يترزق الله لعله يشوف شغل، قعد له يوم يومين ثلاثة ايام من الايام مر واحد من تجار الديرة في السمن والا يدور عامل رخيص يبي واحد بالجازة ان حصل يعني ملي بطنه لانه شحيح قال يا الله حيه من انت ولده؟ قال انا ولد فلان قال مالقيت شغل؟ قال لا ما لقيت قال والله يا ولدي انت الظاهر بجسمك هذا ما ماظنيت انك بتلقى شغل ان كان هذا مشيك وجسمك ما هقيت تلقى شغل؟ وكنك بعد منتب تاكل، المهم انه حطمه زيادة ولا شجعه، قال شف الله يصلحك يا وليدي اذا جا واحد بالجازة قل ما يخالف اشتغل عنده ودور الرزق وهو قصده يبي يؤيده وعقب يومين او ثلاثة مر من عند الولد الصبح والاه في وسط الديرة حول المسجد، هاه يالله حيه قال انت الى هالحين ما لقيت شغل قال لا والله ما كتب لي الله الشغل، فا التاجر الظاهر اني ابشير عليك قم يا ولدي دور لك ديرة ثانية غير هذي يمكن ما كتب الله لك فيها رزق قال الولد لا بيرزقني الله ان شاء الله المهم عقب يومين رجع التاجر ولقاه الى هالحين ما لقي شغل قال له تدري عاد مهوب باكر، عقبه ابلقى لك شغل انت شاء بس هاه الله لا يدري احد هاه قال زين ويوم جا نهار ثالث ويجيبه والى الولد من اسرة طيبة وعليه ثوب خفيف حتى انه اذا جا يجلس يرفع ثوبه لا يتقطع ولا يرتكي على الجدار واجد ولا يتحكك به في الجدار ما عنده الا هذا الثوب وقام التاجر الشايب قال تعال وانا ابوك، يبي يشغله عنده وفعلاً راح معه لبيته يوم دخله ذاك الدهريز في بيته والى الشايب هذا شديد على الدنيا، قال شف يا ولدي انت في هالمكان لا تعلم احد يخاف انه يطلب راتب يركده يبيه يرضى بالجازة قال ان شاء الله مالك الا اللي يرضيك والولد هذا صحيح انه ضعيف ولكن جسمه نظيف ولا فيه عرق، المهم ان التاجر هذا دخله في دهريز والى فيه اللي يسمونه الاولين منقوله، المنقوله مثل الجمادان اللي يجي فيها موية البطاريات بس انها كبيرة هالرجل هذا الى حنا نحكي عنه يشتري من البدو السمن رخيص ويجمعه في هذي المنقولة ويخلطه جميع واذا امتلت المنقولة بدا يفرغه في تنك ويلحمهن ويجبلهن ويبيعهن المهم نادى الولد شف ترا هالدهريز ما فيه احد ولا يمرك ولا يشوفك احد من اهل البيت وخلك مرتاح افصخ ثوبك وعلقه بهالوتد لا تخلي عليك الاهالسروال، قال شف هالتنك المصفوفة ترا ما هنا شغل يسوا وهو يبي يركده على شان ما يطلبه شي قال شفت ذي اللبنة ارق عليها واغرف السمن من المنقولة وعبه في التنكة وانتبه قم جب التنكة وقربها من المنقولة وصب السمن في التنكة شوي شوي وانتبه لا ينكب السمن ترا السمن غالي شربناه بها كالعدد، يوم قرب الولد التنكة شاف التاجر ان الولد بيغرف السمن بسرعة قال لا لا اصبر اوقف تعال خل التنكة شف وش تحت المنقولة قال الولد هذا اللي نحن المنقولة هذا نمل قال الشايب ايه نمل بس هو حي والا ميت؟ قال ميت قال شف ليه ميت قال هذا ميت من الجوع لأنا ما ننقط السمن ومات من الجوع ها انتبه اذا جيت تصب صب بالهون وغط المغراف وقربه من اثم التنكة فهمت وانا ابوك؟ قال فهمت ودلى الولد يغرف ويصب السمن لين ما عاد بقى الا شوي بالمنقولة بس في قاععتها وصار ما عاد يطول ودلى يتطيول كنك تشوفه بعض يرطمه الى صار يصب المهم عبى التنك وقال للشايب هاه يا عم خلصت المنقولة قال لا لا افصخ ثوبك وطب في المنقولة وابد اسلت السمن من جيلان المنقولة، الين الولد غرف كل شيء قال ها خلصت قال لا والاه كلما غرف شوي عطاه مغرفة اصغر ويوم نشده هاه خلصت قال ايه قال لا خذ الملعقة كمل المهم يوم جا بيطلع الولد من المنقولة والى جنوبه مليانة دهن قال خلاص يا عم ما بقا شي ابطلع قال لا تستعجل الحين ابدربيك من المنقولة للشمس وشفني جايب طشت اطمر من المنقولة للطشت انت تدري ان نصف دهننا في جسمك بس لا تعجل لين اقول لك قال زين.
الشايب يدربيه لين حطه بالشمس قال هاه لا تطمر ولا تلمس رجليك الارض اطمر من المنقولة للطشت على طول ترا كل دهننا على جسمك قال طيب وطمر والاه في الطشت وقعد في هالشمس، شمس حارة الحاصل قام الشايب يسلت ويحك هالضعيف الوليد بهاك الملعقة لين صار جلده حمر كنك مطلعه من ماء حار المهم ان الرجال اوذى هالضعيف الوليد او ذاه بالشغل ما صدق الولد يفتك منه المهم هالولد قال الله لا يعيده ولا شغله وراح يدور شغل ثاني.

هذه قصة فيها عبرة حقيقية للبحث على طلب الرزق وعن بعض هالناس المقترين البخلاء ولا شك ان شغل هالولد عند الرجال البخيل طلعه رجال وعرف ان القرش يجيب القرش واللي علموني بها السالفة هذي يقولون ان هالولد صار من أكبر تجار الدهن بسبب ما تعلمه من هالشايب ومن حرصه على الريال