يا زين مسرا تالي الليل للصيد=في عزلتن ما داج ضان بجلدها
فيها الفنون مزهّر بقاصي البيد=والضب الاصفر سارحن في رغدها
يرعى نواوير الزهور المجاديد=تلقا المكون مسوحبه في بيدها
تبني شحم ما صبحتها البواريد=من باذر المرباع يسمن جسدها
والقايله بالرمث دون الجلاميد=يطرقها نسناس الصحاري وحدها
ما عندها غير الدرج والهداهيد=وصرير مكثور الجخاخ بصلدها
سجيت فيها ما خطرها الاجاويد=ما غير ولبه هايمه مع ولدها
مريت دوحه بالسهول المباعيد=اليا بغا النجاع يبرد قصدها
كن الظلام ارخى عليها السواويد=ومن الروي زاد البريض وعقدها
ارخيت فيها ما شكيت الملاهيد=في جلستن من شافها ما نقدها
على لهيب النار بيضا البغاديد=مع تمرتن قرم الفلايح ضمدها
اطورق القيفان من دون ترديد=وازيد لابيوت القصايد جددها
حطيت بالقدر الخلوب المزابيد=ثرب المكون اللي شحيمه غددها
والبيض فيها مثل بعض العناقيد=شبايه البرحي بحزة نضدها
تصير حباة الوليمه مطاريد=نثريتن زيت السلايق فردها
هذا الخلا ما فيه ربطه وتقييد=مثل الوظيفه ثابته في بلدها
قور الصحاري طاردات التناكيد=مرتاح نجاعن مشاها ورقدها