جتنا الذواري من شمال وجنوبي=تسفى علينا بالصحاري ترابه
تناسج الرمل الحمر بالدروبي=والقاع يوضي بالقوايل سرابه
حتى الحليب يخلا وقت ويروبي=خطير يجهز في زمان احتلابه
والثالج بلحظة طلوعه يذوبي=والقيظ لافوحه تزايد لهابه
واتشوف ضبان الخلا بالدعوبي=ترعى الفنون اللي سقته السحابه
تبني على الجنبين شحم الخلوبي=والورك من طيبه يزيد اكترابه
وانياقها ترعى رميم الخبوبي=والهرش الاصفر قد تقافا ضرابه
والقربه اللي محتواها العذوبي=دوامة الارياح تلوي قضابه
قاع الوطا يبست عليه العشوبي=ما باقي الا معشبات الشطابه
هذي هي الدنيا سواة اللعوبي=حذراك منها غدرها كالذيابه
يالروح للطاعه تعالي وتوبي=لا تاخذين من الصدود الخيابه
ترا المعاصي بالخلايق تلوبي=والنفس تجني بالنهايه حسابه
اما لها الجنه حياة الطروبي=والا على صالي جهنم عذابه