|
ليش في هالزمن المواطنين مايحصلون شغل؟؟ (اباكم كلهم تشتركوووون لان هالموضوع مهم وايد) السلام عليكم جيف حالكم اخواني و خواتي؟ عساكم إلا بخير و عافية؟ انا اليوم ابا اطرح عليكم موضوع شوي بتستغربون بس بينفعنا ابا اتكلم عن الامارات بشكل عام...شوفوا كم وافد و اجبني في بلادنا و الهنود... اكثر عنا نحن عن عدد شعب الامارات. احب اقول ان ليش نحن المواطنين من شعب الدولة مانخدم دولتنا بإيدنا ليش نحن مانشغل و نجهد في الشغل. العمل مب بس بيزات الواحد يآخذها آخر الشهر ينعفه, الشغل يخدم الدولة و يطورة للأحسن. تعرفون ليش المواطنين في هالزمن ليش مب لاقين شغل؟ لان الوافدين مآخذين كل اشغالنا. طبع العرب بشكل عام يعجزون عن العمل و التعب الزايد. في وايدين مواطنين يوم يرحون الشغل يوعقون اسمهم و طلعون يحوطون في مقاهي. ابا اعرف ليش هالتعامل هذا؟ الشغل مب تعب اذا صدق تبا تخدم وطنك. حلات البلاد اللى شعبها هم يشتغلون..ياحلاة الاحساس اللى يضربنا يوم انشوف بلدنا تقدمت للأحسن بإيدنا. ياخواني و خواتي علينا ان نشتغل و نثبت للاجانب و الوافدين و الهنود ان نحن احسن عنهم ترا الحياة مب كلها راحة في راحة. نحن اذكياء و اذكي عن كل غريب دخل بلادنا و اشتغل بس نحن مانستغل هالشي عندنا الخير الحمد الله بس هذي الحياة. الفكرة هذي غلط في غلط ياخواني و خواتي اباكم اتناقشوني في هالموضوع المهم جدا وابا كلنا نشترك فيه و نطرح حلوول حق هذي المشكلة وسامحوني ع القصور اختكم فلاحية اصلية;) |
وعليكم السلام هلا ختيه والله الموضوع طررر ومن كم من يوم ارمس ربيعتيه بهالسالفة بس هب راضية تقتنع اتخيلي نسبة العمالة الوافدة في دولة الامارات 81% وين الشعب يعني حرااااام اتخيلوا ختيه متخرجة من 3 سنوات وهب لاقية وظيفة لا تقولون ان المواطنين مايرضون برواتب ظعيفة بالعكس حننا نحترم كل الوظايف ... وانا واااااااايد استانست اليوم يوم شفت مواطن يشتغل ف كارفور صوب الامانات يعني حسيت ان اهم شي عنده وظيفة اتييب رزق حلال .. اللـه يوفق كل خواننا وخواتنا واتمنى ان الدولة تقلل من نسبة العمالة الوافدة اللي ظررها اكثر عن منفعتها .. لج احترامي ختيه واترقب تعليقات باجي الاعضاء وسوالم |
وعليكم السلام والرحمه والإكرام الحينه بنمسك جانب جانب .. ( الهنود ) ببتدي فيهم : لأنه مستحيل ومن سابع المستحيلات ان مواطن يشتغل شغلة الهندي او النيبالي .. لأسباب عديدة .. - اعمال البناء .. مستحيل يجي مواطن ويشل الطابوق والسميت ويطلع ويربع عشان عمل البناء والعمارات والأبراج ، لأن بكل بساطة المواطنين هب متعودين على عمل البناء والعمارة .. -الكفتيريات والمقاهي ... أحيد ان شغلة المقاهي هي شغلة الهنود والفلبينين ولا نيباليين ، وشي يطيب يوم نشوف ان المواطنين يشتغلون فالمقاهي ، بس ظني صعبه شوية لأن الممارسة والخبره يبالها تفرض وجودها قبل اي شي .. - التكسي واللموزين..يعني مستحيل يركب حد والماوطن يسوق ..تخيلي لأن اغلب المواطنين مرفهين ومايحب حد يتأمر عليه ( وديني وتعال وسير ورد ...ألخ) .. - الشبرة والجمعية .. انا ماقصد ان الأمور هاي ( عيب ) على المواطن العمل فيها ، ولكن شي صعب ان نفعل دور المواطن ببيع الخضرة مثلا ولا يحمل اغراض الجمعيه ويوديها للسيارات شرات مانشوف فالجمعيات وغيرها ..الخ .. - الخياطين .. مستحيل اشوف اماراتي يخيط ، لأن المهنه معروفة وبأمتياز انها حكر على الهنود ولا النيباليين , واسمحي لي حتى بالنسبة للنساء .. صحيح عندنا مصممات اماراتيات , ولكن كل واحده رافعه خشمها واسعارها داقة السقف ..! بالنسبة لإخوانا العرب.. معظمهم لديهم ( طولة البال ) في العمل كما ذكرتي سلفا ( ان المواطن يوقع ويظهر )مافيه حسيب ولا رقيب( لا على نفسة ولا من الآخرين) ، كلل وملل ، وآخرته ( راتب آخر الشهر) واكثر من الاجانب ، لو لاحظتي ان الأجنبي يسعى لإكتساب المهارات والخبرات والالتحاق في دورات .. بينما المواطن يتهرب ودائما ملول ومتكدر .. العلاج لهذه المشاكل .. - ادارة التخطيط ، تسعى الآن لحل مشكلة او ازمة ( الخلل السكاني ) او اللي يسمونها ( الخلخلة السكانيه) بترحيل جميع المخالفين من ارض الإمارات.. -المواطن يجب ان يتحلى بالصبر ، والسعي في العمل مهما كان التعب .. خدمة الوطن انت مجبور فيها لأنك تنتمي للوطن ( اذا عندك انتماء وطني ) لأني اشوف اجانب وايدين عندهم وطنية وذمة وضمير في العمل .. والأهم ( التفاني في العمل ) - الدعم المعنوي ، مثل مالاحظنا في امارة دبي ( جائزة العمل الحكومي) فيها تكريم لشخصيات مواطنه وغير مواطنه ، لأن الشيخ محمد بن راشد يهمه ( جودة العمل ) اكثر من مجرد صورة او حبر على ورق!! انا اشجع وبكل قوة على مثل هذه الجوائز لأن الإنسان وكل شخص فينا يحب ان يحظى بترحيب واشاده من شخصايات عديدة الدولة دائما تسعى (لإعلاء) صوتها وصورتها ، فيجب ان يكون المواطن ( قدها وقدود) ، ولكن مع ( التوطين) الاحظ ان الكثير من المواطنين يسعون من وراء عملهم للأفضل لخدمة الدولة على اكمل وجه ، واعطاء صورة مشرفة ومرضية عن مواطني دولة الإمارات العربية المتحده ، ونتمنى ان يجد المواطن ضالتة ويثبت جدارتة على اكمل وجه ، وبالتحديد في العمل الميداني المحلي .. |
تسلمين ياختية مدية على التعليق و انا لاحظت ان قليل من الموضفين اماراتين يشتغول في وضائف ذكرتيها بس اخوانا و خواتنا نسوا شي ان اي عمل بسيط بيفيد البلاد و المجتمع وكلنا نفتخر يوم انشوف مواطن في اي وضييفة. وهذا الزين يوم ان في مواطن يشتغل و يجد في شغله و همه الوضيفة وانا وااااااااااااايد مستااااااانسه لانى سمعت هالشي منج. واي وضيفةبسيطة تخدم الوطن. و الوطن ماعندها وضائف معينه خدمها ومشكورين |
][®][^][®][والله الواااافدين هب مخلين لنا شي يناشبونا حشى هذه بلادنا ونحن اولى منهم الله يكون في العون يسلمووووووووووووووووووووووووووووووووووووو الشيخه والله يعطبج العافيه][®][^][®][ |
| الساعة الآن 10:29 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir