الطير والصقار واسهول الاقفار=والعافيه معها الدلال المباهير
تسوا قناطير الذهب داخل الدار=حتى ولو تبر الذهب بالمقاصير
يا ناقل الطير الوحش راعي الكار=تطريك بالبيدا طوال الحناجير
يروون من فعلك على كل مشوار=اليا جنيت غذاك باقصى المشاوير
ممشاك من دارك اليا روس الاوكار=اللي بها العنقور دونه معاسير
ما همك لفوح السمايم بالاسفار=ولا همك البرد الشديد بعثامير
جبينك استملس على ثاير النار=دخانها عندك نسيم النواوير
اليا مشيت بخاليه ما بها القار=ما حولك الا الذيب فوق العناقير
جتها الهماليل الضحى ما بها غبار=ما غير عودان الطلاح المكاسير
تدير باللايذ هوادي على اوجار=فيه الرماد سواة منثالن بكير
عليه رسلانن بها البن وابهار=وابريق شاهي مستطيبن بتخدير
وتلقى المواطي للحبارى بالاوعار=يبرا لها الخرب بعزاز المشاجير
واتلوبد بعرفج نبت بين الاحجار=والاخر برمث الدعوب المقاطير
والطير يكفخ يلوي الخيط محتار=واقصيت له خرب الدعوب المزاهير
وارخى سبوقه وانتهض يمه وطار=ودلا يمومي فوق الاشجار ويطير
ويكوبر الخرب بمقاديم الاخطار=هيهات يابرق ريش جتك المثابير
جاك العديم اللي للارقاب مزّار=تقول باكفوفه صلوف السواطير
هفا عليه من السما تقل جزّار=والخرب صار سواة بعض العصافير
ما فاده التمريش وانحاس محتار=ودلا ينوشه بالكفوف الشواطير
قضى عليه سواة من يطلب الثار=وامسى ثبير القاع ما له دواغير
هذي حلاة الصيد والوقت دوّار=واختلفت رسوم المقانيص بالطير
ما من شرايد والكراوين ندّار=والطير ما له غير سمانه عصير
يا ليت يومن طاف يرجع لو امتار=فيه الصحاري بالمواسم بها الخير
نشوف قرناس البحر فوق الاشجار=يحوم ويهفي ما يشوف المداهير