منتدى استراحات زايد - اخر إنطباع بعد التجربه الدقيقه ل Nokia E52...

سلام شباب ...
طبعا كلنا صرنا عارفين الجهاز e52 من نوكيا .
طيب حبدأ بلسبيات الجوال الي شفتها من استعمالي الشخصي بغض النظر عن فئه الجوال الي هيا طبعا فئه البزنس كلاس .

السلبيات :- الجهاز نحيف لدرجه انو مسكتو ما تقدر تتحكم فيها على طول خصوصا لو كنت متعود تمسك الأجهزه الي لها وزنها زي n95 or n86. لأنو مره خفيف ( ممكن تكون ميزه للبعض) وتحسو حيطيح من يدك .
- الأسبيكر الخارجي مره سيء صراحه ولا ينسمع لازم تلصق ادنك بالسماعه عشان تسمع وخصوصا لو كان في مكان شويه ضجه زي المطار مثلا .
- السماعه الداخليه للجهاز احيانا تظهر مشكله كانو الصوت صار معدني شويه ولو تلاحظو نفس المشكله في السوني ارسكون النحيف C902 والشي المشترك فيهم انهم كلهم سلم زايز.يعني شكلو الحجم له دور في الهاردورير.
- الكاميرا جدا عاديه زي حق ال N70 مافيها اي تغير .
- ايضا صوت الأغاني مو مره عالي والنغمات ايضا يعني بالعربي الجوال جدا عادي بدون اي افكار جديده.

الأيجابيات :- نحف الجهاز ممكن يكون للبعض ميزه كما ذكرت او ممكن يكون يكون عيب .
- البطاريه تدوم بشكل جميل جدا .
- الجهاز ما يسخن بعكس اخوانو في الجوالات النحيفه .
- عملي جدا وخاصه لحقون البزنس .
- النت فيلو سريع ومحترم.
- نظام تحديد المواقع مره سريع وسلس.
- ازرار الجهاز كبيره وتخليك تكتب المسج ونتا مغمض.

محا اطول عليكم لأنو دي هيا ابرز عيوب ومواصفات الجهاز . من الأخر يا شباب الجهاز ينفع للناس الي مايهمتو لأي ملتيمديا ولا صوت عالي ولا شي يعني ينفع للناس الي يمشمو ببدلات سودا وشنطه تلمع كل همهم يخزن ارقام ويرسل مسجات ويقول الو ويقفل الخط وبس.
لو انتا مهتم في الفئه حق البزنس كلاس e خد e71 حتلاقي فيه صفات الملتميديا وشكل البنزنس كلاس .
قيمه الجهاز طبعا اخدتو من حداد الي في مدينه جده : 1330 ريال مع شاحن سياره وسماعه بلوتوث.
اي سؤال انا حاضر

وشكرا واتمنى اني افدت وماضريت .