|
مطوع لالالا ما أبغي .. السلام عليكم ورحمة الله وبركاته شحالكم جماعه الخير عساكم بخير موضوع فـ بالي لانه الموقف صار جدامي وصار لي بس بمعنى ثاني بعد . . شوووووو .... مطوع ..... لا .. لالا مب موافقه انا اتزوج مطوع مستحيل ... >> البنت >>> أنزين ليش يا بنتي شو بلاه المطوع ريال والنعم فيه وما فيه شي ينعاب <<< الأم >> لا ما ابى اللحيه تخرعني ... واستحي امشي وياه فالسوق وكندورته قصيره ماابى .. وبعدين شو بيقولون عني ربيعاتي ... وانا ابى واحد يونسني نروح ونرجع وما يقولي تغشي وإلا لا تحطين مكياج .....إلخ <<< البنت .................................................. هذا الموقف اللي صار جدامي . .................................................. . الموقف اللي صار لي . >>> يـ نسايم في واحد متقدم لج وهو من الأهل وريال ملتزم وماعليه كلام وانا متطمن عليج عنده وامج ما عندها مانع <<< الوالد >> إذا الريا لزين وما عليه كلام اللي تشوفه يا ابوي ... الراي رايك انت والوالده انتوا اهلي وتعرفون مصلحتي < انا ...... >>> نسايم ؟؟ !! انتي بتاخذين هالمطوع ؟؟ عيل بيلبسج الغشوه وعباة الراس خخخخ <<< العمه . >> هذا بدل ما تقولين لي مبروك والله يهنيج .. وبعدين ما فيها شي يوم بسوي جيه والله يهدينا اجمعين ع الأقل بكون متطمنه على مستقبل عيالي بيتربون تربيه سليمه .. وين الوحده تحصل واحد جيه الحين .<< انا >>> والله كيفج هذه حياتج بس لا تندمين بعدين وتقولين والله ما يطلعني وما يخليني وما ادري شو . << العمهـ >>> ؟؟؟؟؟؟ !! << أنا .. مب عارفه شقول لها إذا عمتي تقول لي هالكلام . عيل شبقى للغير . ............................ للأسف هذا صار كلام البنات عن هالإنسان والأدهى حتى المتعلمات والجامعيات والمدرسات ..! لايريدون من يتبع سنة الرسول عليه افضل الصلاة والسلام يستحون من مرافقة من يتشبه بحبيبنا ورسولنا .. لم يعوا قوله ( سبحان الذي زين الرجال بلحاها ) فعلا ما عرف شقول غير ( كن فالدنيا كأنك غريب ) . بالفعل صار الملتحي والمقصر كندورته غريب أو متخلف في نظر مجتمعنا . أبى اشوف رايكم فالموضوع . علما بأن كثير من البنات لازم يستوعبون معنى الملتزم الصحيح .. ومب مثل ما يدعي البعض وهم مب أهل لهالشي . تقبلو تحياتي اختكم نسايم كلباء |
السلام عليكم ورحمة الله وبركاته رأيي بصراحه الرجال مهما كان ملتزم ولا محافظ لاصار مايعيبه شي ليه تردونه؟؟ ((اذا اتاكم من ترضون دينه وخلقه فزوجوه)) البنت اللي تقول ماابيه لحيته تخرعني!! هذا مهب عذر وبعدين ياحظتس فيه تلقين 1000 من يتمنى هالرجال بهالزمان واللي تقول الملتزم مايخليني اكشف ولا احط مكياج اقولها حتى اللي مهب ملتزم بس محافظ وفيه خير ماراح يرضى ان حرمته تكشف والكل يشوفها.. للأسف البنات الحين هذا تفكيرهن الا من رحم ربي مايعرفن مصلحتهن ولاهن فاهمات المعنى الحقيقي للحياه الزوجيه يشوفن هالمسلسلات ويحسبن انه طرب وفلة حجاج.. نصيحتي لتس: اذا ان هالرجال ماعليه ولا يعيبه شي استخيري واتكلي على ربتس، والله يوفقتس و يكتب لتس كل مافيه خير وصلاح.. آخــوتس: الخــآلــدي |
في خاطري سؤال الاي بنت ترفض المطوع سؤالي تخيل مجرد تخيل انه ما تقدم للبنت الى هالانسان وعنست البنت وعقب جت قدام الله وسبحانه وقال له ليش رفضتي هذا المطوع شوه بتكون ردة فعله...؟ والله فخر لكل بنت انه تاخذ واحد مطوع بس المشكله البنات في هذي الايام يفكرون بطريقه بحته وغريبه حبهم الانفتاح والتحرر .. |
تسلمين اختيه نسايم ع الموضوع الغاوي فعلا هذس حال اكثر البنات.. اتشوفينهم يرفضون الي هو زين و يرابعن و رى الشي!! الغاليه هذا شي يخص الفرد نفسه.. موافقته او رفضه للأشخاص فقط بالأعتماد على حاله " مطوع" او حتى على كشخته و زينته.. وعلى موديل سيارته و حالته الماديه!! الوحده فينا ادور ع الستر منو ما كان الشخص.. دامه ولد ناس و ما ينعاب.. و الله هاديه بدينه.. المفروض انها تصلي استخاره لربها و اتشوف شو الحال عليه من بعدها.. هب ترفضه لأنه مطوع؟! هذي الفئة ما تفكر بعقولها 100% صح.. و الغلطه بيعرفنها عقب ما يتخيرن الشين و بيذوقن الويل منه.. انا لو تقدم لي واحد مطوع ما برده ..يسدني انه ملتزم واكيد بربي اعيالي معاه صح ^_^ والسموحه منج.. هذا مجرد راي |
احيييج اختي نسايم على موقفج الطيب من ها الموضوع للأسف بناتنا غالبيتهن يبن التكشف والسيرة والرده صوب الاسواق والمولات .. وشوفيه المطوع ، غير انسان يخاف ربه ويغار على هله شوفيها !! هل انتي كـ بنت ماتبين ريال يغار عليج ويخاف الله فيج !! تبين القاصي والداني يشوفج متبرجة ، هل ترخصين فـ عمرج ؟!! اتقوا الله يابنات الله يهديكن .. وتذكرن ان الدنيا لها نهاية ومابيبقى الا العمل الصالح ... اخوكم / النعيمي |
| الساعة الآن 11:04 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir