|
تتبع الاثار في جو بارد السلام عليكم ورحمة اللخ وبركاته مسيكم بالخير الجميع حصلت هاذ السالفه معي قبل حوالي 20 سنه في يوم من ايام فصل الشتا البارد كنت في اجازه من عملي حيث كنت في فترة انتداب في الشرطه رجعت من شغلي في مركز الشرطه بعد دوام مدة 15 يوم وصلت بيتي فتحت باب الحوش كان البيت مغلق شايبتي شافاها الله وعافاها توجهت لبيت الله الحرام لتأدية العمره واتفقت مع اختي تقضي عندها فتره في المملكه العربيه السعوديه حيث انه زوج اختي يشتغل هناك توجهت لبيت خالي ابو حاتم ابلغت صديقي ابو مرزوق اني موجود في بيت خالي ابو حاتم جا ابو مرزوق لبيت خالي سولفنا فتره طويله وبعدها توجه ابو مرزوق لبيته ثاني يوم الساعه 7 الصبح تقريبا لفاني مرزوق على صهوة فرسه قلي : شايبي ينخاك بمشوار يا ابوظاري عجل ولا تونى قلت : ابشر وانا وضحى والعياذ بالله من كلمة انا اسرجت حصاني وتوجهت لبيتي لبست فروتي الخفيفه وحملت سلاحي وتوجهت لبيت ابومرزوق كان ينتظرني على باب بيته وهو على صهوة فرس تبادلنا طرح السلام وتحية الصباح ابو مرزوق قلي : يا ابن آخي ودي اطلع اقص اثر رجال ودي ترافقني انت ومرزوق قلت له : ابشر بعزك يا طير شلوى ارافقك وما اتونى عنك ابد مشينا كان مرزوق يسبقنا مسافه ويرجع يقول لشايبه ويش يشوف مشينا مسافه حوالي 3 كيلو متر كانت جو بارد هبوب هوا بارد وجاف وصلنا مكان ناظر ابو مرزوق الارض وناظر قدامنا اشر لي بيده وقلي : هناك نستريح 10 دقايق ونكمل طريقنا سألته : من اللي تقص اثاره يا خويي ؟ جاوبني : يا خويي الغالي هاذ حواف سارق محترف ما هي اول يسرق فيها سرق فرس ابو مفلح الحمرا اللي يحرث عليها ارضه وجاني ابو مفلح وطلب مني اقص اثاره مشينا مسافه حوالي 100 متر وقف ابو مرزوق وناظر الاثار اللي في الطين ناظرني وابنه مرزوق وقال : تروحون من الطريق اللي هناك على طرف الشجر ناحية اليمين انا الاحقه من هنا عمر هاذ الاثر ساعه على الاكثر تلاقوني عند شجرات الصنوبر تنتظروه هناك اول ما يوصل تقضبوه رحنا من الطريق اللي قال عليها ابو مرزوق والحمدلله انها طريق منبسطه ومختصره حين وصلنا شجرات الصنوبر نزلنا عن خيولنا وربطناها في شجرة زيتون مرزوق تفقد الارض والطريق قلي الاثار كلها من اول امس ما في اثر جديد مرزوق مثل والده قصاص اثر وخدم في العسكريه قصاص اثر مدة 17 سنه وانهى خدمته برتبة ملازم نجمه على الكتف قلت لمرزوق : اسمع يا خوي روح هناك واجلس تحت شجرة الزيتون هناك انا والعياذ بالله من كلمة انا اجلس تحت ذيك الشجره اول ما يوصل الرجال اللي قال عنه شايبك نشهر عليه السلاح نقضبه بدون تعب هز راسه مرزوق انه موافق وتوجه كل منا لمكانه وانتظرنا كنت اناظر الطريق من بين الاحجار بعد حوالي 15 دقيقه تقريبا لمحت شخص جهزت نفسي وقبل ما ارفع نفسي واقول للسارق خلك مكانك صار حصاني يصهل مرزوق رفع نفسه وصاح على الرجال : خلك مكانك وصار يطلق النار على الرجال قام الرجال نزل عن ظهر الفرس واخذ ساتر وصار يرد على اطلاق النار قلت في نفسي استعجلت يا مرزوق رفعت نفسي من تحت الشجره وصرت اطلق النار مرزوق استتر بشجرة الزيتون المعمره تقدمت صوب السارق بسرعه وانا اطلق النار صوبه وهاذ الشيء تدربت عليه في العسكريه لا تعطي خصمك وقت يطلق عليك الرصاص توقفت عن اطلاق النار وظليت اتقدم صوب السارق واصبعي على الزناد حين ابرز السارق طرف وجهه من خلف الصخره اللي يستتر فيها اطلقت عليه النار شفت طرف الصخره تفتت شظايا فصابته في وجهه وسمعته صاح بصوت قوي آآآآآآآي تقدمت صوبه بحذر حين وصلته كان انحاش بين الصخور في ذيك اللحظه وصلنا ابو مرزوق شفنا اثار الدم على الصخره توجه مرزوق وامسك فرس ابو مفلح من رسنها توجهت لخيولنا سحبتها وركبناها قفلنا راجعين للديره حين وصلت بيت خالي كانت الساعه 2 بعد الظهر لقيت حريمنا في بيت خالي خالاتي وعمتي ام صالح الله يرحمها واموات المسلمين وشايبة صديق طفولتي حميدي من بنات عمومة شايبتي شبيت نار الله يكافينا شرها اللهم آمييين ****** اللهم آمييين بدت حريمنا يرقين العجين خبزن حريمنا العجين جلست على طرف وشردت بذهني انتبهت حين حطت خالتي يدها كلى كتفي ناظرتها وامسكت يدها وحبيت عليها سحبت يدها وقالت : الله يرضى عليك تعال يمه تغدى معنا ويش فيك منت بخواص على غير عوايدك اشتقت لشايبتك ؟ هزيت راسي موافق امسكتني من راسي وقالت : شايبتك في بيت الله الحرام تدعي لك لا تنسي اني امك ارضعتك مع بنتي ****** انا امك بعد تعال لا تخلي الربع ينتظروك رحت معاها جلست مع اهل بيت خالي اخواني وخواتي اللي تربيت معاهم في بيت واحد حمدنا الله على نعمته وفضله تروشت ورحت مع خالي جلسنا في الديوان مسا ذاك اليوم لفانا ابو مرزوق جلس صبيت له الفنجال شربه هز الفنجال اخذته وغسلته وجلست قلي ابو مرزوق : باكر بحول الله تعالى عندنا مشوار على سوق الحلال لا بد إلا اصدف هالحواف واقضبه واسلمه للشرطه فعلا توجهنا ثاني يوم لسوق الحلال صار ابو مرزوق يناظر وجوه الرجاجيل اللي يمرون عنا ويناظر شمال ويمين وهنا وهناك بعد حوالي ساعه وشوي تقريبا وحنا نمشي توقف ابو مرزوق توقفت ناظرته اشرلي بعيونه على شخص كان يحط على وجهه شاش طبي ويظهر عليه اثار الدوا مشينا صوبه وحين صرنا جنبه امسكه ابو مرزوق من يده بقوه وسحبه منها بقوه وقاله : تعال يا الحواف تظن انك تفلت بسواتك امس ؟ تجمع الناس حولنا قلت لهم : ما احد يتدخل هاذ الرجال سارق امس سرق فرس من ديرتنا . صار الرجال يحاول يتخلص من هالموقف ابو مرزوق كشف عن ساعد هالرجال كان عليه وشم اذكر مكتوب على ساعده ابو عذاب سألته : ويش سبب الشاش الطبي على وجهك ؟ سكت الرجال وما تكلم بكلمه وحده فجأه قلي : انت ويش خصك بالشاش الطبي اللي على وجهي هاذ ماهو شغلك جاوبته : هاذ من اثر شظايا الحجر اللي تفتت بوجهك امس من رصاص بندقيتي . سحبناه من يده وسلمناه لدورية شرطه كانت تتواجد في سوق الحلال ورحنا لمركز الشرطه قابلنا ضابط المركز المسؤول عرفناه بانفسنا واعطيناه بطاقتنا الشخصيه ابو مرزوق قال لضابط المركز : يا حضرة الرائد اشتغل مربي اغنام وشغلتي الاساسيه قص الاثر تعلمتها من والدي وخدمت في العسكريه 20 سنه قصاص اثر حين شفت اثر هاذ الحواف حفظتها ليش اخترت هاذ الرجال من دون الموجودين بالسوق لاني حفظت اثره مو من امس من قبل 4 سنوات سرق 3 نعجات من شخص والرجال اطلقه لوجه الله تعالى اول امس في الليل لفى ديرتنا وسرق فرس لرجال اسمه ابو مفلح وتقدر ترسل لابو مفلح وتسأله اذا حبيت الضابط قال : لا ما في داعي هاذ الحواف له سجل عندنا مزخرف وحافل بالسرقات وعليه 4 شكاوي بالسرقه فتحو ملف تحقيق مع السارق واحالوه للنيابه تم الحكم عليه بالسجن مدة 3 سنوات رجعنا للديره ابو مرزوق سولف لخالي ابو حاتم السالفه من اولها لتاليها رجعت شايبتي للديره بعد غياب دام شهر كانت لحظات من اللقاء مشحونه بقبلات حاره طبعتها على ايدين شايبتي الله يشافيها ويعافيها وهي تسحب ايديها وتقولي : الله يرضى عليك الله يرضى عليك رضى ربي ورضى قلبي وهاذ الكلمات كل شيء بعدها هين / الله يرضى عليك الله يرضى عليك رضى ربي ورضى قلبي والحمدلله اني مرضي عند شايبتي وعند باقي العشيره والحموله وسلامتكم يالربع |
| الساعة الآن 01:38 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir