|
في مواجهة الصل السلام عليكم ورحمة الله وبركاته مسيكم بالخير الجميع امس الاربعاء بعد صلاة الفجر توجهت للمزرعه قضيت شغلي ورجعت للبيت حين دخلت ناظرت ساعة الحائط في البيت كانت الساعه 9:30 بالضبط دقيت على صديقي ابو مرزوق سألته : ويش عندك الحين مشغول بشيئ ؟ قلي : ودي اطلع اتفقد اشجار الزيتون في منطقه تبعد عن الديره حوالي 5 كلم ويش رايك ترافقني ؟ جاوبته : إن شاء الله تعال اشرب قهوه عندي ونطلع سوا قال : إن شاء الله مسافة الطريق اكون عندك طلبت من ام العيال تسوي قهوه وطلعت على حوش البيت اسرجت فرسي العبيه ولجمتها رجعت ودخلت البيت تجهزت اذا ابو مرزوق ينادي ادخلته البيت جلسنا شربنا القهوه وطلعنا صوب الشمال الغربي للديره وهاذ المنطقه جبليه ووعرة المسالك حنا في الطريق نسولف كنا نناظر اثار المنخفض الجوي اللي مر علينا في بداية هاذ الاسبوع ما شاء الله كان محمل بالمطر الغزير من شدة هطول المطر وبرودة الهوا ما ارسلت اصغر اولادي للروضه وصلنا ارض ابو مرزوق تفقدنا اشجار الزيتون وبير المويه ما شاء الله كان مملي بالمويه تمد يدك وتغرف المويه فيها جلسنا في مكان وشبيت نار الله يكافينا شرها سوينا شاي على الحطب قمت من مكاني وتقدمت خطوات رفعت فرع شجرة زيتون وربطته بحبل في فرع ثاني انتبهت على الارض كانت اثار رجول على الطين ناديت على ابو مرزوق قلت : في اثار رجول شخص تعال شوفها . جا ابو مرزوق وناظرها وقال هاذ الاثار من اول امس الاثنين قبل الظهر الصل كان هنا تحرص يا وليدي بسرعه خلنا نتبع الاثر اطفيت النار وحملت الابريق والكاسات في الخرج ومشيت خلف ابو مرزوق وحنا على ظهر الخيول مشينا مسافه حوالي 1500 متر وصلنا طريق ترابيه كان عليها اثار حوافر تابعنا طريقنا حوالي 2 كليومتر بعدها انقطع الاثر لانها منطقه صخريه قفلنا راجعين من طريق ثانيه كان ابو مرزوق يناظر الارض بعيون خبير متمرس في قص الاثر سألته : كم عمر اثار الحوافر اللي على الطريق الترابي هناك ؟ قال : اول امس الاثنين بعد العصر قريب المغرب يعني اقدرها الساعه 5 قلت : وصل الصل هناك وراح بين الصخور ما في مكان يجلس فيه ويرتاح ويريح ركوبته الا مغارة الصنوبره تراها تكشف الديره جاوبني : صحيح يا ابن آخي لكن حدسي يقولي ما راح هناك وتوقف عن الكلام وهو يناظر اثار حوافر اشر لي بيده نزلت عن ظهر الفرس وناظرت الاثار وهي تمتد بين اشجار الزيتون تركنا خيولنا على طرف اشجار الزيتون قلي ابو مرزوق : يا ابن آخي هاذ الاثار ما مضى عليها اكثر من 4 ساعات خلك حذر الصل اسمه من صفاته الحين تلاقيه في المغاره اللي تطل على الواد خلنا نطوقه ونحصره داخل المغاره حاذر انه يفلت منا انت كنت عسكري تعرف كيف ما تخليه يفلت من هالطوق . هزيت راسي وقلت إن شاء الله ما يفلت توكلنا على الله لقمت سلاحي المشطت ومشيت في طريق وابو مرزوق اخذ طريق ثانيه صرت امشي بسرعه وحذر مثل ما تدربت بالعسكريه لين وصلت مكان ناظرت شفت فرس مربوطه جنب باب المغاره تقدمت بحذر وسلاحي بيدي وقفت اركيت ظهري على صخره ضخمه وانصت ما في اي صوت والمشكله ابو مرزوق ما ظهر توترت اعصابي وصرت اضرب اخماس باسداس مضى وقت حوالي 5 دقايق رحت لباب المغاره ناظرت بحذر ما فيها احد كان بداخلها بعض قطع الحطب الكبيره رجعت مكاني مر وقت بسيط شعرت بحصاه ضربتني بذراعي ناظرت كان ابو مرزوق اشر لي بيده على عيونه عرفت انه يقولي شاف شخص قادم للمغاره من خلفي هزيت راسي اني جاهز سمعت شخص يغني هجيني امسكت سلاحي بشكل افقي وكنت اناظر ظل هاذ الشخص حين صار جنبي وقبل ما يسوي اي حركه ضربته باخمص سلاحي في بطنه فانثى لقدام وعاجلته بضربه على كتوفه فوقع على الارض حطيت طرف سلاحي على راسه وصارخت عليه : لا تتحرك مد ايدينك لقدام اي حركه تحاول تسويها اضربك في راسك مد ايدينه بصعوبه لقدام وكان يتوجع من الضربه اللي وجهتها لبطنه جا ابو مرزوق وهو يركض قلي : عفيه عليك يالذيب ما في يوم افشلتني نظرتي فيك ما خابت ابد كان هاذ الشخص معلق سلاحه على كتفه اخذنا سلاحه واجلسته وفتشته من وسطه وتحت اكتشفت على رجله اليمين شي حين رفعت طرف البنطال لقيت سكين رابطها بجرابها على بطة رجله اخذتها وفتشت ظهره وتحت ابطيه ما كان معاه شي ربطت ايدينه خلف ظهره بشماغه اخذناه للمغاره اركبناه على فرسه ابو مرزوق مشى قدامه محدثكم العبد الفقير لله ابو ظاري مشى خلفه ابو مرزوق قله : ضروري تيجي ديرتنا يا صل صارلك حوالي 30 سنه ما جيتنا ويش ذكرك فينا الحين ؟ ما رد هاذ الشخص باي كلمه كمل ابو مرزوق كلامه قارب عمرك من الستين ما في يوم سويت خير كل دروبك شينه سرقه ونهب وسلب ( لا حول ولا قوه إلا بالله العلي العظيم ) مشينا لين قربنا من الديره هاذ الشخص قال لابو مرزوق : من هاذ اللي معاك يا ابو مرزوق ؟ قلت له : واحد من هالناس . قاله ابو مرزوق : لا تسأل عن شي ما يخصك ناظرني واعطاني اشاره بيده اني اتصل من جوالي على الشرطه اتصلت على الشرطه وابلغتهم انا قبضنا على سارق وحنا صرنا بطرف الديره قالوا زين الحين نرسل دوريه تستلمه منكم حين دخلنا الديره كانو اولاد صغار يلعبون بينهم ولدي سطام جا يركض وقفت جنب حجر طلع سطام على الحجر امسكته وحطيته قدامي على سرج الفرس وعطيته اللجام ومشينا ابو مرزوق قال لولدي : ها يالذيب شلون دراستك نشيط والا لا كيف يسوي الذيب على خبري تقول عن نفسك ذيب الليل الاسود الكبير قام سطام ناظر ابو مرزوق وكشر عن اسنانه وصار يطلع صوت مثل الزمجره وابو مرزوق يطلق ذيك الضحكه عرفت من ابن اختي بالرضاعه انها ام عيالي ارسلته يدور سطام لانه طلع من البيت قبل انها تذاكر له واجبه المدرسي البيتي رحنا لبيت خالي انزلنا الصل عن فرسه وادخلناه على حوش البيت اجلسته جنب الديوان حينها قال الصل : وكاد انك اليتيم ولد حسن راعي الشياه . قلت له : صحيح ابوي راعي الشياه وهو في دار الحق لكني رجال فخور بوالدي الجميع يحترمني ويقدرني ولد راعي الشياه قبض عليك وانت المخيف المرعب للناس يكفيك هاذ بعد حوالي 45 دقيقه سمعنا صفارة الشرطه طلعت من بيت خالي واشرت لسيارة الشرطه وصلوني صافحت رجال الشرطه وطلبت منهم يدخلو السياره لحوش بيت خالي نزلو من السياره حين شافوه رجال الشرطه الضابط المسؤول عنهم كان برتبة رقيب اول قال للصل : وين انت ننتظرك من زمان عليك 15 شكوى سمعتك تسبقك سجلك مزخرف بالجرائم دخلوا الديوان وحضر خالي وجلس معاهم قدمنا لهم واجب الضيافه شاي وقهوه سلمته سلاح الصل و5 امشاط رصاص والسكينه قال الضابط : بيتك عامر بالخير يا ابو حاتم كفيت ووفيت ما قصرت بيض الله وجهك رد خالي عليه : ما سوينا شيء هاذ اقل شيء نقدمه لكم الله يعطيكم الف عافيه طلعو من الديوان وهم يفكون الشماغ اللي ربطنا فيه يقوم ينتهز الفرصه وينحاش ما لحق يمشي 4 خطوات تفاجأ فيني اشهرت مسدسي وصوبته عليه قلت له بعصبيه وصوت عالي : مكانك انسدح على الارض وحط ايدينك على ظهرك بالحال فقام بسرعه انسدح الصل على بطنه على الارض وحط ايدينه على ظهره اندفع شرطي وحط الكلبشات في ايدين الصل قلي الضابط : مشكور يا ابو ظاري عطني مسدسك امسكه وناظره هز راسه واعطى اشاره اعجاب كمل كلامه مسدسك شيء رائع لا تفرط فيه رجع لي مسدسي حطيته في جرابه ودعونا الشرطه واخذو الصل للمركز لاجل يحيلوه لجهات الاختصاص والتوقيف هاذ الصل رجال طويل حوالي 180 سنتمترعريض الاكتاف وسمين شوي اسمر البشره يده اليسار اقصر من يده اليمين واسموه الصل لانه يضرب الشخص ضربه وحده يقتله مثل الصل الاسود لدغه وحده كفيله بقتل الانسان اذا ما اخذ المصل المضاد صوره لثعبان الصل الاسود ( تعبيريه ) http://www.mekshat.com/pix/upload06/...431722_994.jpg وسلامتكم يالربع |
| الساعة الآن 09:34 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir