|
قي موسم حصاد القمح السلام عليكم ورحمة الله وبركاته صبحكم الله بالخير الجميع اول امس يوم الخميس بعد العصر كنت راجع من المزرعه للبيت صدفت زوج بنت خالي وكان وما زال من اصدقائي اللي اعتمد عليهم طلع معي بالسياره وكان الجو بارد وماطر قلي : تشرب القهوه عندي في البيت ما ودي اعذار وحنا رايحيين لبيته والمسافه ما هي بعيده قدرتها حوالي 700 متر مريت من مكان وقفت وناظرته اذكر هالمكان كان بيدر للقمح كنا نجيب القمح بعد الحصاد ونجمعه في هالبيدر ويتم درسه بالدراسه ( استخراج حبات القمح من سنابلها ) اليوم هالبيدر مربط للدواب وانتم بكرامه وقفت وناظرته فقام خالد زوج بنت خالي قلي : ويش فيك تناظر هالمربط اول مره تشوفه ؟ قلت له : لا لكن اتذكره حين كان بيدر قمح يا حسافه تغيرت معالم الديره الحلوه بعد ما شربت القهوه عنده توجهت لبيت خالي وجلسنا كلنا الجميع الرجال وحريمنا والاولاد كان خالي يسولف لنا سالفه حصلت بالزمان القديم تذكرت احد مواسم حصاد القمح جدي رحمه الله واموات المسلمين راح مشوار واحضر معاه 6 بعارين لاجل نحمل عليها القمح عقلها تحت ظلال الشجر بحوش البيت ثاني يوم توجه الرجال للقمح المحصود في منطقه تبعد عن الديره حوالي 6 كيلومتر اخذني جدي ومعنا 2 من اولاد خالي ابوحاتم حملنا حموله من القمح على بعير لونه ابيض قلي جدي : يلا يا حمود خذ البعير للبيدر ونيخ البعير هناك وحنا لاحقينك في باقي البعارين والدواب وانتم بكرامه ركبت مهره وسحبت البعير خلفي وتوجهت للديره في الطريق صار البعير يرغي ناظرته وكملت طريقي بعد شوي صار يشد الحبل من يدي ناظرته فصار يرغي بشكل غريب وشد الحبل بقوه وانحاش لحقته مسافه وامسكت طرف الحبل من على الارض وشديت البعير ركبت المهره وتابعت طريقي كل شوي يصير هالبعير يرغي ويصير يشد الحبل في لحظه شد الحبل وانحاش لحقته وامسكت الحبل وصرت اشده والبعير يعاندني ويرغي ويشد الحبل محدثكم العبد الفقير لله ابو ظاري ماله خبره بالتعامل مع البعارين بعد فتره قدرتها حوالي 10 دقايق مشى البعير معي قلت في نفسي : الله يهونها علي مع هالبعير مشيت والبعير رجع هادي واول ما صرت بطرف الديره قام البعير صار يطلع ذاك الهدير المخيف وشد الحبل وانحاش لحقته مسافه وامسكت الحبل وكملت طريقي حين دخلنا الديره انحاش البعير ولحقته داخل الديره وبصعوبه لين امسكت الحبل واخذت البعير للبيدر اوصلت البعير للبيدر هناك صار يرغي ووده ينحاش امسكت بخيزرانه وصرت اشد الحبل واهز الخيزرانه قدام البعير واصارخ عليه خخخخخخخخخخخخخخ خخخخخخخخخ لين جلس على الارض قمت ربطت الحبل بحلقه حديديه مربوطه بصخره ضخمه جلس البعير وهو يناظرني ويرغي حين قربت منه مد راسه صوبي وفتح فمه وحاول يعضني تراجعت للخلف ولفيت من خلف صخره وصرت امد يدي واحاول احل عقدة الحبل بعد عدة محاولات فكيت ذيك العقده ورحت على الطرف الثاني وصرت احل العقده ناظرني البعير بذيك العيون شعرت بنظرات الغضب في عيونه فتح فمه وحاول يعضني تراجعت والهمني الله سبحانه وتعالى الصبر وطول البال مع هالبعير فكيت عقدة الحبل وانزلت حمولة القمح رجع البعير يرغي وحاول يقوم من مكانه صرت اهز هالخيزرانه قدامه واصارخ عليه خخخخخخخخخخخ خخخخخخخخخخخخخ فجلس جبت كميه من القمح وانا اناظره وبكل حذر حطيتها قدامه وتراجعت للخلف بسرعه حين شفت البعير يفتح فمه بعد حوالي 10 دقايق وصلو الربع فقام البعير صار يرغي وقام من مكانه وقطع الحبل انحشت من وجهه قفزت من فوق سلسله حجريه ارتفاعها حوالي 3 امتار وجيت تحت شجرة زيتون سمعت جدي يقول : الحقه يا ابو حاتم امسك هالبعير الهايج جا خالي يراكض وامسك حبل البعير المقطوع واخذ لمكانه وربط الحبل من جديد الربع انزلو حمولة القمح في البيدر وكل منا راح لبيته لاجل يرتاح كانت الساعه صارت 11:30 الظهر حيث سمعت خالي يقول لزوج خالتي : ما في مجال نرجع يا ابو متعب الساعه الحين 11:30 الظهر ومثل منت شايف الحراره قويه باكر ان شاء الله خير رحنا للبيت قام جدي عقل البعارين تحت الشجر وحط لها علف ومويه ودخلنا البيت تريحنا وكان معنا ازواج خالاتي ابو فارس وابو متعب وخوالي حريمنا كانو يجهزون الغدا بعد ما تغدينا وحمدنا الله تعالى قلت لجدي : يا جدي مره ثانيه لا تعطيني البعير الابيض هاذ البعير ماهو بطبيعي انحاش مني اكثر من مره وحاول يعضني ويظل يرغي ما ودي اياه اليوم الثاني طلعنا نروح نجيب القمح رفضت اني اخذ البعير الابيض عطاني جدي بعير لونه احمر قدت هالبعير ومشى معي ولا سوى شي نهائي لين وصلنا البيدر اوقفت البعير جنب القمح ونيخته وصرت افك عقدة الحبل فكيت عقدة الحبال وانزلت حمولة القمح جنب القمح المطروح على الارض صرت امسح بيدي على رقبة البعير هاذ وهو ساكت الا من رغا خفيف بعد حوالي فتره سمعت صوت الربع وهم مقبلين على البيدر وكان جنبي اولاد دخلو الربع البيدر وفجأه انطلق ذاك البعير الابيض كل منا انحاش لطرف قفزت فوق صخره كبيره وتعلقت بفروع شجرة زيتون جلست على فرع كبير وصرت اراقب هالمنظر خالي ابو اسماعيل يشد حبل البعير والرجاجيل تحاول تهدي البعير وبصعوبه لين سيطرو على البعير جدي رحمه الله واموات المسلمين نيخ البعير وانزل عنه حمولة القمح اخذنا البعارين للبيت تريحنا بقية ذاك اليوم واليوم الثالث نفس الشيء وانتهينا من نقل كل القمح المحصود للبيدر في صباح اليوم الرابع جدي جهز فرسه والمهره رباب ركبنا واخذنا البعارين معنا مشينا باتجاه جنوب شرق الديره تقريبا 3 او 4 ساعات وصلنا مكان واسع وفسيح سهل منبسط كان فيه حوالي 7 او 8 بيوت شعر مشينا لينا وصلنا جنب خيمه نادى جدي على صاحب الخيمه صباح الخير يا ابو سليم رد الرجال : اهلا وسهلا وطلع من الخيمه وقال تفضلوا يالربع حياكم الله تفضلوا اجلسوا هنا هنا على الفراش . نادى الرجال على شخص وهمس باذنه شي وراح هاذ الشخص كان في 4 اشخاص كل منهم صار ينيخ بعير ويربطه صب لنا الرجال الفنجال شربنا والحمدلله جدي قال للرجال : الحمدلله خلصنا نقل حمولة القمح ونصيبك محفوظ بعد الدراسه نصيبك يجيك لبيتك قمح منقى من الزوان والتراب والقش رد عليه الرجال : كفو كفو ما تقصر يا شيخ . ناظرني الرجال وقلي : خبرني يا النشمي كيف شفت البعارين ؟ رديت عليه : الله يطرح لك البركه فيها كلها طيبه وزينه لكن ذاك الابيض عنيف ومشاكس غلبني وحاول يعضني صار الرجال يضحك وقال : هاذ لانه مو متعود عليكم سوا كذا الربع ذول قاموا بواجب ضيافتنا على اكمل وجه جزاهم الله خير بعد ما تغدينا وحمدنا الله رجعنا لديرتنا بعد حوالي 3 ايام درسنا القمح وحطيناه في اكياس والحمدلله كانت غله طيبه 16 كيس وزن كل كيس 50 كيلو جرام قسمها علينا لخوالي وازواج خالاتي ولنا وقسم كيسين للرجال راعي البعارين حريمنا نقوا حصة الرجال من الزوان والتراب والقش حملنا على فرس كيسين وطلعنا صوب مكان الرجال واخذنا لهم شاي وسكر وقهوه وزيت زيتون رافقت جدي وخالي ابو حاتم لمكان الرجال وعطيناه نصيبه وجدي قال للرجال اسمع يا ابو سليم جيتك مرتين لبيتك وجبتني وهاذ عادة الرجال الغانميين يوم الخميس القادم ان شاء الله غداك انت وربعك في بيتي . وهاذ اللي صار لفانا الرجال ومعاه 4 من اولاده وحرمته تغدوا عندنا وبعد عصر ذاك اليوم ودعونا ورجعو لديرتهم اخر علمي بهاذ الرجال انه يتاجر بالحلال والبعارين وتوفي في سنة 2008 وكان عمره 96 سنه الزوان حبوب لونها ابيض اصغر من حب القمح اذا طحنت مع القمح وتم خبزه يكون بطعم الخبز مرار واضح صوره لمحصول القمح بعد حصاده http://www.mekshat.com/pix/upload06/...1238145552.jpg وسلامتكم يالربع |
| الساعة الآن 02:45 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir