|
تقرير عن تركيب سلة لسيارة فورتشنر . تصميمي وتنفيذي السلام عليكم ورحمه الله وبركاته هذا تقرير مني عن تفصيل سلة علوية لسيارتي الفورتشنر 2013 ، سلة عفش طبعاً من الالف الى الياء ، مع سرد الملاحظات والمشاكل اللي واجهتني في التصميم والتلحيم وغيره طبعاً مثل ما قلت ان السلة تفصيل شخصي يعني انا اللي لحمت وجبت الحديد وركبت ،،، وكان شغلي لحالي دون مساعدة احد ، سواء في اي مجال دخلته قبل ، البداية كان بسبب شيء معين ولاجل شيء معين والنهاية بتنفيذ فكرة حجمه كبير علي وكنت اشوف هالا بالامكان تطبيقة او لا فكانت عندي فكرة من البداية وانا اشتغل في السلة اني راح افشل فاللي ابيه ، لان اليد الوحدة ما تصفق ، وخصوصاً ان السلة تبي تكون كبيرة وتحتاج على الاقل في شيلته اكثر من واحد غير الحاجات الثانية ولكن الحمد لله طلعت النهاية ان يمكن ان اليد اذا بغت شي تصفق فالحمد لله حتى يرضى والحمد لله اذا رضي والحمد لله بعد الرضا ونبي الموضوع اخذه من باب السوالف ونعطي كل ماعندي من باب الفايدة لي ولكم ,,وليش دخلت المجال والفايدة اللي جنيته وغيره ، والهدف من التقرير هو ناحيتين ، الاولى وهي التقرير الثانية وهي فكرة ابيها توصل لبعض الاشخاص في المنتدى وان شاء الله توصل فبدايتي والسبب لتعلمي او دخول مجال الحدادة هم ورشة الصبي ... فعسى ان تكرهوا شيئا وهو خير لكم ، ففي بعض الاحيان تصير لك مواقف ماتبيها لكن تتفاجا بعد فترة ان الاشياء جابت فايدة لك انا ما تعلمت في الصبي (اللي خلف المزاد )لكن هم اللي جبروني على تعلم الحدادة ، والسالفة يا اخون وهي اني جيت بركب بطارية اضافية لسيارتي المهم وبعد البحث لقيت اقرب ورشة لي في الحي هم والشيء الثاني سمعتها بين الناس في التجهيزات . فرحت لمهم ودخلت الا جاني مديرهم الظاهر يماني الجنسية ، فسلمت عليه وقلت يالغالي انا ابي حديد بطارية فقالي مباشرة لازم تاخذ موعد ، فرديت عليه وقلت انا مابي اصلح عندك انت بس فصلي قاعدة البطارية وانا اركبه رجع وقالي الحداد مشغول ، فقلت 5 دقايق ماراح تضركم فقال لازم موعد!!!! . وهنا استغربت على الامتناع المهم بعد الاخذ والرد ماش طقتن الزعله بعد ما حاولت فيه يمين ويسار الا ماش ، فقلت في نفسي وانا طالع مايخالف ، اللي علم عاملكم على الحديد يعلمني انا على الحديد، والوعد قدام فتهورت وبدون تفكير ومباشرة طلعت من عنده ووجهي للصناعية ام الحمام واحلى مكينة لحام وارخصهم بقيمة 300 ريال وهذي هي http://e.top4top.net/p_275o1931.jpg المهم شريت المكينة وغزيتها بالبيت لكن هنا لازم ابحث عن احد يعلمني طريقة التلحيم ، المهم قلت الشيخ يوتيوب مايقصر ، وشفت مقاطع لين طلعت عيوني ، ورحت الاستراحة وبديت اتعلم لكن جميع محاولات او تطبيقي لمقاطع فشلت، وماش عجزت وحاولت فمرة يموع الحديد ومرة يلصق فتوقفت الا بعد مده قابلت الوالد وسالته عن الحديد واللحام بحكم خبرته في اكثر من مجال ، فشرح لي كل شيء عن التلحيم واللحام وانواع اللحام وكل شيء والوزنية حتى سرعة اليد على الحديد مهمة, بعده بحثت ولا لقيت الا عامل المزرعة يعلمني ، واخذني للمستودع وخذ تلحيم وهو يشوف حتى ما لمس ابد مكينة اللحام ، المهم وبعد صار اللي صار لحمت قاعدة طاولة او مكيف صحراوي http://d.top4top.net/p_275o0pb8.jpg وطبعاً هو يخلني الحم وبعد ما اخلص يجرب لحام ، وكذا الين ما صار اللي بالصورة فوق ومن هنا كانت البداية فعزمت اجرب تلحيم اكثر من شكل و اكثر من سبب وجت الفكرة الثانية وهي اني اسوي شبك حرامي ، للبيت http://c.top4top.net/p_275pkcr5.jpg ومن هنا بديت الامور تتضح عندي وهي ان كل حديد له طريقة بالتلحيم وله امبير معين ، حتى مسكة اليد تختلف من طريقة الى طريقة ، هذا غير عرض الحديد ، فكلها عامل تجمع بين قوة اللحام وشكل اللحام . المهم وبعد ما عرفت فبديت بفكرة قاعدة البطارية لسيارتي ، ولكن قبل ما ابدا فعلياً سويت اكثر من شكل في البداية عشان اختار الانسب بينهن . http://a.top4top.net/p_2754pyc3.jpg المهم هالشكلين ما عجبنن ، لان الحديد عرض الحديد في الشكل 1.5 مل ، وهو ضعيف ، ومن هنا بديت رحلتي بين مصانع الحديد عشان اشوف انسب شيء ، مع العلم اني لقيت فيه حديد تجاري وحديد اصلي ، لكن المشكلة اللي واجهتني وهي اني مابي اخرم جنب المكينة او الحم المهم وبعد محاولات ركبت قاعدة للبطارية والحمد لله كل شيء تمام وركبت البطارية وضبطت موتري ومددت له كهرباء ولمبات وغيره ، الا بالاخير طلع عندي حديد واجد ولا احتاجه ، ففكرت اني ارمية بالشارع الا اخوياي لزموا اني اتركه لاني راح استفيد منه بعدين ،، ومنا هنا جت فكرة السلة ، والسبب لان كثير السفر وخصوصا اني ما اسافر الا معي اهلي ، فرايح جاي ، فعفشي واجد مع اني فاك المراتب الخلفية وبعض الاحيان ما تكفي المساحة ، ومن هنا بدا مشواري الصعب المهم جتني الفكرة الاولى وهي اني افصل السلة على مسامير التندة مباشرة ، يعني افك العوارض واحط الحديد على التندة واشده بمشامير التندة نفسه وفكيت العوارض وجبت زاوية 4 مل في 2 متر وبديت اوزن كل حديدة على جنب ، لكن المشكلة الي عجزت احله وهي كالتالي لاحظ الصورة هذي وهي مكان وجود مسامير التندة للعوارض http://f.top4top.net/p_275uokr8.jpg وهذي الزاوية الـ4 مل اللي ابغى اوزنها على مسامير الوكالة http://c.top4top.net/p_27516r31.jpg لكن عجزت وصعبت علي وحاولت بكل الطرق وعيت تطبق ، السبب وهي ان وزنية مسامير التندة كل جنب يختلف عن بعض ، بمعنى اول مسمارين وزنيتهم تختلف عن المسمارين اللي بالوسط وتختلف عن المسمارين اللي بالاخير ، الصورة هذي توضح لكم http://a.top4top.net/p_275tjiu9.jpg فلاحظ اللي عليه دائرة حمراء ، فمثال المسامير الامامية اللي فوق السواق وزنيتها نفس وزنية اخر مسمارين في التندة ، فاذا ركبت الحديد وشديت المسمارين باول شيء والمسمارين باخر شي يطلع ان الزاوية زاحفة وبعيده عن المسمارين اللي في النص ، وهنا المشكلة اللي عيت تضبط معي المشكلة الثانية وهي ان المسمارين الامامية ارتفاعهم يختلف عن المسامير اللي في اخر شي بالنسبة لمستوى التندة وحاولت اني احتال لكن يبي يخرب شكل السلة ومن هنا غيرت الراي ومن هنا وبعد محاولات قررت اني بدل ما افصل سلة كاملة احطها سلة على نص التندة وهذا الشيء مناسب لي لكن هنا طحت في مشكلة ثانية وخفت اني تندتي تخرب ، المشكلة في المسمارين اللي في النص والمسمارين اللي في الاخير ، وهذي الصورة http://b.top4top.net/p_2756hrv10.jpg وركز بكلامي ، الحين بالصورة انا محدد 4 مسامير ، مسمارين في النص ومسمارين في الاخير المشكلة كانت ان المسمار الثاني (اقصد المسامير اللي في النص) موزون مع المسامير الاثنين اللي في الاخير ، وكلها جاية في خط واحد ومستقيم لكن المسمار الاول (اقصد المسامير اللي في النص) يختلف وزنية مع الثلاث مسامير . وهنا طحت بمشكلة ثانية ، وطلع هذا سبب ثاني ان السلة الاولى ما راح تطبق المهم صار اللي صار ، وصرت نفسية ، الى درجة رميت السلة الاخيرة بالزبالة وانتم بكرامة وقررت اني ابعد ان المجال وهو الحدادة لانه مو لي لان في كل الحالات اللي قبل لازم مكينة تطعج الحديد وهذا اللي اكتشفته المهم مر تقريباً 15 يوم وانا قافلة الاخلاق وكل يوم اذا دخلت الاستراحة اشوف الحديد وانا مغبون اني ما صلحت اللي ابيه المهم وبعد بحث طاحت عيني على سلة مركبها احد الاخوان على العوارض حقة الوكالة مباشرة ، غير تسجيع اخوياي ، فبعد ماشفتها طلعت طريقتها سهلة وان الطريقة هذي تركب على أي سيارة لها عوارض فاول شيء جبت تيوبات عرض 3 مل في 3 سم في 6 متر ، وبديت اوزنهم على السلة وحطيت عارضتين جنب عوارض الوكالة مثل الصورة اللي باللون الاحمر http://d.top4top.net/p_275gtgg1.jpg وبعد ما حطيتهن جبت تيوبات بالعرض (اللي بالالون الازرق) وخليتهم يمسكن بالتيوبات الحمراء ، وقعدت اوزن الحديد عشان تجي على كل السلة فبالاخير طلع الشكل هذا http://e.top4top.net/p_275kwwa3.jpg الشكل هذا كبير لكن اهتميت بالاول بالمقاس ، بعدها لحمت عوارض تيوبات على جنب باللون الاحمر مع مبسطات 3 مل وبعدها قصيت الزوايد اللي باللون الازرق . http://b.top4top.net/p_275cowr4.jpg الين طلع الشكل النهائي الحمد لله وجينا للصنرفة وازالة الشوائب والبوية ، ولكن ومن الفضاوة حطيت حرف اسمي الاول وحرف الاول من العايلة ، على قولتهم بخليها ماركة لي http://f.top4top.net/p_275qf4n4.jpg وهنا اقول الحمد لله سويت اللي ابيه وطبقتها والحمد لله ركبت ، لكن جت في بالي افكار وهي اني احط عليها شيء يخدمني خصوصاً اذا طلعت لحالي بشعيب او بنفود او غيره ، وهنا حطيت حيلي في الكهرب واتركم مع الشكل http://a.top4top.net/p_275memv5.jpg فاللي اضفته قدامكم وهو
ويوم انتهيت من الكهرب طبعاً اللي سويته من باب التجربة لكن لقيت فايدة كبيرة وقلت بسم الله يالله خلن اركبه وهذا شكله من فوق ومن الجنب http://a.top4top.net/p_276f3fg1.jpg http://d.top4top.net/p_275p6g72.jpg http://c.top4top.net/p_2756riw7.jpg وبالنهاية نجي للقايدة ، وهي اني اذا شغلت الليدات كلها يوضح عندي مجال الرؤية على اليمين واليسار والخلف ، لاحظ الخط الاحمر، فكل هذا يجيه النور واشوفة في الليل http://f.top4top.net/p_2753auk2.jpg وهنا صارت اموري الحمد لله ، طبعاً ما نزلت التقرير الا بعد التجربة ولا شفته مشكلة الى الان مع العلم اني ركبته قبل 5 ايام عاد ما ناقص الا رحلة مكشاتيه ان شاء الله ونستانس وننبسط نجرب فيها ما سويت ومن هنا اشركم كمنتدى مكشات وكاعضاء على رحب الصدر واتمندى ان التقرير ما طال ، واشكر اخوياي اللي صبروا علي وتحملوني طول شهر ونص والشي سببته لهم ، فالعذر والسموحه منه واتمنى ان التقرير اعجبكم واتمنى ان الفكرة اللي قصدته من ورى هذا التقرير تكون وصلت ان شاء الله فالحمد لله رب العالمين وماشاء الله تبارك الله وشكراً مكشات |
| الساعة الآن 08:10 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir