منتدى استراحات زايد - مقارنه جريئة بين الارمادا واليوكن

<div>قبل اسبوووع طلعنا عائلتين في رحلة عائلية من الجبيل الى الاحساء (تقريبأ 200 كيلومتر)

وسافرنا بسيارتين عائليتين وهما:
ارمادا لون اسود فل اوبشن موديل 2008 ماشي حول 87.000 كيلومتر
يوكن لون اسود فل اوبشن موديل 2008 ماشي حول 65.000 كيلومتر

المهم انا اصريت اني اسوووق الارمادا في طريق الذهاب من الجبيل الى الاحساء وكانت الساعة تقريباً من 12:00 الى الساعة 2:00 في عز الظهر

وكمان اصريت اني اسووق اليوكن في طريق الرجعة من الاحساء الى الجبيل وكانت الساعة تقريبأ من 1:30 الى الساعة 3:30 في عز الظهر
طبعاً ظلينا في الاحساء (بلد الخير والنعمة) في مزرعة 3 ايام

فعلشان اني جربت وسقت السيارتين لوقت طويل وفي نفس الظروف المناخية (فترة الظهر في الحر والشمس) فحبيت اني القي لكم وجهة نظري في السيارتين ... وكمان ودي اقووول ايش هي مساوء وإيجابيات كلا السيارتين علشان يستفيد الناس.. مع العلم انا ما امتلك اي من السيارتين وكمان انا مو متحيز لأي وحدة
طبعاً المقارنة بس كلام وللأسف مافيه صور لان زي ماقلت لكم ان السيارتين ليست لي علشان جذي ما حبيت اصور
نبدأ المقارنة:

المحرك:

السيارتين ثنتينهم مزودين بمحرك انا اعتبره جباااار وروعة ... الارمادا ما شاء الله المحرك يستجيب بسرعة ما تتصورها لما تدعس على البنزين ... لكن اليوكن يبغالة شوي وقت على مايستوعب انك داعس على البنزين

القير:

اللي اعرفة ان الارماد فيه 5 نمر ... واليوكن بصراحة مو متأكد بس اتوقع 4 نمر.. المهم وانا اسووق السيارتين حسيت بسلاسة وانسيابية التعشيقات في قير اليوكن ولايهون قير الارمادا

التعليق:

بصراحة الحين توني اقتنع بكلام الناس لما يقولون الامريكي حق خطوط .. ماشاء الله على اليوكن فيه راحة في المشي على المطبات غير طبيعية وربي انك ما تحس انك قاعد تمشي على شارع ، وتحس انك قاعد تطير وتمشي على الهوا ... اما الارمادا فهو مريح ولكن مو زي اليوكن (يعني اقرب شيء لتعليق الارمادا هو البرادو والاند كروزر ,, لانه ياباني)

المواد الداخلية:

هذي عاد ما يبغالها كلام الارمادا ماشاء الله عليه طبلونه قوي وذو ملمس ليين (مبطن) وتحس بفخامة داخلية رهيبة وتوزيع الازرار تحسه مدروس عدل وكل شيء في مكانه ، واحلى شيء لما تطب في مطب تحس ان السياره كلها قطعة وحدة وما فيها اصوات زحمة (استغربت من كلام الناس اللي تقوول ان النيسان يتفكك بسرعة ؟؟!!)... اما اليوكن بصراحة فطبلونه كله بلاستك في بلاستك مب صاحي وهذا الشيء الوحيد اللي نرفزني في اليوكن , احس ان المواد الداخلية مش ولا بد وكمان فيه اصوات بالديكور في حال المشي على المطبات الخشنة

البريك:

هذا الشيء الوحيد اللي نرفزني بالارمادا ، بصراحة بريك الارمادا توقعته احسن من جذي ، حسيته بيسوي فيني نكبه .... اما بريك اليوكن فماشاء الله رهيب مجرد انك تحط رجلك على البريك تشووف السيااره على طول خففت السرعة بشكل هادئ

الكراسي والاسيات:

كرسي السائق وكرسي الراكب الامامي باليوكن مريح وتحسه ذو طابع رياضي في نفس الوقت
كراسي السيت الثاني في الارمادا احسن واريح وكمان المساحة قدامهم مره وسيعة .. اليوكن شوي ضيق
كراسي السيت الثالث في الارمادا اوسع وتكفي حق الناس الطوال

الجلد:

حسيت ان جلد اليوكن ماشاء الله عليه فخم جداً كأنك راكب في كدلك , وتحس ان ملمس الجلد زي المخمل على شمواه ... الارمادا لا بأس به يعني كأنه جلد الافالون

التكييف:

كل السيااارتين عليهم تكيييف بطل ما شاء الله انا كنت اسوووق السيارتين في عز الظهر وكان التكييف ثلج ,ولكن دفع المكيف في اليوكن اقوى من الارمادا ماشاء الله على مكيف اليوكن ما توقعته بهالبروده والفعالية , عيبه الوحيد هو طريقة توزيع فتحات التكييف (عدد فتحات التكييف باليوكن 8 فتحات) ..... الارمادا لازم تحط التيكييف على اكبر شيء علشان يكون المكيف اوكيه في عز الظهر علشان دفعه مو زي اليوكن ماشاء الله ولكن بالليل يصير المكيف فريزر , واحلى شيء بمكييف الارمادا هي طريقة توزيع فتحات التكييف وكمان عدد فتحات التكييف 10 فتحات
لاحظت على السيارتين اني لما اوقف فترة طويله اكثر من 15 دقيقة يقل مستوى البروده (لكن يبقى المكيف اوكي)

المواصفات:

بصراحة السيارتين مواصفاتهم بطلللللة وفي اشياء موجودة بالارمادا وغير موجودة باليوكن ... وكمان في اشياء موجوده باليوكن ومو موجودة بالارمادا ... اكثر شيء عجبني هو نظام البصمة و تشغيل السياره من غير مفتاح

الشاشة والنافيقيشن:

كل السيارتين مزودات بشاشة ملاحة مع كاميرا خلفية ... لكن عندي شاشة الارمادا افضل من اليوكن ، ياخي احس ان شاشة الارمادا كأنها شاشة البي إم 740 الوانها رهيبة وخفيفة على العين وكمان النافيقيشن ثلاثي الابعاد ... اما اليوكن فلابأس بالشاشة

النظام الصوتي:

كل سياره مزودة بنظام صوتي خااااااالع مو طبيعي ,, تقوول داخل ديسكو ^__^ وفيهم نقااااوه صافيه جداًجداً

الرساوة:

بصراحة السيارتين ثنتينهم راسيات في الخط .. ولكن حسيت ان الارمادا ارسى من اليوكن (يمكن بحكم ان تعليق الارمادا الخلفي مستقل) لان عند المنعطفات الحادة احس ان السيارة ما تميل على جنب .. اليوكن في المنعطفات الحادة احياناً احسها بتسوي فيني فلم هندي يعني ما اقدر اعطيها كامل الثقة (بس هي مو سيئة يعني)

التحكم:

<div align="right"><font face="arial"><b><font face="tahoma"><font color="darkslateblue"><font size="4">هذا من الاشياء اللي عجبتني باليوكن ، ما تحس انك قاعد تسوق سياره كبيره ابد , وتحس انك قاعد تسوق سياره سيدان والتحكم فيها سهل جداً لكن السياره تبدأ ترج بعد الـ 100 يعني انا كنت امشي بها 140 وكانت السياره ترج ... الارمادا سياره وعره وكبيره ويبغالها واحد شنب علشان يروضها صح