منتدى استراحات زايد - برميل الحنطه....موقف طريف

السلام عليكم ورحمة الله وبركاته
هذه القصة حصلت لي شخصياً وانا في ايام الزهورطبعا زهور الطلح من اول لازم لزوم في كل بيت طين يكون فيه بهايم ودجاج وحمام وكان تحت الدرج .. طبعا بيتنا دورين بس ما فيه الا دار وحده والباقي غرف نوم مكشوفة يعني تعد النجوم يمر من عندك حيوان اليف وانت نايم صاير السطح جسر له .
المهم بدت اذاني ترف وتتحرك بكل اتجاه وعيوني ترمش احس بيلقط شي الا صوت الوالده تزهمني وانا بالشارع طبعا اول اذا بغونا يدورنا على طول في الشارع لو تصير في البيت قالوا مريض ومصخن اليوم
المهم وان اجيك امشي طبلوني تشوف القراطيس بالشارع تطير من سرعتي وغبرتي كاني جمس عبارتين في قاع يابس ومطرود ولا اوقف الا عند باب البيت قلت سمي ياه قالت رح حط للدجاج والحمام شوي حنطه .
قلت ابشري واروح عند البرميل عاد الحنطة في برميل عليه غطاء من حديد مجلفن معروف عند الاولين وله لسان وقفل وطوله تقريبا متر ونص يعني اطول مني وافتحه الا مابه الا شوي حنطة بالقاع وبعيد واخذ الطاسه ابغرف من الحنطة طبعا الدعوى كل بحركة سريعه علشان ارجع للشلة وانا ادنق ابغرف وانا اطيح بوسط البرميل على راسي ويغطس راسي بالحنطه وصارت رجولي بالسماء ابي ارفع نفسي ابي اصوت ابي اصيح واقعد اجمع صوتي واصرخ بكل قوتي وعلشان راسي مندفن بوسط الحنطة صاير صوتي ضعيف والرجلين ترفس ابطيت وانا على الحال وانهد حيلي ومن الزين ثوبي طاح على راسي عاد الثوب من اول لونه متغير من النظافه:d واشوي الا الوالده ربي يحفظها تباطتني يوم جت الا انا فوق تحت منعفس وتسحبني من رجولي وتعال شف الشكل ما فيه فتحه بالراس الا متروسه من الحنطه والشعر لو ترش عليه ماء نبت براسي هههه
وعقبها كل ما مريت وشفت البرميل احاول ابعد عنه من الخرعه
ومر علي يوم عصيب وموقف لا ينسى
وكنت السبب ان يغيرون الخطه بوضع الحنطة من البرميل الى خيشه

ه
تحياتي وتقديري للجميع .....ايام لاتنسى