مبروك عليكم ضهور سهيل
 

بسم الله الرحمن الرحيم

كل عام وانتم بخير ومبروك عليكم ضهور سهيل وهو ضهر البارح 24 / 8 على مناطق نجد
وما جاورها وعلى نفس خط العرض والله يرزق الطواريح والقناصه كلاً على فاله

اغلب الصقاقير في هالوقت يجهز نفسه وموتره وعزبته للمضاهير والمقانيص
حيث ان الطيور قربت الي طيره قط الموس من ايام والي موسه يسوق والي ما عاد الى يصك
بس ترى الوقت بدري تونا بالحر وخاصه الاحرار اما الشياهين الجبليات هذا وقتهن وخاصه الفروخ وقرنيس الهوى لتلهي والطرب

اما بالنسبه للأحرار فتو الجو والوقت ما حان احب اذكر اخواني بالنقل والتركيز على النقل
لا تغلطو غلطتي العام كثفت النقل الين هد الطير واستهد اهملت النقل
وتنكر علي الطير مره وبعدها عرفت خطاي ولاهو خطا الطير خطاي انا
ولا تعجل على نفسك ولا على طيرك كل شي لازم ياخذ وقته
وخاصه الوحش واما البيتي ما عليه اذا العام حصله نقل طيب يبيله تدهيل ونقل حليو ويزين
بس لا تنقل طيرك الين يعصب موسه وينشف من الدم

بالنسبه لي طيري يسوق الموس توه ضاهر واموره متوجهه ولله الحمد
صحيح بي عجله عليه وعلى المضاهير وكنت احسبنه متأخر وزعلان وحالتي حاله
بس يوم فكرت ولا الوقت بدري تونا

هذا الي عندي وينعاد علينا سهيل كل عام وحنا بخير وامان وصحه
والي يرد يذكرنا طيره وين وصل وش نوعه جير او حر ولا شاهين
الي ناوي يشري وش ناوي ياخذ

ودمتم سالمين :):good2: