|
راعي العجراء وقزازة التريك http://www.mekshat.com/pix/upload05/...10816-1025.jpg . السلام عليكم ورحمة الله وبركاته اليكم هذه السالفه القديمه اكثر من 35 سنه بعنوان راعي العجراء وقزازة التريك كنا من اول اذا بغينا نطلع للبر ناخد معنا تريك من اللي يعبىء قاز وناخذ زود فتايل مدري فنايل نسيت ايهن اللي تلبس هي الفتيله او الفنيله وناخذ زود قزازه نخاف تنكسر ثم مايشتغل من الهواء وخايفين عليها تنكسر حاطينها على المرتبه حتى ماتنكسر من زود الحرص المهم مشينا والوعد محطة مفرق صلبوخ اخوياي بالسياره الثانيه اربعه كلهم راكبين قدام سيارتهم ونيت فرت وانا ورفيقي سيارتنا ددسن مرتبتين او غمارتين ويوم وصلنا للمحطه وتقابلنا وعبينا بانزيم ترانا من اول نقول بانزيم بس يوم تمدنا صرنا نقول بانزين والطرمبه كل لتر تدق جرس تعلمك بعدد اللترات من اول ماكل الناس تعرف الارقام لاتكتب ولاتقراء عربي حتى تعرف للارقام العنقليزيه ولكن يعرفون يحسبون بالعربي ولا دق الجرس قال واحد ولادق مره اخرى قال اثنين ثم ثلاثه واربعه على هالطريقه وانا مثلهم من اول ادربي الدميجه عاد دميجتي وش خليت لو ترجه ثلاثة ايام ماتسمع به الا قرقشة حثال شاهي ابو جبل وتالي قهوة بريه والباقي فاضيه من قل الذهانه تقول قرقوشة طفل توه بادي يحبي المهم يوم جينا نمشي قال واحد من ربعنا اللي بالسياره الثانيه اصبروا ابركب معكم وكان سمين بالحيل حنا اربعه بالغماره وضيقه قلنا تعال اركب نسينا قزازه التريك انها على المرتبه وربعنا مشوا قبلنا وهو عجل يعنني رشيق وهو وينه وين الرشاقه ليا قعد ماينقشع من الارض الا بكريك من سمنه وهو يفتح الباب ويركب ولاه على القزازه يوم خلاها تقول سكر منتثر كتم نفس القزازه كتم ماعاد تنفس وهو يصيح ويطمر من المرتبه ويحول بسرعه هالمره برشاقه من حر الوجع وبفتح الباب وينزل هه وش فيك قال انا قعدت على قزاز قلنا اجل كسرت قزازة التريك الله لايعافيك منين نجيب وحده ثانيه ماهمنا هو همنا القزازه يوم حولنا من السياره ورحنا نشوف الرجال ولا مقفاه يخرخر دمان تقول مرمي بشوزن رقم سته ابو غزال بولندي الاصلي وحنا نرفع ثوبه ونفسخ بعد السكري (السر...) ونسدحه على كبوت الددسن المشكله ضلام المحطه مامن اناره بالحيل وان قربنا عند اللمبه كل يشوفنا وحنا نبعده شوي واطمر للبقاله اجيب كشاف (تريك) ذاك الاصلي اللي فيه مغنطيس بخمسه ريال يوم كشفنا عليه والا الرجال كل شي يخرخر فيه نسد هذا يصب الثاني كله جروح المشكله اللي بين (الش؟؟؟؟) مانشوفه والرجال سمين ومتعافي قلت الخويي انقز لراعي البنشر وجب لنا ليور نقرص على (الش؟؟؟؟) نشوف جروحه الداخليه المسيكين هو يتوجع وحنا ماخذينه ضحكه وفسقه البقاله ماهيب شي صغيره ولكن عندنا صارت صيدليه السقاف او البترجي قلت لخويي رح جب منقاش وابره راح وجاب وكل قزازه نطلعها مكانه يصب دم وهو ماغير يون ويحن وحنا نقوله خلك هذا اللي يمشي حافي المهم شلنا اللي شلنا وخلينا اللي خلينا ووانا اروح للبقاله قلت عندك شاش قال لا من حين الرجال سمين وش يكفيه من الشاش وانا افل فراش البر وطلع ذاك الشرشف وامهد الرجال تمهيد مولود واجيب حبل وحطه سباق وانا امهده وعلى مستشفى بحريملا يوم جينا عند الدكتور وشاف الرجال قال من اللي راميه قلنا قزازة التريك وتعال وشفها جايبنها معنا بأثر الجريمه والرجال ويحكي اسأله والا كان بيحولنا للشرطه المهم انه دخل عندهم يجي ساعه ينقشون القزاز وحنا نخلص ونواصل الطريق الا وربعنا يتحروننا على الخط هه وينكم قلا القصه كذا وكذا وصارت ضحكه ويوم وصلنا للبر وقعدنا صار شيخ هاتوا كذا ابي كذا ماغير يتدلع علينا ودك من يرميه صدق بشوزن ام حبه بفشق ام توسع انتهت السالفه بالصرحه فكرنا نوديه للبنشر يرقع الشقوق بس مامعنا دراهم تكفي والرقعه بريالين وشقوقه واجد وحنا طفرانين وقبل الختام سبحانك اللهم وبحمدك لا اله الا انت استغفرك اللهم واتوب اليك وبعد الختام اشكركم على سعة صدوركم والله يحفظكم ويرعاكم اخيكم راعي العجراء |
| الساعة الآن 11:59 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir