|
هادي ونيته الصافيه.. السلام عليكم ورحمة الله وبركاته.. من قصص الاولين كان فيه واحد اسمه هادي عايش على رزق الناس من الفقر حادته العازه كان يتلزز عند العرب يدور احد ياأكلّه عشان يعيش مع انه تمر عليه ايام يبات بلا غداء ولا عشاء وحالته حاله والناس لاشافوه يدخلون ببيوتهم خوف انه يجيهم واذا جاء يشوف الرجال مايبونه بس وش يسوي وكل يوم وهو على هالحال دور شغله مالقى وهو معروف بقرامته وشجاعته وانه رجال امين فجاء يوم عرض عليه شيخ وقال له ياهادي وش رايك ترعى غنمي ولك اجرك وانت ان شاء الله رجال امين وبتحافظ على الحلال وقال ميخالف وابشر من يحافظ عليه من ايدين العدو المهم وخذا وقت وهو يرعى غنم الشيخ وبكل امانه ونيه صافيه وتمر به الايام والليالي وهو يرعى الغنم.. وفي ليله من الليالي شاف رجال يراقبه من بعيد وهادي معروف بانه مايغره شيء وسوا حاله مادرى والليل الثاني نفس الحكايه وياخذ وياخذ ويرجع عليه هالرجال وفكر وقال وش قصته لازم اني احترص منه يمكن ناوي بالحلال ..ويجي ليل ويهجمون عليه القوم وياخذون الحلال ويروح هادي يسعى ويصيح على الرجاجيل اللي حوله وياخذ البندق ويحارب بكل قوه خوف على الحلال لا يروح ويرد الحلال هو وربعه ويوم رده وهو اللي يشوف الرجال اللي كان يراقبه يراقبه وجاه ويوم شاف الرجال هادي وهو اللي ينحاش ويرميه هادي وهو مايبي يصيبه على شان يشوف وش قصته يرمي على يمينه ثم يساره ثم قدامه وهو اللي يوقف ويجيه ويبرحه ظرب وقال انت وش قصتك قد لك ايام وانت دابل تسبدي ويظربه ظرب جعله فالعدو وقال خلاص بعلمك بس فكني انا مرسلني الشيخ وقال راقبه وعطني علومه شوفه امين ولالا قال وهو متفجىء الشيخ قال ايه ويطلق سراحه ويقعد هادي الليل طوله يفكر وش اسوي الشيخ اهاني بس اذا قلت معادني براعي غنمك وين عاد اروح ؟؟وفكر وقال الرب هو الرازق واهم ماعلى الواحد كرامته وكان ينتظر الفجر على احر من الجمر وجاء الفجر ويروح للشيخ ويوم جاه وهو اللي يعاينه بهاك النظره والشيخ قد عنده خبر من اللي صار وان القوم بغوا ياخذون الحلال ورده وقال الشيخ طالبك ياهادي انك ماتروح انا اغلطت وابشر باللي يرظيك بس تكفى الغنم ماني بملاقي لها راعي مثلك تكفى لا تخليني ويقعد يطلبه وهادي مانزل عيونه وده يذبحه وسكت الشيخ وقال هاه وش تقول قال اسمع الكلام انا مخلص بشغلي وقبل كذا مخلص نيتي لله وانت خيب ظني فيك احسب ذي السوالف ماهي بمنك واليوم جعلك في دعثور مايثورغنمك وعندك ويعطيه مقفاه ويروح .. فتحسف الشيخ على ماسواه .. شفتوا كيف النيه الصافيه والنيه السيئه .. وسلامتكم |
| الساعة الآن 05:52 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir